સ્કંદ પુરાણ · અધ્યાય 7.259

॥ ઈશ્વર ઉવાચ ॥ ॥
તતો ગચ્છેન્મહાદેવિ પર્ણાદિત્યં સુરેશ્વરમ્ ॥
પ્રાચીસરસ્વતીકૂલે તટે ચોત્તરતઃ સ્થિતમ્

પુરા ત્રેતાયુગે દેવિ પર્ણાદોનામ વૈ દ્વિજઃ ॥
પ્રભાસં ક્ષેત્રમાસાદ્ય તપસ્તેપે સુદારુણમ્ ॥
આરાધયામાસ રવિં ભક્ત્યા પરમયા યુતઃ

તર્પયિત્વા તતઃ સૂર્યં ધૂપમાલ્યવિલેપનૈઃ ॥
વેદોક્તૈઃ સ્તવનૈઃ સૂક્તૈર્દિવારાત્રં સમાહિતઃ

એવં ચ ધ્યાયતસ્તસ્ય કાલેન મહતા તતઃ ॥
તુતોષ ભગવાન્સૂર્યો વાક્યમેતદુવાચ હ

પરિતુષ્ટોઽસ્મિ વિપ્રેન્દ્ર તપસાનેન સુવ્રત ॥
વરં વરય ભદ્રં તે નિત્યં યન્મનસેપ્સિતમ્

॥ બ્રાહ્મણ ઉવાચ ॥ ॥
એષ એવ વરઃ કામો યત્તુષ્ટો ભગવાન્સ્વયમ્ ॥
દર્શનં તવ દેવેશ સ્વપ્નેષ્વપિ ચ દુર્લ્લભમ્

અવશ્યં યદિ દાતવ્યો વરો મમ દિવાકર ॥
અત્ર સંનિહતો દેવ સદા ત્વં ભવ ભાસ્કર

તવ પ્રસાદાત્તે યાંતુ તવ લોકં દિવા કર ॥
એવં ભવિષ્યતીત્યુક્ત્વા હ્યન્તર્ધાનં ગતો રવિઃ

પર્ણાદોઽપિ સ્થિતસ્તત્ર તસ્યારાધનતત્પરઃ ॥
તત્ર ભાદ્રપદે માસે ષષ્ઠ્યાં સ્નાનં સમાચરેત્ ॥
પર્ણાદિત્યં તતઃ પશ્યેન્ન સ દુઃખમવાપ્નુયાત્

ગોશતસ્ય પ્રયાગે તુ સમ્યગ્દત્તસ્ય યત્ફલમ્ ॥
તત્ફલં લભતે મર્ત્યઃ પર્ણાદિત્યસ્ય દર્શનાત્

યે સેવંતે મહાકુષ્ઠં પાંગુલ્યં ચ વિવર્ચિકાઃ ॥
પર્ણાદિત્યં ન જાનંતિ નૂનં તે મંદબુદ્ધયઃ

ઇતિ શ્રીસ્કાન્દે મહપુરાણ એકાશીતિ સાહસ્ર્યાં સંહિતાયાં સપ્તમે પ્રભાસખંડે પ્રથમે પ્રભાસક્ષેત્રમાહાત્મ્યે પર્ણાદિત્યમાહાત્મ્યવર્ણનંનામૈકોનષષ્ટ્યુત્તરદ્વિશતતમોઽધ્યાયઃ