Skanda Purana · Chapter 7.117

// īśvara uvāca // //
tato gacchenmahādevi bhūtanātheśvaraṃ haram//
kuṇḍeśvaryā īśabhāge dhanuṣāṃ viṃśake'ntare

kalpaliṃgaṃ mahādevi hyanādinidhanaṃ sthitam //
pūrvaṃ tretāyuge devi vīrabhadreśvarīti ca

prakhyātaṃ bhuvi deveśi kalau bhūteśvaraṃ smṛtam //
purā dvāparasaṃdhau ca tatra bhūtāni koṭiśaḥ

saṃsiddhiṃ paramāṃ jagmustalliṃgasya prabhāvataḥ //
tena bhūteśvaraṃ nāma prakhyātaṃ dharaṇītale//

tatra kṛṣṇacaturddaśyāṃ rātrau saṃpūjya śaṃkaram //
dakṣiṇāṃ diśamāśritya aghoraṃ pūjayettu yaḥ

dṛḍhaṃ jitendriyo bhūtvā nirbhayo dhyānasaṃyu taḥ //
tasyaiva jāyate siddhiryā kācidbhūtale sthitā

tilahemapradānaṃ ca piṇḍadānaṃ ca tatra vai //
pitṝnuddiśya dadyādvai teṣāṃ pretatvamuktaye //

iti nigaditametadbhūtanātheśvarasya pracurakalimalānāṃ nāśanaṃ puṇyahetuḥ //
paṭhati ca puruṣo vā yaḥ śṛṇotīha bhaktyā suravaramahimānaṃ mucyate pātakaughaiḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye kuṃḍeśvarī māhātmye bhūtanātheśvaramāhātmyavarṇanaṃnāma saptadaśottaraśatatamo'dhyāyaḥ