Skanda Purana · Chapter 6.230

// sūta uvāca // //
evaṃ gaṇatvamāpanne hyandhake dānavottame //
tasya putro vṛkonāma nirutsāho dviṣajjaye

bhayena mahatā yukto hataśeṣaiśca dānavaiḥ //
praviveśa samudrāṃtaṃ sudurgaṃ brāhmaṇottamāḥ

tataḥ śakraḥ prahṛṣṭātmā praṇamya vṛṣabhadhvajam //
tasyādeśaṃ samāsādya praviveśāmarāvatīm

cakāra ca sukhī rājyaṃ trailokye'pi dvijottamāḥ//
yajñabhāgānpunarlebhe yathārthaṃ ca dharātale

etasminneva kāle tu hyaṃdhakasya suto vṛkaḥ //
niṣkramya sāgarāttūrṇaṃ jaṃbudvīpaṃ samāgataḥ

hāṭakeśvarajaṃ kṣetraṃ matvā puṇyaṃ susiddhidam //
pitrā yatra tapastaptamaṃdhakena durātmanā

saguptastu tapastepe'yathā vetti na kaścana //
dhyāyamānaḥ suraśreṣṭhaṃ bhaktyā kamalasaṃbhavam

yāvadvarṣasahasrāṃtaṃ jalāhāro dvitīyakam //
tapastepe sa daityendro dhyāyamānaḥ pitāmaham

vāyubhakṣastato jātastāvatkālaṃ dvijottamāḥ //
aṃguṣṭhāgreṇa bhūpṛṣṭhaṃ sparśamāno jitendriyaḥ

evaṃ ca pañcame prāpte sahasre dvijasattamāḥ //
brahmā tasya gatastuṣṭiṃ dṛṣṭvā tasya tapo mahat

tato'bravīttamāgatya tāṃ gartāṃ brāhmaṇottamāḥ //
bhobho vṛka nivartasva tapaso'smātsudāruṇāt

varaṃ varaya bhadraṃ te yo nityaṃ mana si sthitaḥ

// vṛka uvāca // //
yadi tuṣṭo'si me deva yadi deyo varo mama //
jarāmaraṇahīnaṃ māṃ tatkuruṣva pitāmaha

// śrībrahmovāca // //
mama prasādato vatsa jarāmaraṇavarjitaḥ //
bhaviṣyasi na sandehaḥ satyametanmayoditam

evamuktvā tato brahmā tatraivāṃtaradhī yata //
vṛko'pi kṛtakṛtyastvāgataśca svagṛhaṃ pituḥ

giriṃ raivatakaṃ nāma sarvartukusumojjvalam //
tatra gatvā nijāmātyaiḥ samaṃ mantrya ca satva ram //
indropari tataścakre yānaṃ yuddhaparīpsayā

iṃdro'pi ca parijñāya dānavaṃ taṃ mahābalam //
jarāmṛtyuparityaktaṃ prabhāvātparameṣṭhinaḥ

parityajya bhayāccaiva purīṃ caivāmarāvatīm //
brahmalokaṃ gatastūrṇaṃ devaiḥ sarvaiḥ samanvitaḥ

etasminnaṃtare prāpto vṛkaśca tridaśālaye //
sasainyaparivāreṇa prahṛṣṭena samanvitaḥ

tataścaiṃdrapade tasminsvayameva vyavasthitaḥ //
śukrātprāpyābhiṣekaṃ ca puṣpasnānasamudbhavam

so'bhiṣiktastu śukreṇa devarājyapade vṛkaḥ//
sthāpayāmāsa daiteyāndevatānāṃ padeṣu ca

ādityānāṃ vasūnāṃ ca rudrāṇāṃ marutāmapi//
yajñabhāgakṛte viprāḥ śukraśāsanamāśritāḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye jalaśāyyupākhyāne vṛkendrarājyalaṃbhanavarṇanaṃnāma triṃśaduttaradviśatatamo'dhyāyaḥ