Skanda Purana · Verses 7.3-3

ṛṣaya ūcuḥ//
kathito bhavatā sargaḥ pratisargastathaiva ca//
vaṃśānuvaṃśacaritaṃ purāṇānāmanukramaḥ

manvantarapramāṇaṃ ca brahmāṃḍasya ca vistaraḥ//
jyotiścakrasvarūpaṃ ca yathāvadanuvarṇitam//
śrotumicchāmahe tvattaḥ sāṃprataṃ tīrthavistaram

pṛthivyāṃ yāni tīrthāni pāpaghnāni śubhāni ca//
tāni sūtaja kārtsnyena yathāvadvaktumarhasi

sūta uvāca//
idaṃ pṛṣṭaṃ purā devyā kailāsaśikharottame//
nānādhātuvicitrāṃge nānāratnasamanvite

nānādrumalatākīrṇe nānāpuṣpopaśobhite//
yakṣavidyādharākīrṇe hyapsarogaṇasevite//५/
tatra brahamā ca viṣṇuśca skandanandigaṇeśvarāḥ//
caṃdrādityau grahaiḥ sārdhaṃ nakṣatradhruvamaṇḍalam

vāyuśca varuṇaścaiva kubero dhanadastathā//
īśānaścāgniriṃdraśca yamo nirṛtireva ca

saritaḥ sāgarāḥ sarve parvatā uragāstathā//
brāhmyādyā mātaraścaiva ṛṣayaśca tapodhanāḥ

mūrtimaṃti ca tīrthāni kṣetrāṇyāyatanāni ca//
dānavāsuradaityāśca piśācā bhūtarākṣasāḥ//7.1.3.१०
tatra siṃhāsanaṃ divyaṃ śatayojanavistṛtam//११/
lakṣāyutasahasraiśca rudrakoṭibhirāvṛtam//
tanmadhye sarvatobhadraṃ siṃhadvāraiḥ sutoraṇaiḥ

svacchamauktikasaṃkāśaṃ prākāraśikharāvṛtam//
nandīśvaramahākāladvārapālagaṇairvṛtam

kiṃkiṇījālamukharaiḥ satyatākairalaṃkṛtam//
vitānacchatrakhaṃḍaiśca muktādāmapralaṃbitaiḥ

ghaṃṭācāmaraśobhāḍhayairdarpaṇaiścopaśobhitam//
kalaśairdvāravinyastaratnapallavasaṃyutaiḥ

citritaṃ citraśāstrajñai ratnacūrṇaiḥ samujvalaiḥ//
svastikaiḥ patravalyādyairliṃgodbhavalatādibhiḥ

śatasiṃhāsanākīrṇaṃ vedikābhiśca śobhitam//
āsīnai rudravṛndaiśca rudrakanyākadambakaiḥ

lakṣapatradalāḍhyaiśca śvetapadmaiśca bhūṣitam//
apsarobhiḥ samākīrṇaṃ puṣpaprakaravistṛtam

dhūpitaṃ dhūpavarttībhiḥ kuṃkumodakasecitam//
vaṃśavīṇāmṛdaṃgaiśca gomukhairmukhavādanaiḥ

śaṃkhabherīninādena dundubhidhvanitena ca//
garjadbhirgaṇavṛndaiśca meghasvanitanisvanaiḥ

gaṇānāṃ stotraśabdena sāmavedaraveṇa ca//
prekṣaṇīyairmahānādairgeyahuṅkāraśobhitam

vṛṣanarditaśabdena gajavājiraveṇa ca//
kāṃcīnūpuraśabdena samākīrṇadigaṃtaram

sarvasaṃpatkaraṃ śrīmacchaṃkarasyaiva maṃdiram//
vaṃśa vīṇāmṛdaṃgaiśca nāditaṃ tatra tatra ha //
ṛgvedo mūrtimāṃścaiva śakranīlasamadyutiḥ

divyagandhānuliptāṃgo divyābharaṇabhūṣitaḥ //
saṃsthitaḥ pūrvatastasya dīpyamānaḥ svatejasā

uttareṇa yajurvedaḥ śuddhasphaṭikasannibhaḥ //
divyakuṇḍaladhārī ca mahākāyo mahābhujaḥ

sthitaḥ paścima digbhāge sāmavedaḥ sanātanaḥ //
raktāṃbaradharaḥ śrīmānpaprarāgasamaprabhaḥ

