Skanda Purana · Chapter 7.104

// īśvara uvāca // //
tato gacchenmahādevi koṭīśvaramanuttamam //
tasmāduttarato devi koṭīśamiti viśrutam

pāpaghnaṃ sarvajaṃtūnāṃ paśupāśavimokṣadam //
purā pāśupatā devi kapāleśvarasaṃnidhau

tapaḥ kurvaṃti vipulaṃ bhasmoddhūlitavigrahāḥ //
jaṭāmukuṭasaṃyuktā muṃjamekhaladhāriṇaḥ

śāṃtāḥ sarve jitakrodhā brāhmaṇāḥ śivayoginaḥ //
tapaḥ kurvaṃti tatrasthā vyāpya kṣetraṃ caturddiśam

koṭisaṃkhyā mahādevi mantrajāpyaparāyaṇāḥ //
samyaksaṃsthāpya te liṃgaṃ kapāleśasamīpagam

tataste pūjayāṃcakrustalliṃgaṃ bhaktisaṃyutāḥ //
tatastuṣṭo mahādevo muktiṃ teṣāṃ dadau haraḥ

ṛṣayaḥ koṭisaṃkhyātāstasminsiddhā yataḥ priye //
tena koṭīśvaraṃ liṃgaṃ nāmnā khyātaṃ dharātale

yastaṃ pūjayate bhaktyā koṭīśvaramanāmayam //
sa koṭimantrajāpyasya phalaṃ prāpsyati mānavaḥ

hiraṇyaṃ tatra dātavyaṃ brāhmaṇe vedapārage //
koṭihomaphalaṃ tasya samyagyātrāphalaṃ bhavet

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye koṭīśvaramāhātmyavarṇanaṃnāma caturadhika śatatamo'dhyāyaḥ