Skanda Purana · Chapter 6.249

vāṇyuvāca // //
tulasī ropitā yena gṛhasthena mahāphalā //
gṛhe tasya na dāridryaṃ jāyate nātra saṃśayaḥ

tulasyā darśanādeva pāparāśirnivartate //
śriye'mṛtakaṇotpannā tulasī harivallabhā

pibantyā ruciraṃ pānaṃ prāṇināṃ pāpahāriṇī //
yasyā rūpe vasellakṣmīḥ skandhe sāgarasaṃbhavā

patreṣu satataṃ śrīśca śākhāsu kamalā svayam //
indirā puṣpagā nityaṃ phale kṣīrābdhisaṃbhavā

tulasī śuṣkakāṣṭheṣu yā rūpā viśvavyāpinī //
majjāyāṃ padmavāsā ca tvacāsu ca haripriyā

sarvarūpā ca sarveśā paramānandadāyinī //
tulasī prāśako martyo yamalokaṃ na gacchati / ६ /
śirasthā tulasī yasya na yāmyairanubhūyate //
mukhasthā tulasī yasya nirvāṇapadadāyinī

hastasthātulasīyasya sa tāpatrayavarjitaḥ //
tulasī hṛdayasthā ca prāṇināṃ sarvakāmadā

skandhasthā tulasī yasya sa pāpairna ca lipyate //
kaṇṭhagā tulasī yasya jīvanmuktaḥ sadā hi saḥ

tulasīsaṃbhavaṃ patraṃ sadā vahati yo naraḥ //
manasā cintitāṃ siddhiṃ saṃprāpnoti na saṃśayaḥ //

tulasīṃsarvakāyārthasādhinīṃ duṣṭavāriṇīm //
yo naraḥ pratyahaṃ siñcenna sa yāti yamālayam

cāturmāsye viśeṣeṇa vanditāpi vimuktidā //
nārāyaṇaṃ jalagataṃ jñātvā vṛkṣagataṃ tathā

prāṇināṃ kṛpayā lakṣmīstulasīvṛkṣamāśritā //
cāturmāsye samāyāte tulasī sevitā yadi

teṣāṃ pāpasahasrāṇi yāṃti nityaṃ sahasradhā //
govindasmaraṇaṃ nityaṃ tulasīvanasevanam

tulasīsecanaṃ dugdhai ścāturmāsye'tidurlabham //
tulasīṃ varddhayedyastu mānavo yadi śraddhayā

ālavālāṃbudānaiśca pāvitaṃ sakalaṃ kulam //
yathā śrīstulasīsaṃsthā nityameva hi varddhate

tathātathā gṛhasthasya kāmavṛddhiḥ prajāyate //
brahmacārīgṛhasthaśca vānaprastho yatistathā

tathā prakṛtayaḥ sarvāstulasīsevane ratāḥ //
śraddhayā yadi jāyante na tāsāṃ duḥkhado hariḥ

eko hariḥ sakalavṛkṣagato vibhāti nānārasaistu paribhāvitamūrtireva //
vṛkṣādhivāsamagamatkamalā ca devī duḥkhādināśanakarī satataṃ smṛtā'pi

iti śrīskāṃde mahāpurāṇaekāśītisāhasryāṃ saṃhitāyāṃ ṣaṣṭha nāga rakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye paijavanopākhyāne tulasīmāhātmyavarṇanaṃnāmaikonapañcāśaduttara dviśatatamo'dhyāyaḥ