sragdāmadhārī citraśca gītabhūṣaṇabhūṣitaḥ //
athavāṃ'janavacchayāmaḥ sthito dakṣiṇatastathā

piṃgākṣo lohitagrīvo harikeśo mahātanuḥ //
itihāsaṣaḍaṃgāni purāṇānyakhilāni ca

vedopaniṣadaśchando mīmāṃsāraṇyakaṃ tathā //
svāhākāravaṣaṭkārau rahasyāni tathaiva ca

etaiḥ samanvitaiścaiva tatra brahmā svayaṃ sthitaḥ //
śaktirūpadharairmantrairyogaiśvaryasamanvitaiḥ//

sahasrapatrakamalairaṃkitaiḥ surapūjitaiḥ //
pūjitairgaṇarudraiśca brahmaviṣviṃdravaṃditaiḥ

cāmarākṣepavyajanairvījitaiśca samantataḥ //
śobhitaśca sadā śrīmāṃścaṃdrakoṭisamaprabhaḥ

jñānāmṛtasutṛptātmā yogaiśvaryaprasādakaḥ //
yogīṃdramānasāṃbhoja rājahaṃso dvijottamaḥ

ajñānatimiradhvaṃsī ṣaṭtriṃśattattvabhūṣaṇaḥ //
sarvasaukhyapradātā ca tatrāste caṃdraśekharaḥ

tasyotsaṃgagatā devī taptakāṃcanasaprabhā //
pūjito yoginīvṛndaiḥ sādhakaiḥ surakinnaraiḥ

sarvalakṣaṇasaṃpūrṇā sarvābharaṇabhūṣitā //
yogasiddhipradā nityaṃ mokṣābhyudayadāyinīm

saubhāgyakadalīkandamūlabījaṃ ca pārvatī //
devasya mukhamālokya vismitā cārulocanā

ānaṃdabhāvaṃ saṃjñāya ānandāsrāvilekṣaṇam //
uvāca devī madhuraṃ kṛtāṃjalipuṭā satī

//
devyuvāca // //
janmakoṭisahasrāṇi janmakoṭiśatāni ca //
śodhitastvaṃ jagannātha mayā prāṇanaciṃtayā

arddhāṃga saṃsthayā vāpi tvadvaktradhyānakāmyayā //
tathāpi te jagannātha nāṃto labdhvo maheśvara

anantarūpiṇe tubhyaṃ devadeva namo'stu te //
namo vedarahasyāya namo vedaiḥ stutāya ca

śmaśānaratinityāya namo gaganacāriṇe //
jyeṣṭhasāmarahasyāya śatarudrapriyāya ca

namo vṛṣakṛtāṃkāya yajurvedadharāya ca //
brahmāṃḍakoṭisaṃlagnamāline gaganātmane

maṇicitritakandāya namaḥ sarvārthasiddhaye //
namo vedasvarūpāya dvija siddhipriyāya ca

puṃstrīvikārarūpāya namaścaṃdrārddhadhāriṇe //
namognaye sahomāya ādityavaruṇāya ca

pṛthivyai cāṃtarikṣāya vāyave dīkṣitāya ca //
saṃyogāya viyogāya dhātre kartre'pahāriṇe

pradīptaśūlahastāya brahmadaṇḍadharāya ca //
namaḥ patīnāṃ pataye mahatāṃ pataye namaḥ ///.

namaḥ kālāgnirudrāya saptalokanivāsine //
tvaṃ gatiḥ sarvabhūtānāṃ bhūtānāṃ pataye namaḥ

namaste bhagavanrudra namaste bhagavañchiva //
namaste parataḥ śreṣṭha namaste parataḥ para

jihvācāpalyabhāvena khedito'si mayā prabho //
tatkṣantavyaṃ maheśāna jñānadivya namo'stu te

