સ્કંદ પુરાણ · અધ્યાય 7.133

॥ ઈશ્વર ઉવાચ ॥ ॥
તત્રૈવ સંસ્થિતા દેવિ મહાકાલીતિ વિશ્રુતા ॥
અધઃ સ્થિતે મહાપીઠે પાતાલવિવરાન્વિતે

સર્વદુઃખપ્રશમની સર્વશત્રુક્ષયંકરી ॥
પૂજનીયા વિધાનેન કૃષ્ણાષ્ટમ્યાં મહાનિશિ ॥
ગન્ધૈઃ પુષ્પૈસ્તથા ધૂપૈઃ ક્રવ્યૈર્બલિભિરેવ ચ

ફલતૃતીયાં નારી ચ કુર્યાદ્વૈ તત્ર ભાવિતા ॥
વર્ષમેકં સિતે પક્ષે દેવીં પૂજ્ય વિધાનતઃ ॥
ફલાનિ બ્રાહ્મણે દેયાન્યેવ નૂનં વિધાનતઃ

એતાનિ વર્જયેન્નક્તે હ્યન્નાનિ સુરસુન્દરિ ॥
નિષ્પાવા આઢકી મુદ્ગા માષાશ્ચૈવ કુલિત્થકાઃ

મસૂરા રાજમાષાશ્ચ ગોધૂમાસ્ત્રિપુટાસ્તથા ॥
ચણકા વર્તલા વાપિ મકુષ્ઠાશ્ચૈવમાદયઃ

ન ભક્ષ્યાસ્તાવત્તે દેવિ યાવદ્ગૌરીવ્રતં ચરેત્ ॥
તસ્યાઃ પુણ્યફલં વક્ષ્યે કથ્યમાનં શૃણુષ્વ મે

ધનં ધાન્યં ગૃહે તસ્યા ન કદાચિત્ક્ષયં વ્રજેત્ ॥
દુઃખિતા દુર્ભગા દીના સપ્ત જન્માનિ નો ભવેત્

મહાકાલીવ્રતં પ્રોક્તં દેવ્યા માહાત્મ્યસંયુતમ્ ॥
કૃતં પાતકનાશાય સર્વકામસમૃદ્ધયે

એવં દેવિ સમાખ્યાતં મહાકાલીમહોદયમ્ ॥
ક્ષેત્રપીઠં મહાદેવિ મન્ત્રસિદ્ધિપ્રદાયકમ્

આશ્વયુક્છુક્લપક્ષે તુ નવમ્યાં તત્ર જાગૃયાત્ ॥
પીઠે પૂજાબલિં દત્ત્વા મન્ત્રં કામં જપન્નિશિ ॥
સૌમ્યચિત્તઃ સમાપ્નોતિ વાંછિતાં સિદ્ધિમુત્તમામ્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે મહાકાલીમાહાત્મ્યવર્ણનંનામ ત્રયસ્ત્રિંશદુત્તરશતતમોઽધ્યાયઃ