Skanda Purana · Chapter 7.234

// īśvara uvāca // //
tato gacchenmahādevi tīrthaṃ trailokyaviśrutam //
daśāśvamedhikaṃnāma mahāpātakanāśanam

vājimedhaḥ purā ceṣṭaṃ daśabhistatra bhāmini //
bharatena samāgatya matvā kṣetramanuttamam

tatra tṛptaḥ sahasrākṣaḥ somanāthena bhāmini //
kṛpaṇāḥ khānapānaiśca dakṣiṇābhirdvijātayaḥ

athocustridaśāḥ sarve suprītā bharataṃ nṛpam //
tuṣṭāstava mahābāho yajñaiḥ saṃtarpitā vayam //
varaṃ vṛṇīṣva rājeṃdra yatte manasi varttate // ४. //
// rājovāca // //
atrāgatya naro bhaktyā yaḥ snānaṃ kurute naraḥ //
daśānāmaśvamedhānāṃ sa prāpnotu phalaṃ śubham //. ५ //
// devā ūcuḥ // //
daśānāmaśvamedhānāṃ śraddhayā phalamāpsyati //
daśāśvamedhikaṃnāma tīrthametanmahītale //
khyātiṃ yāsyati rājeṃdra nātra kāryā vicāraṇā

// īśvara uvāca // //
tataḥ prabhṛti tattīrthaṃ prakhyātaṃ dharaṇītale //
daśāśvamedhikamiti sarvapāpapraṇāśanam

aiṃdravāruṇamāśritya gomukhādā''śvamedhikam //
atrāṃtare mahādevi śivakṣetraṃ vidurbudhāḥ

sarvapāpaharaṃ divyaṃ svargasopānasaṃnibham //
sapādakoṭitīrthānāṃ sthānaṃ tatparikīrtitama

prāṇatyāge kṛte tatra śivaloke ca modate //
tiryagyonigatāḥ pāpā kīṭapakṣimṛgādayaḥ

te'pi yāṃti paraṃ sthānaṃ yatra devo maheśvaraḥ //
tilodakapradānena mātṛkāḥ paitṛkāstathā

pitarastasya tṛpyaṃti yāvadābhūtasaṃplavam //
tatreṣṭā brahmaṇā pūrvamasaṃkhyātā makhottamāḥ

śakraśca devarājatve tatreṣṭvā samavāptavān //
kārttavīryeṇa tatraiva kṛtaṃ yajñaśataṃ purā

evaṃ tatpravaraṃ sthānaṃ kṣetragarbhāṃtikaṃ priye //
mṛtānāṃ tatra jaṃtūnāmapunarbhavadāyakam

vṛṣotsargaṃ tu yastatra kuryādvai bhāvitātmavān //
yāvaṃti vṛṣaromāṇi tāvatsvarge mahīyate

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetra māhātmye daśāśvamedhamāhatmyavarṇanaṃnāma catustriṃśaduttaradviśatatamo'dhyāyaḥ