// īśvara uvāca // //
mamotsaṃgasthitā devi kiṃ tvaṃ sāsrāvilekṣaṇā //
adyāpi kimapūrṇaṃ te tatsarvaṃ karavāṇyaham

varaṃ bravīhi bhadraṃ te stavenānena suvrate //
dadāmi te na saṃdehaḥ śokaṃ tyaja maheśvari

niṣkale sakale devi sthūle sūkṣme carācare //
na tatpaśyāmi deveśi yattvayā rahitaṃ bhavet

ahaṃ te hṛdaye gauri tvaṃ ca me hṛdi saṃsthitā //
ahaṃ bhrātā ca putraśca baṃdhurbhartā tathaiva ca

tvaṃ tu me bhaginī bhāryā duhitā bāṃdhavī snuṣā //
ahaṃ yajñapatiryajvā tvaṃ ca śraddhā sadakṣiṇā

oṃkāro'haṃ vaṣaṭkāraḥ sāmāhamṛgyajustathā //
ahamagniśca hotā ca yajamānastathaiva ca

adhvaryurahamudgātā brahmāhaṃ brahmavittathā //
tvaṃ tu devyaraṇī caiva patnī tu parikīrtyase

svāhā svadhā ca suśroṇi tvayi sarvaṃ pratiṣṭhitam //
ahamiṣṭo mahāyajñaḥ pūrvo yajñastvamucyase

puruṣo'haṃ varārohe prakṛtistvaṃ nigadyase //
ahaṃ viṣṇurmahāvīryastvaṃ lakṣmīrlokabhāvinī

ahamindro mahātejāḥ prācī tvaṃ parameśvarī //
prajāpatīnāṃ rūpeṇa sarvamāhaṃ vyavasthitaḥ

teṣāṃ yā nāyikāstāstvaṃ rūpaistaistairavasthitā //
divaso'haṃ mahādevi rajanī tvaṃ nigadyase

nimeṣo'haṃ muhūrtaśca tvaṃ kalā siddhireva ca //
ahaṃ tejo'dhikaḥ sūryastvaṃ tu saṃdhyā prakīrttyase

ahaṃ bījadharaḥ śreṣṭhastvaṃ tu kṣetraṃ varānane/
ahaṃ vanaspatiḥ plakṣastvaṃ vanaspatirucyase //

śeṣarūpadharo nitye phaṇāmaṇivibhūṣitaḥ //
revatī tvaṃ viśālākṣi madavibhramalocanā

mokṣo'haṃ sarvaduḥkhānāṃ tvaṃ tu devi parā gatiḥ //
apāṃ patirahaṃ bhadre tvaṃ tu devi saridvarā

vaḍavāgnirahaṃ bhadre tvaṃ tu dīptiḥ prakīrtitā //
prajāpatirahaṃ karttā tvaṃ prajā prakṛtistathā //

nāgānāmadhipaścāhaṃ pātālatalavāsinām //
tvaṃ nāgī nāgarājo'haṃ sahasraphaṇabhūṣitaḥ

niśākaravaraścāhaṃ śreṣṭhā tvaṃ rajanīkarī //
kāmo'haṃ kāmado devi tvaṃ ratiḥ smṛtireva ca

durvāsāścāpyahaṃ bhadre tvaṃ kṣamā samacāriṇī //
lobhamohatapaścāhaṃ tvaṃ tṛṣṇā tāmasī smṛtā

kakudmānvṛṣabhaścāhaṃ yogamātā tapasvinī //
vāyurapyahamavyaktastvaṃ gatirmanasūdanī

ahaṃ mocayitā lobhe nirmamā tvaṃ yaśasvini //
nayo'haṃ sarvakāryeṣu nītistvaṃ kamalekṣaṇā

ahamannaṃ ca bhoktā ca oṣadhī tvaṃ nigadyase //
ahamagniśca dhūmaśca tvamūṣmā jvālameva ca

ahaṃ saṃvarttako meghastvaṃ ca dhārā hyanekaśaḥ //
ahaṃ munīnāṃ rūpeṇa tvaṃ tatpatnī prakīrtitā

ahaṃ saṃsārakarttā vai tvaṃ tu sṛṣṭirvarānane //
ahaṃ śukrāsthiromāṇi tvaṃ majjā balameva ca

parjanyo'haṃ mahābhāge tvaṃ vṛṣṭiḥ parameśvari //
ahaṃ saṃvatsaro devi tvamṛtuḥ parikīrttitā

ahaṃ kṛtayugo devi tvaṃ tu tretā nigadyase //
yugo'haṃ dvāparaḥ śrīmāṃstvaṃ kaliḥ parameśvari

