Skanda Purana · Chapter 7.113

// īśvara uvāca // //
tato gacchenmahādevi jānakīśvaramuttamam //
rāmeśānnaiṛte bhāge dhanustriṃśakasaṃsthitam

pāpaghnaṃ sarvajaṃtūnāṃ jānakyā''rādhitaṃ purā //
pratiṣṭhitaṃ viśeṣeṇa samyagārādhyaśaṃkaram

pūrvaṃ tasyaiva liṃgasya vasiṣṭheśeti nāma vai //
tatpaścājjānakīśeti tretāyāṃ prathitaṃ kṣitau

tataḥ ṣaṣṭisahasrāṇi vālakhilyā maharṣayaḥ //
tatra siddhimanuprāptāstena siddheśvareti ca //

khyātaṃ kalau mahādevi yugaliṃgaṃ mahāprabham//
taddṛṣṭvā mucyate pāpairduḥkhadaurbhāgyasaṃbhavaiḥ

yastaṃ pūjayate bhaktyā nārī vā puruṣo'pi vā //
saṃsnāpya vidhivadbhaktyā sa muktaḥ pātakairbhavet

snātvā ca puṣkare tīrthe yastalligaṃ prapūjayet //
niyato niyatāhāro māsamekaṃ nirantaram

dinedine bhavettasya vājimedhādhikaṃ phalam //
māghe māsi tṛtīyāyāṃ yā nārī taṃ prapūjayet //
tadanvaye'pi daurbhāgyaṃ duḥkhaṃ śokaśca no bhavet

iti te kathitaṃ devi māhātmyaṃ pāpanāśanam //
śrutaṃ harati pāpāni saubhāgyaṃ saṃprayacchati

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye jānakīśvaramāhātmyavarṇanaṃnāma trayodaśottaraśatatamo'dhyāyaḥ //