Skanda Purana · Chapter 7.260

// īśvara uvāca // //
tato gacchenmahādevi devaṃ siddheśvaraṃ param //
tasyaiva paścime bhāge siddhaiḥ saṃsthāpitaṃ purā

siddhā nāma surāḥ pūrvaṃ tatrāgatya varānane //
liṃgaṃ saṃsthāpayāmāsuḥ siddhyarthaṃ sarvavastuṣu

tatastuṣṭo mahādevi teṣāṃ dṛṣṭvā tapo mahat //
aṇimādikamaiśvaryaṃ teṣāṃ sarvaṃ dadau śivaḥ

abravīdatra me nityaṃ sānidhyaṃ ca bhaviṣyati

caitre śuklacaturddaśyāṃ yo'tra māṃ pūjayiṣyati //
sa yāsyati paraṃ sthānaṃ prasādānmama puṇyakṛt

evamuktvā'tha bhagavāñjagāmādarśanaṃ tataḥ //
siddhāścaiva tadā''gatya pūjayaṃti maheśvaram

yastamārādhayedbhaktyā saṃsiddhiṃ labhate'dbhutām//
īpsitāṃ ca suraśreṣṭhe tasmāttaṃ pūjayetsadā

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye siddheśvaramāhātmyavarṇanaṃnāma ṣaṣṭyuttaradviśatatamo'dhyāyaḥ