Skanda Purana · Chapter 7.24

// pulastya uvāca // //
tato gacchennṛpaśreṣṭha guhāmadhyanivāsinī //
devī kātyāyanī yatra śuṃbhadānavanāśinī

śuṃbhonāma mahādaityaḥ purā''sītpṛthivītale //
tena sarvaṃ jagadvyāptaṃ jitvā devānraṇājire

sa śaṃkaravarāddaityo devadānavarakṣasām//
avadhyo yoṣitaṃ muktvā sarveṣāṃ prāṇināṃ bhuvi

tato devagaṇāḥ sarve gatvā'rbudamathācalam //
tapastepurvadhārthāya śuṃbhasya jagatīpate //
devīmārādhayāmāsurvyaktarūpāṃ sureśvarīm

atha teṣāṃ prasannā sā dṛṣṭigocaramāgatā //
abravīdvaradāsmīti brūta kiṃ karavāṇi ca

// devā ūcuḥ // //
sarvaṃ no'pahṛtaṃ devi śuṃbhena sudurātmanā //
taṃ niṣūdaya kalyāṇi sovadhyonyaiḥ sadā raṇe

tvayā saṃrakṣitā devi purā bāṣkalito vayam

nānyā'smākaṃ gatirmātastvāṃ muktvā cāruhāsinīm //
// pulastya uvāca // //
evamuktā surairdevī gatvā śuṃbhaniketanam//
ājuhāva raṇe kruddhā bhartsayitvā muhurmuhuḥ

sa tayā yācite yuddhe jñātvā tāṃ yoṣitaṃ nṛpa //
avajñāya tato daityaḥ preṣayāmāsa dānavān

jīvagrāheṇa duṣṭeyaṃ gṛhyatāṃ paruṣasvanā //
kriyatāṃ dāruṇo daṃḍo mama vākyānna saṃśayaḥ

atha tasya samādeśāddānavāstāṃ tato drutam //
gatvā nirbhartsayāmāsurveṣṭayitvā diśo daśa

tato'valokanāddaityāstayā te bhasmasātkṛtāḥ //
tataḥ śuṃbhaḥ prakupitaḥ svayameva samāyayau

abravīttiṣṭhatiṣṭheti khaṅgamudyamya bhīṣaṇaḥ //
so'pidevyā mahārāja tathā caivāvalokitaḥ

abhavadbhasmasātsadyaḥ pataṃga iva pāvakam//
hate tasmiṃstato daityāḥ śeṣāḥ pārthivasattama//
bhittvā rasātalaṃ jagmuḥ pātālaṃ bhayasaṃyutāḥ

tato devagaṇāḥ sarve tuṣṭuvustāṃ sureśvarīm//
abruvaṃśca varaṃ brūhi yatte manasi varttate

devyuvāca // //
tatraiva parvate sthāsye hyarbude'haṃ surottamāḥ //
abhīṣṭaḥ parvato'smākaṃ saṃ sadā'rbudasaṃjñitaḥ

// devā ūcuḥ // //
tatrasthāṃ tvāṃ samālokya marttyā yāṃti triviṣṭapam //
vinā yajñaistathā dānaiḥ svargaḥ saṃkīrṇatāṃ gataḥ//
nānyatkāraṇamastīha niṣedhasya sureśvari

// devyuvāca // //
tatrāhaṃ vijane ramye guhāmadhye sureśvarāḥ //
sthāsyāmi viralāḥ kecidyāsyaṃti prāṇino mama //
dṛṣṭigocaramārge hi gatvā taṃ parvataṃ prati

// devā ūcuḥ // //
yadyevaṃ devi te'bhīṣṭamevaṃ kuru śucismite //
vayaṃ tvāṃ tatra drakṣyāmaḥ śuklāṣṭamyāṃ sadā śuceḥ

// pulastya uvāca // //
evamuktāḥ surā devyā prahṛṣṭāstridivaṃ yayuḥ //
sāpi devī girau tatra gatvā caivārbude nṛpa

guhāmadhyaṃ samāsādya nityaṃ jagaddhitāya vai //
vivikte nyavasatprītā durllabhā suramānavaiḥ

yastāṃ paśyati rājendra śuklāṣṭamyāṃ samāhitaḥ //
abhīṣṭaṃ sa sadāpnoti yadyapi syātsudurllabham

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe kātyāyanīmāhātmyavarṇanaṃnāma caturviṃśo'dhyāyaḥ