Skanda Purana · Chapter 7.126

// īśvara uvāca // //
tato gacchenmahādevi śāṃḍilyeśvaramuttamam //
brahmaṇaḥ paścime bhāge dhanuṣāṃ ṣoḍaśāṃtare

mahāprabhāvaṃ liṅgaṃ taddarśanātpāpanāśanam

śāṃḍilyonāma brahmarṣiḥ sārathirbrahmaṇaḥ smṛtaḥ //
tapasvī sa mahātejā jñānaniṣṭho jitendriyaḥ

sa prabhāsaṃ samāsādya tapastepe sudāruṇam //
pratiṣṭhāpya mahāliṃgaṃ someśāduttare sthitam

sa svayaṃ pūjayāmāsa divyābdānāṃ śataṃ priye //
tato'bhilaṣitaṃ prāpya kṛtakṛtyo babhūva ha

nandīśvaraprasādena aṇimādiguṇairyutaḥ //
taṃ dṛṣṭvā tu naraḥ sadyo vipāpaḥ saṃprajāyate

bālye vayasi yatpāpaṃ vārdhakye yauvane'pi vā //
ajñānājjñānato vā'pi yaḥ karoti naraḥ priye //
tatsarvaṃ nāśamāyāti śāṃḍilyeśvaradarśanāt

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsa kṣetramāhātmye śāṇḍilyeśvaramāhātmyavarṇanaṃnāma ṣaḍviṃśatyuttaraśatatamo'dhyāyaḥ