Skanda Purana · Chapter 7.103

// īśvara uvāca // //
tato gacchedvarārohe kapāleśvaramuttamam //
tasyā uttaradigbhāge suragaṃdharvapūjitam//

purā yajñe varttamāne dakṣarājasya dhīmataḥ //
upaviṣṭeṣu vipreṣu hūyamāne hutāśane

jālmarūpadharo bhūtvā śaṃkarastatra cāgataḥ

jīrṇakaṃthānvito devi malavāndhūlidhūsaraḥ

atha te brāhmaṇāḥ kruddhā dṛṣṭvā taṃ jālmarūpiṇam //
kapāladhāriṇaṃ sarve dhikchabdaistaṃ jagarhire

asakṛtpāpapāpeti gacchagaccha narādhama //
yajñavedirna cārhā hi mānuṣāsthidharasya te

atha prahasya bhagavānyajñavedyāṃ sureśvari //
kṣiptvā kapālaṃ naṣṭo'sau na sa jñāto manīṣibhiḥ

tasminnaṣṭe kapālaṃ tatkṣiptaṃ maṃḍapabāhyataḥ //
athānyattatra saṃjātaṃ tadrūpaṃ ca varānane

kṣiptaṃkṣiptaṃ punastatra jāyate ca mahītale //
evaṃ śatasahasrāṇi prayutānyarbudāni ca

tatra kṣiptāni jātāni tataste vismayānvitāḥ //
athocurmunayaḥ sarve nirviṇṇāścāsya ceṣṭitam

ko'nyo devānmahādevādgaṃgākṣālitaśekharāt //
samartha īdṛśaṃ karttumasminyajñe viśeṣataḥ

tataste vi vidhaiḥ stotraiḥ stuvaṃto vṛṣabhadhvajam //
homaṃ cakrurmuhurvahnau maṃtraistaiḥ śatarudriyaiḥ

tataḥ pratyakṣatāṃ prāptasteṣāṃ devo maheśvaraḥ //
tataste vividhaiḥ stotraistuṣṭuvuḥ śūlapāṇinam//
vedoktamaṃtrairvividhaiḥ purāṇoktaistathaiva ca

// ṛṣaya ūcuḥ // //
ॐ namo mūlaprakṛtaye ajitāya mahātmane //
anāvṛtāya devāya niḥspṛhāya namonamaḥ

nama ādyāya bījāya ārṣeyāya pravarttine //
anaṃtarāya caikāya avyaktāya namonamaḥ // /// १४ //
nānāvicitrabhujagāṃgadabhūṣaṇāya sarveśvarāya virajāya namo varāya //
viśvātmane paramakāraṇakāraṇāya phullāraviṃdavipulāyatalocanāya //

adṛśyamavyaktamanādimavyayaṃ yadakṣaraṃ brahma vadaṃti sarvagam //
niśāmya yaṃ mṛtyumukhātpramucyate tamādidevaṃ śaraṇaṃ prapadye

evaṃ stutastadā sarvairṛṣibhirgatakalmaṣaiḥ //
tatastuṣṭo mahādevasteṣāṃ pratyakṣatāṃ gataḥ //
abravīttānṛṣīndevo vṛṇudhvaṃ varamuttamam

// brāhmaṇā ūcuḥ // //
yadi tuṣṭo'si no deva sthāne'sminnirato bhava //
asaṃkhyātāni yasmācca kapālāni sureśvara

punaḥ punaḥ pravṛttāni vyapanītānyapi prabho //
asminnasaṃśayaṃ sthāne kapāleśvaranāmabhṛt

svayaṃ tu liṃgaṃ deveśa tiṣṭhenmanvaṃtarāṃtaram //
kapāleśvaranāmnā tvamasminsthāne sthitiṃ kuru

yetra tvāṃ pūjayiṣyaṃti dhūpamālyānulepanaiḥ //
teṣāṃ tu paramaṃ sthānaṃ yaddevairapi durlabham

bāḍhamityevamuktvā'sau sthita statramaheśvaraḥ //
punaḥ pravartito yajño niśānāthasya bhāmini

tasmindṛṣṭe labhenmartyo vājimedhaphalaṃ priye //
mucyate pātakaiḥ sarvaiḥ pūrva janmārjjitairapi

idaṃ māhātmyamakhilamabhūtsvāyaṃbhuvāṃtare //
vaivasvate punaścānyaddakṣayajñavināśakṛt

kapālīti maheśāno dakṣeṇoktaḥ purā haraḥ //
tena yajñasya vidhvaṃsaṃ kapālī tamathākarot //
kapāleśvaranāmeti sthitosminmānavāntare

athāsya nāma devasya sūrya sāvarṇikeṃ'tare //
bhaviṣyati varārohe nāma tattveśvareti ca

iti saṃkṣepataḥ proktaṃ māhātmyaṃ rudradaivatam//
pāpaghnaṃ sarvajaṃtūnāṃ paśupāśavimokṣaṇam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye madhyayātrāyāṃ kapāleśvaramāhātmyavarṇanaṃnāma tryadhikaśatatamo'dhyāyaḥ