Skanda Purana · Chapter 7.134

// īśvara uvāca // //
tato gacchenmahādevi puṣkarāvartakāṃ nadīm //
brahmakuṃḍāduttarato nātidūre vyavasthitām

purā yajñe vartamāne somasya tu mahātmanaḥ //
brahmā suragaṇaiḥ sārdhaṃ prabhāsaṃ kṣetramāgataḥ

somanāthapratiṣṭhārthamṛkṣarājanimaṃtritaḥ //
pratijñātaṃ purā tena brahmaṇā lokakāriṇā

yāvatsthāsyāmyahaṃ martye kasmiṃścitkāraṇāṃtare //
tāvatsaṃdhyātrayaṃ vaṃdyaṃ nityameva tripuṣkare

etasminneva kāle tu lagnakāla upasthite //
ādiṣṭaṃ śobhanaṃ kālaṃ brāhmaṇairdaivacintakaiḥ

tatastaṃ prasthitaṃ jñātvā puṣkare tu pitāmaham //
saṃdhyārthaṃ rātrinātho vai vākyametaduvāca ha

/
daivajñaiḥ kalitaḥ kāla eṣa eva śubhodayaḥ //
yathā kālātyayo na syāttathā nītirvidhīyatām

taṃ jñātvā sāṃprataṃ kālaṃ brahmā lokapitāmahaḥ //
manasā cintayāmāsa puṣkarāṇi samāhitaḥ

tāni vai smṛtamātrāṇi brahmaṇā varavarṇini //
prādurbhūtāni tatraiva nadyāstīre suśobhane

āvartāstatra sañjātā jyeṣṭhamadhyakanīyasaḥ //
atha nāmākarottasyā brahmā lokapitāmahaḥ

puṣkarāvartakā nāmnā adyaprabhṛti śobhanā //
nadī prayāsyate loke khyātiṃ mama prasādataḥ

atra snātvā naro bhaktyā tarpayiṣyati yaḥ pitṝn //
tripuṣkarasamaṃ puṇyaṃ lapsyate sa tathepsitam

śrāvaṇe śuklapakṣasya tṛtīyāyāṃ narottamaḥ //
yaḥ pitṝṃstarpayettatra tṛptiḥ kalpāyutaṃ bhavet

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye puṣkarāvartakānadīmāhātmyavarṇanaṃnāma catustriṃśaduttaraśatatamo'dhyāyaḥ