Skanda Purana · Chapter 7.258

// // īśvara uvāca // //
tato gacchenmahādevi śaśāpānamiti smṛtam //
tasyaiva dakṣiṇe tīrthaṃ sarvapāpapraṇāśanam

yasminsnātvā naraḥ samyaṅnāpamṛtyubhayaṃ labhet //
śṛṇu yasmāttadutpattiṃ vadato mama vallabhe

mathitvā sāgaraṃ devā gṛhītvā'mṛtamuttamam //
satvarāstatra te gatvā papuścaiva yathepsayā

pibatāṃ tatra pīyūṣaṃ devānāṃ varavarṇini //
biṃdavaḥ patitā bhūmau śataśotha sahasraśaḥ

etasminneva kāle tu śaśakastatra cāgataḥ //
praviṣṭaḥ salile tatra tṛṣārto varavarṇini

amaratvamanuprāpto varddhate salilālaye //
taṃ dṛṣṭvā tridaśāḥ sarve sparddhamānā muhurmuhuḥ //
jñātvāmṛtānvitaṃ toyaṃ maṃtraṃ cakrurbhayānvitāḥ

amṛtaṃ patitaṃ bhūmau bhakṣayiṣyaṃti mānavāḥ //
tato'marttyā bhaviṣyaṃti nātra kāryā vicāraṇā

tiryagyonyāṃ samutpannaḥ kṛpaṇaḥ śaśako hyayam //
asmābhiḥ sparddhate tasmāttato bhayamupasthitam

atha prāpto niśānātho vyādhinā sa pariplutaḥ //
abravīttridaśānsarvānamṛtaṃ me prayacchata

kṛcchreṇa mahatā prāpto nāhaṃ śakto visarpitum //
athocustridaśāḥ sarve sarvamasmābhirbhakṣitam

vismṛtastvaṃ niśānātha cirātkasmādihāgataḥ //
kuruṣva vacanaṃ caṃdra asmākaṃ timirāpaha //

asmiñjale'mṛtaṃ bhūri patitaṃ pibatāṃ hi naḥ //
tatpibasva niśānātha sarvametajjalāśayam

arddhaṃ nipatitaṃ cātra satyametanniśāmaya //
teṣāṃ tadvacanaṃ śrutvā śītaraśmistvarānvitaḥ

tṛṣārto vā'pibattoyaṃ śaśakena samanvitam //
asthiśeṣaṃ tu tattasya kāyaṃ pīyūṣabhakṣaṇāt

tatkṣaṇātpuṣṭimagamatkāṃtyā paramayā yutaḥ //
dhātuṣu kṣīyamāṇeṣu puṣṭo hi sudhayā hi saḥ

sa cāpi śaśakastasya na mṛto jaṭharaṃ gataḥ //
adyāpi dṛśyate tatra dehe pīyūṣabhakṣaṇāt

tatkṣaṇāttuṣṭimagamatkāṃtyā paramayā yutaḥ //
abruvankhanyatāmetadyathā bhūyo jalaṃ bhavet //

asmākaṃ saṃgamādetacchuṣkaṃ śvabhraṃ jalāśayam //
tadyuktaṃ ca kṛtaṃ karma naitatsādhuviceṣṭitam

tato'khanaṃśca te sarve yāvattoyavinirgamaḥ //
athābruvaṃstataḥ sarve harṣeṇa mahatānvitāḥ

yasmācchaśena saṃyuktaṃ pītametajjalāśayam //
caṃdreṇa hi śaśāpānaṃ tasmādetadbhaviṣyati //

atrāgatya naraḥ snānaṃ yaḥ kariṣyati bhaktitaḥ //
sa yāsyati paraṃ sthānaṃ yatra devo maheśvaraḥ

atrānnaṃ saṃpradāsyaṃti brāhmaṇebhyaḥ samā hitāḥ //
sarvayajñaphalaṃ teṣāṃ bhaviṣyati na saṃśayaḥ

asmindṛṣṭe surāḥ sarve dṛṣṭāḥ syuḥ sarvadevatāḥ //
evamuktvā surāḥ sarve jagmuścaiva surālayam

atha kālena mahatā prāptā tatra sarasvatī //
vaḍavāgniṃ samādāya tayānuplāvitaṃ punaḥ

tato medhyataraṃ jātaṃ tīrthaṃ ca varavarṇini //
tasmātsarvaprayatnena tatra snānaṃ samācaret

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śaśāpānamāhātmyavarṇanaṃnāmāṣṭāpañcāśaduttaradviśatatamo'dhyāyaḥ