Skanda Purana · Chapter 6.248

// vāṇyuvāca // //
palāśo harirūpeṇa sevyate hi purāvidaiḥ //
bahubhirhyupacāraistu brahmavṛkṣasya sevanam

sarvakāmapradaṃ proktaṃ mahāpātakanāśanam //
trīṇi patrāṇi pālāśe madhyamaṃ viṣṇuśāpitam

vāme brahmā dakṣiṇe ca hara ekaḥ prakīrtitaḥ //
palāśapātre yo bhuṃkte nityameva narottamaḥ

aśvamedhasahasrasya phalaṃ prāpnotyasaṃśayam //
cāturmāsye viśeṣeṇa bhokturmokṣapradaṃ bhavet

payasā vātha dugdhena ravivāre'niśaṃ yadi //
cāturmāsye'rcito yaistu te yāṃti paramaṃpadam

dṛśyate yadi pālāśaḥ prātarutthāya mānavaiḥ //
narakānāśu nirdhūya gamyate paramaṃ padam

pālāśaḥ sarvadevānāmādhāro dharmasādhanam //
yatra lobhastu tasya syāttatra pūjyo mahātaruḥ

yathā sarveṣu varṇeṣu vipro mukhyatamo bhavet //
madhye sarvatarūṇāṃ ca brahmavṛkṣo mahottamaḥ

yasya mūle haro nityaṃ skaṃdhe śūladharaḥsvayam //
śākhāsu bhagavānrudraḥ puṣpeṣu tripurāṃtakaḥ

śivaḥ patreṣu vasati phale gaṇapatistathā //
gaṃgāpatistvacāyāṃ tu majjāyāṃ bhagavā nbhavaḥ

īśvarastu praśākhāsu sarvo'yaṃ haravallabhaḥ //
haraḥ karpūradhavalo yathāvadvarṇitaḥ sadā

tathā hyayaṃ brahmarūpaḥ sitavarṇo mahābhagaḥ//
ciṃtito ripunāśāya pāpasaṃśoṣaṇāya ca

manorathapradānāya jāyate nātra saṃśayaḥ //
guruvāre samāyāte cāturmāsye tathaiva ca

pūjitaśca stuto dhyātaḥ sarvaduḥkhavināśakaḥ

devastutyo devabījaṃ paraṃ yanmūrtaṃ brahma brahmavṛkṣatvamāptam //
nityaṃ sevyaḥ śraddhayā sthāṇurūpaścāturmāsye sevitaḥ pāpahā syāt

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye paijavanopākhyāne pālāśamahimavarṇanaṃnāmāṣṭacatvāriṃśaduttaradviśatatamo'dhyāyaḥ