ākāśaścāpyahaṃ bhadre pṛthivī tvamihocyase //
ahamadṛśyamūrtiśca dṛśyamūrtistvamucyase

varado'haṃ varārohe maṃtrastvamiti cocyase //
ahaṃ draṣṭā ca śrotā ca tvaṃ dṛśyā śrutireva ca

ahaṃ vaktā ramayitā tvaṃ vācyā parameśvari //
ahaṃ śrotā ca gātā ca tvaṃ gītirgeyameva ca

ahaṃ trātā ca gandhaśca tvaṃ tu nighrāṇameva ca //
ahaṃ sparśayitā kartā sparśyastvaṃ sṛṣṭameva ca

ahaṃ sarvamidaṃ bhūtaṃ tvaṃ tu devi na saṃśayaḥ //
sraṣṭā'haṃ tava deveśi tvaṃ sṛjasyakhilaṃ jagat

tvayā mayā ca deveśi otaprotamidaṃ jagat //
ekadhā daśadhā caiva tathā śatasahasradhā

aiśvaryeṇa tu saṃyuktau sarvaprāṇi vyavasthitau //
ahaṃ tvaṃ ca viśālākṣi satataṃ saṃpratiṣṭhitau

krīḍāmi krīḍayā devi tvayā sārddhaṃ varānane //
tvaṃ dhṛtirdhāriṇī lakṣmīḥ kāṃtā matprakṛtirdhruvam

ratiḥ smṛtiḥ kāmacārī mama cāṃganivāsinī //
devi kiṃ bahunoktena prāṇebhyo'pi garīyasī

varaṃ varaya devaśi yatkiṃcinmanasi sthitam//
tatte dadāmi tuṣṭo'haṃ yadyapi syātsudurllabham

// devyuvāca // //
dhanyāhaṃ kṛtapuṇyāhaṃ tapaḥ sucaritaṃ mayā //
yattvayā'haṃ jagannātha harṣadṛṣṭyā'valokitā

yadi tuṣṭo'si me deva varaṃ dātuṃ mamecchasi //
tanme kathaya deveśa sāṃprataṃ tīrthavistaram //

pṛthivyāṃ yāni tīrthāni pāpaghnāni śivāni ca //
tāni deveśa kārtsnyena yathāvadvaktumarhasi

// īśvara uvāca // //
śṛṇu devi pravakṣyāmi tīrthamāhātmyamuttamam //
sarvapāpaharaṃ nṛṇāṃ puṇyaṃ devarṣisatkṛtam

tīrthānāṃ darśanaṃ śreṣṭhaṃ snānaṃ caiva sureśvari //
śravaṇaṃ ca praśaṃsaṃti sadaiva ṛṣisattamāḥ

pṛthivyāṃ naimiṣaṃ tīrthamaṃtarikṣe ca puṣkaram //
kedāraṃ ca prayāgaṃ ca vipāśā cormilā tathā

karṇaveṇā mahādevī caṃdrabhāgā sarasvatī //
gaṃgāsāgarasaṃbhedastathā vārāṇasī śubhā

arghatīrthaṃ samākhyātaṃ gaṃgādvāraṃ tathaiva ca //
himasthānaṃ mahātīrthaṃ tathā māyāpurī śubhā

śatabhadrā mahābhāgā sindhuścaiva mahā nadī //
airāvatī ca kapilā śoṇaścaiva mahānadaḥ

payodhiḥ kauśikī tadvattathā godāvarī śubhā //
devakhātaṃ gayā caiva tathā dvārāvatī śubhā

prabhāsaṃ ca mahātīrthaṃ sarvapātakanāśanam

evamādīni tīrthāni yāni saṃti mahītale //
tāni dṛṣṭvā tu deveśi punarjanma na vindate

tisraḥ koṭyo'rdhakoṭī ca tīrthānāmiha bhūtale //
saṃjātāni pavitrāṇi sarvapāpaharāṇi ca

gaṃtavyāni mahādevi svadharmasya vivṛddhaye //
aśakyāni śivānyevaṃ gaṃtuṃ caiva sureśvari //
manasā tāni sarvāṇi gaṃtavyāni samāhitaiḥ

