Skanda Purana · Chapter 7.128

// īśvara uvāca //
tato gacchenmahādevi sāgarādityamuttamam //
bhairaveśātpaścimato rudrānmṛtyuñjayāttathā

kāmeśāddakṣiṇāgneye nātidūre vyavasthitam //
sarva rogapraśamanaṃ dāridryaughavighātakam //
pratiṣṭhitaṃ mahādevi sagareṇa mahātmanā

ṣaṣṭiputrasahasrāṇi yaḥ prāpārātisūdanaḥ //
sūryaṃ tatra samārādhya sagaraḥ pṛthivīpatiḥ

ya eṣa sāgaro devi yojanāyatavistaraḥ //
āyato'śītisāhasraṃ yojanānāṃ prakīrtitaḥ

asminmanvantare kṣiptaḥ sāgaraiśca caturdiśam //
tasyedaṃ kīrtitaṃ devi nāma sāgarasaṃjñitam

yasyādyāpīha gāyanti purāṇe prathitaṃ yaśaḥ //
tenāyaṃ sthāpito devo bhāskaro vāritaskaraḥ

taṃ dṛṣṭvā na jaḍo nāndho na daridro na duḥkhitaḥ //
na caiveṣṭaviyogī syānna rogī naiva pāpakṛt

māghe māsi mahādevi site pakṣe jitendriyaḥ //
ṣaṣṭhyāmupoṣito bhūtvā rātrau tasyāgrataḥ svapet

vibuddhastvatha saptamyāṃ bhaktyā bhānuṃ samarcayet //
brāhmaṇānbhojayedbhaktyā vittaśāṭhyaṃ vivarjayet

sutapteneha tapasā yajñairvā bahudakṣiṇaiḥ //
tāṃ gatiṃ na narā yānti yāṃ gatāḥ sūryamāśritāḥ

bhaktyā tu puruṣaiḥ pūjā kṛtā dūrvāṃkurairapi //
bhānurdadāti hi phalaṃ sarvayajñaiḥ sudurlabham

tasmātsarvaprayatnena sūryamevābhipūjayet //
janakādayo yathā siddhiṃ gatā bhānuṃ prapūjya ca

sarvātmā sarvalokeśo devadevaḥ prajāpatiḥ //
sūrya eva trilokasya mūlaṃ paramadaivatam

vasante kapilaḥ sūryo grīṣme kāñcanasaprabhaḥ //
śvetavarṇaśca varṣāsu pāṃḍuḥ śaradi bhāskaraḥ

hemante tāmravarṇastu śiśire lohito raviḥ //
evaṃ varṇaviśeṣeṇa dhyāyetsūryaṃ yathākramam

pūjayitvā vidhānena yatātmā saṃyatendriyaḥ //
paṭhennāmasahasraṃ tu sarvapātakanāśanam //

// devyuvāca // //
nāmnāṃ sahasraṃ me brūhi prasādāñchaṃkara prabho //
tulyaṃ nāmasahasrasya kimapyanyatprakīrtaya

// // īśvara uvāca // //
alaṃ nāmasahasreṇa paṭhasvaivaṃ śubhaṃ stavam //
yāni guhyāni nāmāni pavitrāṇi śubhāni ca //
tāni te kīrtayiṣyāmi prayatnādavadhāraya

vikartano vivasvāṃśca mārtaṇḍo bhāskaro raviḥ //
lokaprakāśakaḥ śrīmām̐llokacakṣurgraheśvaraḥ

lokasākṣī trilokeśaḥ karttā harttā tamisrahā //
tapanastāpanaścaiva śuciḥ saptāśvavāhanaḥ

gabhastihasto brahmā ca sarvadevanamaskṛtaḥ //
ekaviṃśatirityeṣa stava iṣṭo mahātmanaḥ

śarīrārogyadaścaiva dhanavṛddhiyaśaskaraḥ //
stavarāja iti khyātastriṣu lokeṣu viśrutaḥ //

yaścānena mahādevi dve saṃdhye'stamanodaye //
stautyarkaṃ prayato bhūtvā sarvapāpaiḥ pramucyate //
sarvakāmasamṛddhātmā sūryalokaṃ sa gacchati

ityevaṃ kathitaṃ devi māhātmyaṃ sāgarārkajam //
śrutaṃ duḥkhaughaśamanaṃ mahāpātakanāśanam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye sāgarādityamāhātmyavarṇanaṃnāmāṣṭāviṃśatyuttaraśatatamo'dhyāyaḥ //