Skanda Purana · Chapter 7.116

// īśvara uvāca // //
tato gacchenmahādevi devīṃ saubhāgyakāriṇīm //
kuṇḍeśvarīti vikhyātāṃ puṣkarādvāyugocare

dhanuṣāṃ triṃśatā devi bhūtanāthācca nairṛte //
saṃsthitā pāpadamanī dāridryaughavināśinī

tasyā nairṛtadigbhāge dhanuḥpañcadaśe sthitam //
śaṃkhodakaṃnāma kuṇḍaṃ sarvapātakanāśanam

tatra snātvā tu ye martyā nārī vā śubhavāriṇi //
pūjayettāṃ mahādevi śaṃkhāvarteti viśrutām

kalau kuṇḍeśvarīnāma sarvasaukhyapradāyinī //
śaṃkho nāma purā devi viṣṇunā nihataḥ priye

tasya dehaṃ samādāya mahāntaṃ śaṃkharūpiṇam //
tīrthodakena saṃpūrya prabhāsaṃ kṣetramāgataḥ

tatra śaṃkhaṃ tu prakṣālya kṛtaṃ tīrthaṃ mahāprabham //
tatra pūritavāñchaṅkhaṃ meghagambhīranisvanam

tasya nādena mahatā devī tatra samāgatā //
pṛcchatī kāraṇaṃ tatra tatkuṇḍasya samīpagā //
tena kuṇḍeśvarī khyātā kuṇḍaṃ śaṃkhodakaṃ smṛtam

māghe māsi tṛtīyāyāṃ yastāṃ pūjayate naraḥ //
nārī vā bhaktisaṃyuktā sa gaurīpadamāpnuyāt

daṃpatyorbhojanaṃ tatra deyaṃ yātrāphalepsubhiḥ //
kañcukaṃ phaladānaṃ ca gauriṇīnāṃ ca bhojanam

iti śrīskānde mahāpurāṇa ekāśītisāhasryāṃ sahitāyāṃ saptame prabhāsakhaṇḍe prathame prabhāsakṣetramāhātmye śaṃkhodakakuṇḍeśvarīgaurīmāhātmyavarṇanaṃnāma ṣoḍaśottaraśatatamo'dhyāyaḥ