સ્કંદ પુરાણ · અધ્યાય 7.258

॥ ॥ ઈશ્વર ઉવાચ ॥ ॥
તતો ગચ્છેન્મહાદેવિ શશાપાનમિતિ સ્મૃતમ્ ॥
તસ્યૈવ દક્ષિણે તીર્થં સર્વપાપપ્રણાશનમ્

યસ્મિન્સ્નાત્વા નરઃ સમ્યઙ્નાપમૃત્યુભયં લભેત્ ॥
શૃણુ યસ્માત્તદુત્પત્તિં વદતો મમ વલ્લભે

મથિત્વા સાગરં દેવા ગૃહીત્વાઽમૃતમુત્તમમ્ ॥
સત્વરાસ્તત્ર તે ગત્વા પપુશ્ચૈવ યથેપ્સયા

પિબતાં તત્ર પીયૂષં દેવાનાં વરવર્ણિનિ ॥
બિંદવઃ પતિતા ભૂમૌ શતશોથ સહસ્રશઃ

એતસ્મિન્નેવ કાલે તુ શશકસ્તત્ર ચાગતઃ ॥
પ્રવિષ્ટઃ સલિલે તત્ર તૃષાર્તો વરવર્ણિનિ

અમરત્વમનુપ્રાપ્તો વર્દ્ધતે સલિલાલયે ॥
તં દૃષ્ટ્વા ત્રિદશાઃ સર્વે સ્પર્દ્ધમાના મુહુર્મુહુઃ ॥
જ્ઞાત્વામૃતાન્વિતં તોયં મંત્રં ચક્રુર્ભયાન્વિતાઃ

અમૃતં પતિતં ભૂમૌ ભક્ષયિષ્યંતિ માનવાઃ ॥
તતોઽમર્ત્ત્યા ભવિષ્યંતિ નાત્ર કાર્યા વિચારણા

તિર્યગ્યોન્યાં સમુત્પન્નઃ કૃપણઃ શશકો હ્યયમ્ ॥
અસ્માભિઃ સ્પર્દ્ધતે તસ્માત્તતો ભયમુપસ્થિતમ્

અથ પ્રાપ્તો નિશાનાથો વ્યાધિના સ પરિપ્લુતઃ ॥
અબ્રવીત્ત્રિદશાન્સર્વાનમૃતં મે પ્રયચ્છત

કૃચ્છ્રેણ મહતા પ્રાપ્તો નાહં શક્તો વિસર્પિતુમ્ ॥
અથોચુસ્ત્રિદશાઃ સર્વે સર્વમસ્માભિર્ભક્ષિતમ્

વિસ્મૃતસ્ત્વં નિશાનાથ ચિરાત્કસ્માદિહાગતઃ ॥
કુરુષ્વ વચનં ચંદ્ર અસ્માકં તિમિરાપહ ॥

અસ્મિઞ્જલેઽમૃતં ભૂરિ પતિતં પિબતાં હિ નઃ ॥
તત્પિબસ્વ નિશાનાથ સર્વમેતજ્જલાશયમ્

અર્દ્ધં નિપતિતં ચાત્ર સત્યમેતન્નિશામય ॥
તેષાં તદ્વચનં શ્રુત્વા શીતરશ્મિસ્ત્વરાન્વિતઃ

તૃષાર્તો વાઽપિબત્તોયં શશકેન સમન્વિતમ્ ॥
અસ્થિશેષં તુ તત્તસ્ય કાયં પીયૂષભક્ષણાત્

તત્ક્ષણાત્પુષ્ટિમગમત્કાંત્યા પરમયા યુતઃ ॥
ધાતુષુ ક્ષીયમાણેષુ પુષ્ટો હિ સુધયા હિ સઃ

સ ચાપિ શશકસ્તસ્ય ન મૃતો જઠરં ગતઃ ॥
અદ્યાપિ દૃશ્યતે તત્ર દેહે પીયૂષભક્ષણાત્

તત્ક્ષણાત્તુષ્ટિમગમત્કાંત્યા પરમયા યુતઃ ॥
અબ્રુવન્ખન્યતામેતદ્યથા ભૂયો જલં ભવેત્ ॥

અસ્માકં સંગમાદેતચ્છુષ્કં શ્વભ્રં જલાશયમ્ ॥
તદ્યુક્તં ચ કૃતં કર્મ નૈતત્સાધુવિચેષ્ટિતમ્

તતોઽખનંશ્ચ તે સર્વે યાવત્તોયવિનિર્ગમઃ ॥
અથાબ્રુવંસ્તતઃ સર્વે હર્ષેણ મહતાન્વિતાઃ

યસ્માચ્છશેન સંયુક્તં પીતમેતજ્જલાશયમ્ ॥
ચંદ્રેણ હિ શશાપાનં તસ્માદેતદ્ભવિષ્યતિ ॥

અત્રાગત્ય નરઃ સ્નાનં યઃ કરિષ્યતિ ભક્તિતઃ ॥
સ યાસ્યતિ પરં સ્થાનં યત્ર દેવો મહેશ્વરઃ

અત્રાન્નં સંપ્રદાસ્યંતિ બ્રાહ્મણેભ્યઃ સમા હિતાઃ ॥
સર્વયજ્ઞફલં તેષાં ભવિષ્યતિ ન સંશયઃ

અસ્મિન્દૃષ્ટે સુરાઃ સર્વે દૃષ્ટાઃ સ્યુઃ સર્વદેવતાઃ ॥
એવમુક્ત્વા સુરાઃ સર્વે જગ્મુશ્ચૈવ સુરાલયમ્

અથ કાલેન મહતા પ્રાપ્તા તત્ર સરસ્વતી ॥
વડવાગ્નિં સમાદાય તયાનુપ્લાવિતં પુનઃ

તતો મેધ્યતરં જાતં તીર્થં ચ વરવર્ણિનિ ॥
તસ્માત્સર્વપ્રયત્નેન તત્ર સ્નાનં સમાચરેત્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે શશાપાનમાહાત્મ્યવર્ણનંનામાષ્ટાપઞ્ચાશદુત્તરદ્વિશતતમોઽધ્યાયઃ