Skanda Purana · Chapter 6.196

// sūta uvāca // //
atha tāṃ yauvanopetāṃ svasutāṃ prekṣya pārthivaḥ //
anaupamyena rūpeṇa saṃyuktāṃ varavarṇinīm //
ānartaścintayāmāsa kanyakāṃ pradadāmyaham

anarhāya ca yo dadyā dvarāya nijakanyakām //
kāryakāraṇalobhena narakaṃ sa pragacchati

evaṃ ciṃtayatastasya mahānkālo vyavasthitaḥ //
na paśyati ca tadyogyaṃ kaṃcidvaramanuttamam

atha saṃpreṣayāmāsa sarvabhūtāśrayeṣu ye //
citrakarmaṇi vikhyātānnarāṃścitrakarāṃstadā

gacchadhvaṃ mama vākyena sarvā nbhūmitale nṛpān //
likhitvā paṭṭamadhye tu darśayadhvaṃ tataḥ param

sutāyā mama yenā'sau dṛṣṭvā'bhīṣṭaṃ narādhipam //
patyarthaṃ varayetsādhvī mama doṣo bhavenna hi

tasya tadvacanaṃ śrutvā sarve citrakarāstadā //
prasthitā dharaṇīpṛṣṭhe pārthivānāṃ gṛheṣu ca

te likhitvā mahīpālā nyauvanasthānvayo'nvitān //
rūpaudāryaguṇopetāndarśayāmāsuragrataḥ //
ratnavatyāḥ krameṇaiva tasya bhūpasya śāsanāt

atha teṣāṃ tu sarveṣāṃ madhye rājā vṛhadbalaḥ //
daśārṇādhipatirbhavyaḥ patyarthaṃ ca vṛtastayā

tadā''nartādhipo hṛṣṭaḥ preṣayāmāsa taṃ prati //
vivāhārthaṃ suvijñāya vākya metaduvāca ha

gacchadhvaṃ mama vākyena daśārṇādhipatiṃ prati //
vācyaḥ sa vinayādgatvā vivāhārthaṃ mamāṃtikam

samāgaccha nijāṃ kanyāṃ yena yacchāmyahaṃ tava //
nāmnā ratnavatīṃ khyātāṃ trailokyasyāpi sundarīm

gatvā sa satvaraṃ tatra yatra rājā bṛhadbalaḥ //
provāca sakalaṃ vākyamānartādhipateḥ sphuṭam

so'pi tatsahasā śrutvā teṣāṃ vākyamanuttamam //
paramāṃ tuṣṭimāsādya prasthitastatpuraṃ prati //
sainyena mahatā yuktaścaturaṃgeṇa pārthivaḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye daśārṇādhipaterbṛhadbalasyānarteśapuraṃ pratyāgamanavarṇanaṃnāma ṣaṇṇavatyuttaraśatatamo'dhyāyaḥ