Skanda Purana · Chapter 7.236

tato gacchenmahādevi durvāsādityamuttamam //
yatra durvāsasā taptaṃ tapo varṣasahasrakam //
nirāhāro jitāhāraḥ sūryārādhanatatparaḥ

evaṃ kālena mahatā divyatejā janādhipaḥ //
pratyakṣaṃ darśanaṃ gatvā prāha sūryo mahāmunim

// sūrya uvāca // //
mā brahmansāhasaṃ kārṣīrvaraṃ varaya suvrata //
aprāpyamapi dāsyāmi yatte manasi vartate

//
// durvāsā uvāca // //
prasanno yadi me deva varārho yadi cā'pyaham //
atra sthāne tvayā stheyaṃ yāvattiṣṭhati medinī

durvāsādityanā mā'tra loke khyātiṃ ca gacchatu //
mayā pratiṣṭhitā yā tu pratimā tava sundarī

tasyāṃ sāṃnidhyamevāstu tava deva jagatpate //
sāṃnidhyaṃ kuruta cātra yamunā duhitā tava //
tvatsutastu mahātejā dharmarājo mahābalaḥ

// sūrya uvāca // //
etatsarvaṃ muniśreṣṭha tvayoktaṃ saṃbhaviṣyati //
tīrthānāṃ koṭiranyā ca gaṃgādīnāṃ mahāmune

āgamiṣyati te sthānaṃ niścitaṃ vacanānmama //
atra sthāne mayā brahmansthātavyaṃ saha daivataiḥ

ādityānāṃ prabhāvaistu brahmāṃḍodaravāsinām//
teṣāṃ māhātmyasaṃyuktaḥ sthāsye cātra mahāmune

savitṝṇāṃ sahasreṇa dṛṣṭenaiva tu yatphalam //
tatphalaṃ koṭiguṇitaṃ durvāsādityadarśanāt

lapsyaṃte prāṇinaḥ sarve yajñakoṭiphalaṃ tathā //
evamuktvā tadā sūryaḥ sasmāra tanayāṃ nijām //
tathā ca dharmerājānaṃ sarvaprāṇiniyāmakam

smṛtamātrā tatra bhittvā pātālatalamudyayau //
sā nadīrūpiṇī devī tīrthakoṭisamanvitā

yamaśca tatra bhagavānkāladaṃḍadharastadā //
ūcatuḥ praṇayopetau sūryaṃ bhuvanasākṣiṇam

// yama uvāca // //
ājñāpayatu māṃ devo yamunāṃ ca jagatprabhuḥ //
kāryaṃ yadbhāvino'rthasya tatkariṣye na saṃśayaḥ

// sūta uvāca // //
atra kṣetre svarūpeṇa sthātavyaṃ vacanānmama //
pāpināṃ prāṇināṃ cātra rakṣā kāryā prayatnataḥ

sūryabhaktāḥ sadā rakṣyā brāhmaṇā gṛhamedhinaḥ //
tvaṃ cāpi yamune cātra koṭitīrthena saṃyutā

vasa tvaṃ bhava suprītā sthāne durvāsasodbhave //
ityevamuktvā deveśastatra durvāsasoṃ'tike

paśyatāṃ sarvadevānāmaṃtarddhānamagātprabhuḥ //
durvāsāstu tadā hṛṣṭo yāvatpaśyati svāśramam

tāvatpātālamārgeṇa yamunā prādurābhavat //
yamaśca bhagavāṃstatra dṛṣṭaḥ kṣetraparūpadhṛk

// īśvara uvāca // //
itthaṃ samabhavattatra yamunodbhedamuttamam//
kuṇḍamādityato yāmye duṃdubhistatra pūrvataḥ

kṣetrapālo mahādevi yato duṃdubhiniḥsvanaḥ //
tatra snātvā mahākuṇḍe yaḥ saṃtarpayate pitṝn

daśa varṣāṇi pañcaiva tṛptiṃ yāṃti pitāmahaḥ //
piṃḍadānena dattena pitṝṇāṃ tuṣṭimāvahet //
narake tu sthitānāṃ ca muktirbhūyānna saṃśayaḥ

māghe māsi site pakṣe saptamyāṃ saṃyatātmavān //
durvāsārkaṃ ca saṃpūjya mucyate brahmahatyayā

snātvā tu yamunā kuṇḍe mādhave māsi mānavaḥ //
pūjayedbhaktibhāvena raviṃ gaganabhūṣaṇam

paṭhetsahasraṃ nāmnā tu durvāsādityasaṃnidhau //
ṣaṇmāsānmucyate jaṃturyadyapi brahmahā naraḥ

sarvamaṃgalamāṃgalyaṃ sarvapāpapraṇāśanam //
durvāsādityanāmānaṃ sūryaṃ ko nu na pūjayet

na tadasti bhayaṃ kiṃcidyadanena na śāmyati //
darśanenāpi sūryasya tatra durvāsasaḥ priye

saṃpadyaṃte tathā kāmāḥ sarva eva yathepsitāḥ //
baṃdhyānāṃ putraphaladaṃ bhītānāṃ bhayanāśanam

bhūtipradaṃ daridrāṇāṃ kuṣṭhināṃ paramauṣadham //
bālānāṃ caiva sarveṣāṃ graharakṣonivāraṇam //
mahāpāpopaśamanaṃ durvāsādityadarśanam

hemāśvastatra dātavyaḥ sūryamuddiśya bhāmini //
brāhmaṇe vedasaṃyukte tena dattā mahī bhavet

yastatra pūjayeddevaṃ kṣetrapālaṃ ca dundubhim //
sa putrapaśumāndhīmāñchrīmānbhavati mānavaḥ

na bhayaṃ jāyate tasya trividhaṃ varavarṇini //
ardhagavyūtimātraṃ tu tatra kṣetraṃ raveḥ smṛtam

na tatra praviśejjantuḥ sūryabhaktivivarjitaḥ //
ityetatkathitaṃ devi māhātmyaṃ sūryadaivatam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye durvāsādityamāhātmyavarṇanaṃnāma ṣaṭtriṃśaduttaradviśatatamo'dhyāyaḥ //