Skanda Purana · Chapter 7.38

// pulastya uvāca // //
kuṃḍaṃ tu śivaliṃgākhyaṃ tato gacchenmahīpate //
yatra sā jāhnavī guptā tiṣṭhate bhūpasattama

tasyāṃ snāto naraḥ samyaksarvatīrthaphalaṃ labhet //
mucyate pātakātkṛtsnādājanmamaraṇāṃtikāt

// yayāti ruvāca // //
kimarthaṃ tatra sā guptā jāhnavī tiṣṭhate vibho //
kasminkāle samāyātā paraṃ kautūhalaṃ hi me

// pulastya uvāca // //
yadā prasādito devairbhagavānvṛṣabhadhvajaḥ //
arbude'sminsadā stheyamacalena tvayā vibho

tatra saṃsthāpite liṃge svayaṃ devena śaṃbhunā //
yatpātitaṃ purā liṃgaṃ vālakhilyairmaharṣibhiḥ

atikopasamāyuktaiḥ kasmiṃścitkāraṇāṃtare //
tadā devena pratijñātaṃ sarveṣāṃ tridivaukasām

acale tu mayātraiva sthātavyaṃ nātra saṃśayaḥ //
tataḥ kālena mahatā vasatastasya tatra ca

acaleśvararūpasya gaṃgā citte vyajāyata //
kathaṃ nityaṃ tayā sārddhaṃ bhaviṣyati samāgamaḥ

atha jānāti no gaurī māninī parameśvarī //
tasyaivaṃ cintayānasya bahuśo nṛpasattama

upāyaṃ sumahaddhyātvā jāhnavīsaṃgasaṃbhavam //
tenādiṣṭā gaṇāḥ sarve naṃdibhṛṅgipuraḥsarāḥ

abhiprāyo'sti me kaścijjalāśrayavratodbhavaḥ //
kriyatāmuttamaṃ kuṇḍamasminparvatarodhasi

tatrāhaṃ jalamadhyasthaḥ sthāsyāmi jalatatparaḥ //
tacchrutvā tvaritaṃ cakrurgaṇāḥ kuṇḍamanekaśaḥ

svacchodakasamākīrṇaṃ sutīrthaṃ susukhāvaham //
tato gaurīmanujñāpya jāhnavīsaṃgalālasaḥ

vratavyājena deveśo viveśa tadanantaram //
cintayāmāsa tatrastho gaṃgāṃ trailokyapāvinīm

sā dhyātā tatkṣaṇāttatra śivena saha saṃgatā //
evaṃ sa bhagavāṃstatra jāhnavīṃ bhajate sadā

vratavyājena rājendra na tu gaurī vyajānata //
kasyacittvatha kālasya nārado bhagavānmuniḥ //
kaivalyajñānasaṃpannastatrāyātaḥ paribhraman

sa tu dṛṣṭvā mahādevaṃ jalasthaṃ vratadhāriṇam //
kāmajairiṃgitairyuktaṃ tatrā'sau vismayānvitaḥ

vaktranetravikāro'yaṃ kimasya vratadhāriṇaḥ //
īdṛkkāmasamāyuktastato dhyānasthito muniḥ

athā'paśyaddhyānadṛṣṭyā gaṃgāsaktaṃ maheśvaram //
gauryā bhayena savyājaṃ tato vismayamāgataḥ

tadā sa kathayāmāsa sarvaṃ haraviceṣṭitam

tato devī tvarāyuktā yayau yatra maheśvaraḥ //
ātāmranayanā roṣādvepamānā muhurmuhuḥ

tāṃ dṛṣṭvā kopasaṃyuktāṃ samāyātāṃ maheśvarīm //
uvāca jāhnavī bhītā jñātvā divyena cakṣuṣā

āvayoḥ saṃgame devī nāradena niveditā //
seyaṃ ruṣṭā samāyāti kuruṣva yadanantaram

// śrīmahādeva uvāca // //
karttavyaṃ jāhnavi śreyaḥ puro gatvā nagātmajām //
atyarthaṃ māninī hyeṣā sāmnā ca vaśavartinī

tatkṣaṇājjāyate sādhvī tasmātsāmaparā bhava //
no cecchāpaṃ mayā sārdhaṃ tava dāsyatyasaṃśayam

evamuktā ca rudreṇa jāhnavī nṛpasattama //
kuṇḍānnirgatya sā gaṃgā sammukhaṃ prayayau tadā

pratyudyayau salajjā ca kṛtāṃjalipuraḥsarā //
praṇamya śirasā ceyaṃ tataḥ prāha svalaṃkṛtā

purā'haṃ tava kāṃtena nipatantī nabhastalāt //
dhṛtā devi tavā pyetadviditaṃ nṛpateḥ kṛte

bhagīrathābhidhānasya tataḥ sneho vyavardhata //
āvayostava bhītyā ca nābhūtkvāpi samāgamaḥ

adhunā tava vākyena jāne'haṃ na sureśvari //
samāhūtā'smi rudreṇa kiṃ vā svacchandataḥ śubhe

trailokyasya prabhurayaṃ tanniṣkramya kathañcana //
tasmādatraiva saṃprāptā satyametanmayoditam

// pulastya upāca // //
tasyāstadvacanaṃ śrutvā tato devī praharṣitā //
provāca madhuraṃ vākyaṃ satyametattva yoditam

tasmādvaraya bhadraṃ te varaṃ matto yathepsitam //
muktvaikaṃ patidharmmatve mama kāṃtaṃ maheśvaram

// gaṃgovāca // //
api daurbhāgyayuktā'haṃ bhāryā jātā'smi śūlinaḥ //
tasmādekaṃ dinaṃ dehi krīḍanārthamanena tu

caitraśuklatrayodaśyāmahorātraṃ sureśvari //
śivakuṃḍaṃ tathāstvetanmayā yasmātsamāvṛtam

śivagaṃgābhidhānaṃ ca tasmātkuṇḍaṃ dharātale //
khyātiṃ yātu prasādena tava parvatanaṃdini

// pulastya uvāca // //
evamastviti sā devī procya gaṃgāṃ mahānadīm //
tato visarjayāmāsa tāmāliṃgya muhurmuhuḥ

gatāyāmatha gaṃgāyāmadhovaktraṃ sulajjitam //
pāṇau gṛhya yayau rudraṃ bhramamāṇā gṛhaṃ prati

evametatpurāvṛttaṃ tasminkuṇḍe narādhipa //
tasmātsarvaprayatnena caturddaśyāṃ samāhitaḥ

śuklāyāṃ caitramāse tu snānaṃ tatra samācaret //
sāṃnidhyāddevadevasya gaṃgāyāśca nṛpottama

yatra saṃkṣayamāyāti sarvaṃ tatrāśubhaṃ kṛtam //
tatra yo vṛṣabhaṃ dadyādbrāhmaṇāya nṛpottama //
tadromasaṃkhyayāsvarge sa pumānvasati dhruvam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe śivagaṃgākuṇḍotpattimāhātmyavarṇanaṃnāmāṣṭātriṃśo'dhyāyaḥ