Skanda Purana · Chapter 7.133

// īśvara uvāca // //
tatraiva saṃsthitā devi mahākālīti viśrutā //
adhaḥ sthite mahāpīṭhe pātālavivarānvite

sarvaduḥkhapraśamanī sarvaśatrukṣayaṃkarī //
pūjanīyā vidhānena kṛṣṇāṣṭamyāṃ mahāniśi //
gandhaiḥ puṣpaistathā dhūpaiḥ kravyairbalibhireva ca

phalatṛtīyāṃ nārī ca kuryādvai tatra bhāvitā //
varṣamekaṃ site pakṣe devīṃ pūjya vidhānataḥ //
phalāni brāhmaṇe deyānyeva nūnaṃ vidhānataḥ

etāni varjayennakte hyannāni surasundari //
niṣpāvā āḍhakī mudgā māṣāścaiva kulitthakāḥ

masūrā rājamāṣāśca godhūmāstripuṭāstathā //
caṇakā vartalā vāpi makuṣṭhāścaivamādayaḥ

na bhakṣyāstāvatte devi yāvadgaurīvrataṃ caret //
tasyāḥ puṇyaphalaṃ vakṣye kathyamānaṃ śṛṇuṣva me

dhanaṃ dhānyaṃ gṛhe tasyā na kadācitkṣayaṃ vrajet //
duḥkhitā durbhagā dīnā sapta janmāni no bhavet

mahākālīvrataṃ proktaṃ devyā māhātmyasaṃyutam //
kṛtaṃ pātakanāśāya sarvakāmasamṛddhaye

evaṃ devi samākhyātaṃ mahākālīmahodayam //
kṣetrapīṭhaṃ mahādevi mantrasiddhipradāyakam

āśvayukchuklapakṣe tu navamyāṃ tatra jāgṛyāt //
pīṭhe pūjābaliṃ dattvā mantraṃ kāmaṃ japanniśi //
saumyacittaḥ samāpnoti vāṃchitāṃ siddhimuttamām

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye mahākālīmāhātmyavarṇanaṃnāma trayastriṃśaduttaraśatatamo'dhyāyaḥ