Skanda Purana · Chapter 6.229

// sūta uvāca // //
etasminnaṃtare śambhurgaṇaiḥ sarvaiḥ samāvṛtaḥ //
indrādyaiśca suraiḥ sarveḥ krodhasaṃraktalocanaḥ //
jagāma vṛṣamāruhya purīṃ caivāmarāvatīm

aṃdhako'pi samālokya saṃprāptāṃ devavāhinīm //
sagaṇāṃ ca mahādevaṃ paritoṣaṃ paraṃ gataḥ

niścakrāmātha yuddhāya balena caturaṃgiṇā //
varaṃ syaṃdanamāruhya suśvetāśvavahaṃ śubham

tataḥ samabhavadyuddhaṃ devānāṃ dānavaiḥ saha //
gaṇaiśca vikṛtākārairmṛtyuṃ kṛtvā nivartanam

ekavarṣasahasrāṃtaṃ yāvadyuddhamavartata //
dinedine kṣayaṃ yāṃti tatra devā na dānavāḥ //
tato varṣasahasrāṃte saṃkruddhaḥ śaśiśekharaḥ//
triśūlena samudyamya svahastena vyabhedayat

sa viddho'pi svayaṃ tena triśūlena mahāsuraḥ//
brahmaṇo varamāhātmyānnaiva prāṇaiviryujyate

tato bhūyo'pi cotthāya cakre yuddhaṃ mahātmanā //
jaghāna ca sa saṃkruddho viśeṣeṇa bahūngaṇān

śaṃkaraṃ tāḍayāmāsa gadāghātairmuhurmuhuḥ

evaṃ varṣasahasrāṃtamabhūtsārddhaṃ pinākinā //
raudraṃ yuddhamandhakasya sarvalokabhayāvaham

triśūlabhinno daityaḥ sa yadā mṛtyuṃ na gacchati //
utthāyotthāya kurute prahārāngadayā balī

tathā taṃ śaṃkaro jñātvā mṛtyunā parivarjitam//
brahmaṇo varadānena sarveṣāṃ ca divaukasām

tato nirbhidya śūlāgraiḥ protkṣipya gaganāṃgaṇe //
chatravaddhārayāmāsa laṃbamānamadhomukham //
akṣaradrudhiraṃ bhūmau gātrebhyo varṣmasaṃbhavam

yāvadvarṣasahasrāṃte carmāsthi snāyureva ca //
dhātutrayaṃ sthitaṃ tasya naṣṭamanyaccatuṣṭayam

sa jñātvā bala saṃhīnamātmānaṃ dhātusaṃkṣayāt //
sāmopāyaṃ tataścake stutvā sārdhaṃ pinākinā

// andhaka uvāca // //
na tvaṃ devo mayā jñāto vāgduṣṭena durātmanā //
īdṛgvīryasamopetastadyuktaṃ bhavatā kṛtam

anurūpaṃ madāṃdhasyāvivekasya surottama //
svavīryamadayuktasya viveka rahitasya ca

durvinītaḥ śriyaṃ prāpya vidyāmaiśvaryamevaca //
na tiṣṭhati ciraṃ kālaṃ yathā'haṃ madagarvitaḥ

pāpo'haṃ pāpakarmā'haṃ pāpātmā pāpasaṃbhavaḥ //
trāhi māṃ deva īśāna sarvapāpaharo bhava

duḥkhito'haṃ varāko'haṃ dīno'haṃ śaktivarjitaḥ //
trātumarhasi māṃ deva prapannaṃ śaraṇaṃ vibho

duṣṭo'haṃ pāpayukto'haṃ sāṃprataṃ parameśvara //
tena buddhiriyaṃ jātā tavopari mamānagha

sarvapāpakṣaye jāte śive bhavati bhāvanā

nāmamātramapi tryakṣa yaste kīrtayati prabho //
so'pi muktimavāpnoti kiṃ punaḥ pūjane rataḥ

tava pūjā vihīnānāṃ dinānyāyāṃti yāṃti ca //
yāni deva mṛtānāṃ ca tāni yāṃti na jīvatām

kuṣṭhī vā rogayukto vā paṃgurvā badhiro'pi vā //
mā bhūttasya kule janma śaṃbhuryatra na devatā

tasmānmocaya māṃ deva svāgataṃ kuru sāṃpratam //
gato me dānavo bhāvastyaktaṃ rājyaṃ tathā vibho // / २६ //
tyaktāḥ putrāśca pautrāśca patnyaśca vibhavaiḥ saha //
triḥ satyena suraśreṣṭha tava pādau spṛśāmyaham

tasya tadvacanaṃ śrutvā jñātvā taṃ gatakalmaṣam//
uttārya śanakaiḥ śūlādvinayāvanataṃ sthitam

tato nāma svayaṃ cakre bhṛṃgirīṭiriti prabhuḥ//
abravīcca sadā me tvaṃ vallabhaḥ saṃbhaviṣyasi

nandino'pi gajāsyasya mahākālasya putraka//
tiṣṭha saumya mayā saukhyaṃ na smariṣyasi bāṃdhavān

/
sa tatheti pratijñāya praṇamya śaśiśekharam //
tasthau sarvagaṇairyuktaḥ prabhusaṃśrayasaṃyutaḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvara kṣetramāhātmye bhṛṃgīriṭyutpattivarṇanaṃnāmaikonatriṃśaduttaradviśatatamo'dhyāyaḥ