Skanda Purana · Verses 7.3-4

// īśvara uvāca //
atha vastrāpathe kṣetre saṃti tīrthāni koṭiśaḥ//
tathāpi sāraṃ te vacmi sarvatīrthamahodayam

dāmodare nadī proktā svarṇareṣeti yā smṛtā //
brahmakuṇḍaṃ ca tatraiva tathā brahmeśvaraḥ smṛtaḥ

kālameghaśca saṃprokto bhavo dāmodaraḥ smṛtaḥ //
gavyūtidvitayenaiva kālikā tatra kīrtitā

indreśvaraśca tatraiva raivataḥ parvatastathā //
ujjayaṃtaśca tatraiva devaḥ kumbhīśvaraḥ smṛtaḥ

bhīmeśvaraśca tatraiva tataḥ kṣetraṃ mahāprabham //
tailasāraṇikaṃnāma tretāyāṃ haimamārakam

paṃcagavyūtimātraṃ tu tatkṣetraṃ saṃprakīrtitam //
mṛgīkuṇḍaṃ ca tatraiva sarvapātakanāśanam

etadvastrāpathaṃ kṣetraṃ ratnadhātvostathā''karam //
kathitaṃ tava deveśi punaḥ saṃkṣepato mayā

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe dvitīye vastrāpathakṣetramāhātmye pravaratīrthānukīrtananāma tṛtīyo'dhyāyaḥ