Skanda Purana · Chapter 7.114

// īśvara uvāca // //
tato gacchenmahādevi viṣṇuṃ pāpapraṇāśanam //
vāmanasvāmināmānaṃ sarvapātakanāśanam

puṣkarānnairṛte bhāge dhanurviśatibhiḥ smṛtam //
yadā baddho balirdevi viṣṇunā prabhaviṣṇunā

tadā tatra padaṃ nyastaṃ dakṣiṇaṃ viśvarūpiṇā //
dvitīyaṃ meruśṛṃge tu tṛtīyaṃ gagane priye

yāvadūrdhvaṃ cotkṣipati tāvadbhinnaṃ sudūrataḥ //
pādāgreṇa tu brahmāṇḍaṃ niṣkrāntaṃ salilaṃ tataḥ

tataḥ svajānumātreṇa saṃprāptaṃ pṛthivītale //
tato viṣṇupadī gaṃgā prasiddhimagamatkṣitau

pūrvaṃ sā puṣkare prāptā puṣkarātsā mahānadī //
puṣkaraṃ kathyate vyoma puṣkaraṃ kathyate jalam //
tena tatpuṣkaraṃ khyātaṃ saṃnidhānaṃ prajāpateḥ

tatra snānaṃ naraḥ kṛtvā yaḥ paśyati hareḥ padam //
sa yāti paramaṃ sthānaṃ yatra devo hariḥ svayam

tatra piṃḍapradānena tṛptiḥ syātkoṭivārṣikī //
pitṝṇāṃ ca varārohe hyetadāha hariḥ svayam

atra gāthā purā gītā vasiṣṭhena maharṣiṇā //
vāmanasvāminaṃ dṛṣṭvā tāṃ śṛṇuṣva samāhitā

snātvā tu puṣkare tīrthe dṛṣṭvā viṣṇupadaṃ tataḥ //
api kṛtvā mahatpāpaṃ kimataḥ paritapyate

yastatropānahau dadyādbrāhmaṇāya yatavrataḥ //
sa yānavaramārūḍho viṣṇuloke mahīyate

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetra māhātmye vāmanasvāmimāhātmyavarṇanaṃnāma caturdaśottaraśatatamo'dhyāyaḥ