Skanda Purana · Chapter 7.235

// īśvara uvāca // //
tatraiva saṃsthitaṃ paśyelliṃgatrayamanuttamam //
śatamedhaṃ sahasramedhaṃ koṭimedhamiti kramāt

dakṣiṇe śatamedhaṃ tu śatayajñaphalapradam //
kārtavīryyeṇa tatraiva kṛtaṃ yajñaśataṃ purā

pratiṣṭhāpya mahāliṃgaṃ sarvapātakanāśanam //
madhyabhāge'tra yalliṃgaṃ koṭimedheti viśrutam

tatreṣṭā brahmaṇā pūrvaṃ koṭi saṃkhyā makhottamāḥ //
saṃsthāpya tu mahādevaṃ śaṃkaraṃ lokaśaṃkarama

tasya uttarabhāgasthaṃ sahasrakratusaṃjñakam //
śakraśca devarājo'pi sahasraṃ yaṣṭavānkratūn

pratiṣṭhāpya mahāliṃgaṃ devānāmādidaivatam //
gaṃdhapuṣpādividhinā paṃcāmṛtarasodakaiḥ

sa prāpnuyātphalaṃ devi liṃganāmodbhavaṃ kramāt //
godānaṃ tatra deyaṃ tu samyagyātrāphalepsubhiḥ

daśalakṣāṇi tīrthānāṃ tatra tiṣṭhaṃti bhāmini //
liṃgatrayaṃ tathā madhye sarvapātakanāśanam //

iti śrīskānde mahāpurāṇa ekāśītisāhasryāṃ sahitāyāṃ saptame prabhāsa khaṇḍe prathame prabhāsakṣetramāhātmye daśāśvamedhamāhātmye śatamedhādi liṃgatrayamāhātmyavarṇanaṃnāma pañcatriṃśaduttaradviśatatamo'dhyāyaḥ