Skanda Purana · Chapter 7.127

// īśvara uvāca // //
tato gacchenmahādevi kṣemeśvaramanuttamam //
tasmāduttarakoṇasthaṃ kapāleśāgnigocare

dhanuṣāṃ paṃcadaśake kapāleśvarataḥ sthitam //
liṃgaṃ mahāprabhāvaṃ hi sarvapātakanāśanam

kṣemamūrtiḥ purā rājā babhūva sa mahābalaḥ //
tena tatra tapastaptaṃ cirakālaṃ mahātmanā //

tataḥ saṃsthāpitaṃ liṃgaṃ bhaktyā bhāvitacetasā //
taddṛṣṭvā kṣemamāyāti kāryaṃ kṣemeṇa siddhyati

sarvakāmasamṛddhātmā bhūyā jjanmanijanmani //
evaṃ kṣemeśvaraṃ liṃgaṃ khyātaṃ pātakanāśanam

sarvakāmapradaṃ nṛṇāṃ śrutaṃ saubhāgyadāyakam //
darśanenāpi tasyāpi gośatasya phalaṃ smṛtam

tasmātkṣetraphalākāṃkṣī nityaṃ talliṃgamāśrayet

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye kṣemaṃkareśvaramāhātmyavarṇanaṃnāma saptaviṃśatyuttaraśatatamo'dhyāyaḥ