/ devyuvāca//
bhagavanprāṇinaḥ sarve sarvopadravasaṃkulāḥ//
alpāyuṣaḥ sadā baddhā vyāmohairmaṃdirodbhavaiḥ

tretāyāṃ dvāpare caiva kiṃ nu vai dāruṇe kalau //
tasmātteṣāṃ hitārthāya tattīrthaṃ tvaṃ prakīrtaya //
yena dṛṣṭena sarveṣāṃ tīrthānāṃ labhyate phalam

evamuktastu pārvatyā prahasya parameśvaraḥ //
uvāca parayā prītyā vācā madhurayā prabhuḥ

//
īśvara uvāca // //
tvameva hi carāḥ prāṇāḥ sarvasya jagatoraṇiḥ //
tvayā virahito devi muhūrtamapi notsahe

śivasya ca tathā śakteraṃtaraṃ nāsti pārvati //
na tadasti mahādevi yanna jānāsi śobhane

tvayā vinā'haṃ na kvāsmi na tvaṃ devi mayā vinā //
caṃdracaṃdrikayoryadvadagneruṣṇatvameva hi

tava devi mamāpīha nāsti caivāṃtaraṃ priye //
sarvaṃ caiva sureśāni yathāvatkathayāmyaham

rahasyānāṃ rahasyaṃ tu gopanīyaṃ prayatnataḥ //
nāstikāya na dātavyaṃ na ca pāparatāya ca

dātavyaṃ bhakti yuktāya svaśiṣyāya sutāya vā //
pūrvameva mayā khyātaṃ sārātsārataraṃ priye

tīrthopaniṣadaḥ khyātā liṃgopaniṣadastathā //
yogopaniṣado devi pūrvaṃ vai kathitāstava

// pārvatyuvāca // //
leśenāpi na siddhyaṃti kāṃkṣamāṇāḥ paraṃ padam //
yonīrbhramaṃto dṛśyaṃte narā nāstikavṛttayaḥ//

tīrthavratāni sevante pratyayo naiva jāyate //
mohitaṃ tu jagatpūrvaṃ mithyājñānena śaṃkara

kiṃ te phalaṃ suraśreṣṭha jagadvyāmohane kṛte

sārātsārataraṃ nātha tava prāṇapriyaṃ hi yat //
tanme kathaya deveśa priyāhaṃ yadi te prabho

ityuktaḥ sa tayā devyā śrīkaṃṭhaḥ suranāyakaḥ //
prahasyovāca bhagavāngaṃbhīrārthamidaṃ vacaḥ

//īśvara uvāca // //
śṛṇuṣvāvahitā bhūtvā pṛṣṭo'haṃ yastvayā'dhunā //
niṣphalaṃ tatpravakṣyāmi vastutattvaṃ yathāsthitam

pūrvamuktāni tīrthāni yāni te surasuṃdari //
tisraḥ koṭyo'rddhakoṭī ca brahmāṃḍe sacarācare

teṣāṃ ca gopitaṃ tīrthaṃ prabhāsaṃ caiva suvrate

evamuktaṃ mahādevi prabhāsaṃ kṣetramuttamam //
dṛṣṭvā saṃskārarahitāḥ kalau pāpena mohitāḥ

rājasāstāmasāścaiva pāpopahatacetasaḥ //
paradāraparadravyaparahiṃsāratā narāḥ

udvegaṃ ca paraṃ yāṃti pratapyaṃti yatastataḥ //
ātmasaṃbhāvitā mūḍhā mithyājñānena mohitāḥ//
varṇāśramaviruddhaṃ tu tīrthe kurvanti ye'dhamāḥ

tīrthayātrāṃ prakurvaṃti daṃbhena kapaṭena ca//
tīrthe mṛtā na sidhyaṃti te narā varavarṇini

etadarthaṃ mayā devi tīrthāni vividhāni ca //
liṃgāni caiva suśroṇi gopitāni prayatnataḥ //
na siddhidāni deveśi kalau kalmaṣakāriṇām

ye narāstu jitakrodhā jitalobhā jiteṃdriyāḥ //
brāhmaṇāḥ kṣatriyā vaiśyāḥ śūdrāścādambhamatsarāḥ

madbhāvabhāvitā devi tīrthaṃ sevaṃti suvratāḥ //
teṣāṃ caiva hitārthāya kathayāmi yaśaśvini

prabhāsamiti vikhyātaṃ kṣetraṃ trailokyavaṃditam //
tatkṣetraṃ naiva jānaṃti mama māyāvimohitāḥ

parohaṃ tvekacittaiśca bahujanmabhirarcitaḥ //
te vidaṃti paraṃ kṣetraṃ prabhāsaṃ pāpanāśanam

