Skanda Purana · Chapter 7.259

// īśvara uvāca // //
tato gacchenmahādevi parṇādityaṃ sureśvaram //
prācīsarasvatīkūle taṭe cottarataḥ sthitam

purā tretāyuge devi parṇādonāma vai dvijaḥ //
prabhāsaṃ kṣetramāsādya tapastepe sudāruṇam //
ārādhayāmāsa raviṃ bhaktyā paramayā yutaḥ

tarpayitvā tataḥ sūryaṃ dhūpamālyavilepanaiḥ //
vedoktaiḥ stavanaiḥ sūktairdivārātraṃ samāhitaḥ

evaṃ ca dhyāyatastasya kālena mahatā tataḥ //
tutoṣa bhagavānsūryo vākyametaduvāca ha

parituṣṭo'smi viprendra tapasānena suvrata //
varaṃ varaya bhadraṃ te nityaṃ yanmanasepsitam

// brāhmaṇa uvāca // //
eṣa eva varaḥ kāmo yattuṣṭo bhagavānsvayam //
darśanaṃ tava deveśa svapneṣvapi ca durllabham

avaśyaṃ yadi dātavyo varo mama divākara //
atra saṃnihato deva sadā tvaṃ bhava bhāskara

tava prasādātte yāṃtu tava lokaṃ divā kara //
evaṃ bhaviṣyatītyuktvā hyantardhānaṃ gato raviḥ

parṇādo'pi sthitastatra tasyārādhanatatparaḥ //
tatra bhādrapade māse ṣaṣṭhyāṃ snānaṃ samācaret //
parṇādityaṃ tataḥ paśyenna sa duḥkhamavāpnuyāt

gośatasya prayāge tu samyagdattasya yatphalam //
tatphalaṃ labhate martyaḥ parṇādityasya darśanāt

ye sevaṃte mahākuṣṭhaṃ pāṃgulyaṃ ca vivarcikāḥ //
parṇādityaṃ na jānaṃti nūnaṃ te maṃdabuddhayaḥ

iti śrīskānde mahapurāṇa ekāśīti sāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye parṇādityamāhātmyavarṇanaṃnāmaikonaṣaṣṭyuttaradviśatatamo'dhyāyaḥ