સ્કંદ પુરાણ · અધ્યાય 7.116

॥ ઈશ્વર ઉવાચ ॥ ॥
તતો ગચ્છેન્મહાદેવિ દેવીં સૌભાગ્યકારિણીમ્ ॥
કુણ્ડેશ્વરીતિ વિખ્યાતાં પુષ્કરાદ્વાયુગોચરે

ધનુષાં ત્રિંશતા દેવિ ભૂતનાથાચ્ચ નૈરૃતે ॥
સંસ્થિતા પાપદમની દારિદ્ર્યૌઘવિનાશિની

તસ્યા નૈરૃતદિગ્ભાગે ધનુઃપઞ્ચદશે સ્થિતમ્ ॥
શંખોદકંનામ કુણ્ડં સર્વપાતકનાશનમ્

તત્ર સ્નાત્વા તુ યે મર્ત્યા નારી વા શુભવારિણિ ॥
પૂજયેત્તાં મહાદેવિ શંખાવર્તેતિ વિશ્રુતામ્

કલૌ કુણ્ડેશ્વરીનામ સર્વસૌખ્યપ્રદાયિની ॥
શંખો નામ પુરા દેવિ વિષ્ણુના નિહતઃ પ્રિયે

તસ્ય દેહં સમાદાય મહાન્તં શંખરૂપિણમ્ ॥
તીર્થોદકેન સંપૂર્ય પ્રભાસં ક્ષેત્રમાગતઃ

તત્ર શંખં તુ પ્રક્ષાલ્ય કૃતં તીર્થં મહાપ્રભમ્ ॥
તત્ર પૂરિતવાઞ્છઙ્ખં મેઘગમ્ભીરનિસ્વનમ્

તસ્ય નાદેન મહતા દેવી તત્ર સમાગતા ॥
પૃચ્છતી કારણં તત્ર તત્કુણ્ડસ્ય સમીપગા ॥
તેન કુણ્ડેશ્વરી ખ્યાતા કુણ્ડં શંખોદકં સ્મૃતમ્

માઘે માસિ તૃતીયાયાં યસ્તાં પૂજયતે નરઃ ॥
નારી વા ભક્તિસંયુક્તા સ ગૌરીપદમાપ્નુયાત્

દંપત્યોર્ભોજનં તત્ર દેયં યાત્રાફલેપ્સુભિઃ ॥
કઞ્ચુકં ફલદાનં ચ ગૌરિણીનાં ચ ભોજનમ્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે શંખોદકકુણ્ડેશ્વરીગૌરીમાહાત્મ્યવર્ણનંનામ ષોડશોત્તરશતતમોઽધ્યાયઃ