madbhāvabhāvitā devi mama vrataniṣeviṇaḥ //
teṣāṃ prabhāsikaṃ kṣetraṃ viditaṃ nātra saṃśayaḥ

yamaiśca niyamairyuktā ahaṃkāravivarjjitāḥ //
teṣāmarthe vadiṣyāmi tava praśnaṃ sudurllabham //
brahmaviṣṇvindradevānāṃ purāṇaṃ kathitaṃ mayā

so'haṃ devi vadiṣyāmi karṇaṃ dehi varānane //
pṛthivyāmapi sarveṣāṃ tīrthānāṃ surasuṃdari

ekaṃ me vallabhaṃ tatra prabhāsaṃ kṣetramuttamam //
tasmiṃścaiva mahākṣetre tīrthaiḥ somena pūjitaḥ //
varāṃstasmai pradāyātha sadaikāṃte sthito hyaham

tena guhyaṃ kṛtaṃ sthānaṃ tava devi prakāśitam//
tatra me yogayuktasya divyaṃ liṃgaṃ babhūva ha

divyatejassamā yuktaṃ vahnimekhalamaṃḍitam //
lakṣamātrasthitaṃ śāṃtaṃ durnirīkṣyaṃ tu mānavaiḥ

icchājñānakriyākhyāśca tisro vai śaktayaśca yāḥ //
tasmālliṃgātsamutpannā jagatkartṛtvahetave

tasmim̐lliṃge layaṃ yāti jagadetaccarācaram //
punastenaiva saṃbhūtaṃ dṛśyate sacarācaram

guhyaṃ caiva tu saṃbhūtaṃ na kaścidveda tatparam //
janmābhyāsena talliṃgaṃ jñāyate bhuvi mānavaiḥ

kṣetraṃ prabhāsikaṃ proktaṃ kṣetrajño'haṃ na saṃśayaḥ //
tatra someśanāmāhamasminkṣetraṃ varānane

mamāṃśasaṃbhavā ye ca asminkṣetre samudbhavāḥ //
teṣāṃ tu viditaṃ liṃgaṃ pūrvakalpe tu bhairavam

anyairapi yugairdevi idaṃ liṃgaṃ sudurlabham //
ghore kaliyuge pāpe viśeṣeṇa ca durlabham

anyannidarśanaṃ tatra tatpravakṣyāmi pārvati

kalau yuge mahāghore hetuvādaratā narāḥ //
vadiṣyaṃti mahāpāpāḥ sarve pākhaṇḍasaṃsthitāḥ

mithyā caitatkṛtaṃ sarvaṃ mūrkhaiścāpi prakīrtitam //
kva kṣetraṃ kva prabhāvaśca kutra vai santi devatāḥ

sarvaṃ cāpi tathālīkaṃ mūḍhaiścāpi prakīrtitam

evaṃ mūrkhā vadiṣyaṃti prahasiṣyanti cāpare //
nārakā nāstikā lokāḥ pāpopahatacetasaḥ //
siddhiṃ naiva prayāsyaṃti saṃprāpte tu kalau yuge

tīrthe caiva mṛtā ye tu śivanindāparāyaṇāḥ//
tiryagyoniprasūtāśca dṛśyante sarvayoniṣu

etasmātkāraṇāddevi tīrthe caiva suduḥkhitāḥ //
dṛśyante yugamāhātmyātsatyaśaucavivarjitāḥ

idaṃ hi kāraṇaṃ proktaṃ kṣetrāṇāṃ caiva gopane //
etatte kathitaṃ sarvaṃ siddhiryena sudurllabhā

yugeyuge tu tīrthāni kīrtitāni sureśvari //
teṣāṃ me vallabhaṃ devi prabhāsaṃ kṣetrameva ca

ityetatkathitaṃ devi rahasyaṃ pāpanāśanam //
kṣetrabījaṃ mahādevi kimanyatparipṛcchasi

idaṃ mahāpātakanāśanaṃ ye śroṣyaṃti vai kṣetramahāprabhāvam //
te cāpi yāsyanti mama prabhāvāttriviṣṭapaṃ puṇyajanādhivāsam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prabhāsakṣetramāhātmye devīpraśnavarṇanaṃ nāma tṛtīyo'dhyāyaḥ