Skanda Purana · Chapter 6.250

// vāṇyuvāca // //
bilvapatrasya māhātmyaṃ kathituṃ naiva śakyate//
tavoddeśena vakṣyāmi mahendra śṛṇu tattvataḥ

vihāraśramamāpannā devī girisutā śubhā //
lalāṭaphalake tasyāḥ svedabindurajāyata

sa bhavānyā vinikṣipto bhūtale nipapāta ca //
mahātarurayaṃ jāto mandare parvatottame

tataḥ śailasutā tatra ramamāṇā yayau punaḥ //
dṛṣṭvā vanagataṃ vṛkṣaṃ vismayotphullalocanā

jayāṃ ca vijayāṃ caiva papraccha ca sakhīdvayam //
ko'yaṃ mahātarurdivyo vibhāti vanamadhyagaḥ //
dṛśyate rucirākāro mahāharṣakaro hyayam

// jayovāca // //
devi tvaddehasaṃbhūto vṛkṣo'yaṃ svedabindujaḥ //
nāmā'sya kuru vai kṣipraṃ pūjitaḥ pāpanāśanaḥ

// pārvatyuvāca // //
yasmātkṣoṇītalaṃ bhittvā viśiṣṭo'yaṃ mahātaruḥ

udatiṣṭhatsamīpe me tasmādbilvo bhavatvayam //
imaṃ vṛkṣaṃ samāsādya bhaktitaḥ patrasaṃcayam

āhariṣyatyasau rājā bhaviṣyatyeva bhūtale //
yaḥ kariṣyati me pūjāṃ patraiḥ śraddhāsamanvitaḥ

yaṃyaṃ kāmamabhidhyāyettasya siddhiḥ prajāyate //
yo dṛṣṭvā bilvapatrāṇi śraddhāmapi kariṣyati

pūjanārthāya vidhaye dhanadā'haṃ na saṃśayaḥ //
patrāgraprāśane yastu kariṣyati mano yadi //
tasya pāpasahasrāṇi yāsyaṃti vilayaṃ svayama

śiraḥ patrāgrasaṃyuktaṃ karoti yadi mānavaḥ //
na yāmyā yātanā hyasya duḥkhadātrī bhaviṣyati

ityuktvā pārvatī hṛṣṭā jagāma bhavanaṃ svakam //
sakhībhiḥ sahitā devī gaṇairapi samanvitā

// vāṇyuvāca // //
ayaṃ bilvataruḥ śreṣṭhaḥ pavitraḥ pāpanāśanaḥ //
tasya mūle sthitā devī girijā nātra saṃśayaḥ

skandhe dākṣāyaṇī devī śākhāsu ca maheśvarī //
patreṣu pārvatī devī phale kātyā yanī smṛtā

tvaci gaurī samākhyātā aparṇā madhyavalkale //
puṣpe durgā samākhyātā umā śākhāṃgakeṣu ca

kaṇṭakeṣu ca sarveṣu koṭayo navasaṃkhyayā /
śaktayaḥ prāṇirakṣārthaṃ saṃsthitā girijā''jñayā

tāṃ bhajaṃti supatraiśca pūjayaṃti sanātanīm //
yaṃyaṃ kāmayate kāmaṃ tasya siddhirbhaveddhruvam

maheśvarī sā girijā maheśvarī viśuddharūpā janamokṣadātrī//
haraṃ ca dṛṣṭvātha palāśamāśritaṃ svalīlayā bilvavapuścakāra sā

iti śrīskāṃdemahāpurāṇa ekāśītisāhasryāṃ sahitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cātu rmāsyamāhātmye paijavanopākhyāne bilvotpattivarṇanaṃnāma pañcāśaduttaradviśatatamo'dhyāyaḥ