સ્કંદ પુરાણ · અધ્યાય 6.196

॥ સૂત ઉવાચ ॥ ॥
અથ તાં યૌવનોપેતાં સ્વસુતાં પ્રેક્ષ્ય પાર્થિવઃ ॥
અનૌપમ્યેન રૂપેણ સંયુક્તાં વરવર્ણિનીમ્ ॥
આનર્તશ્ચિન્તયામાસ કન્યકાં પ્રદદામ્યહમ્

અનર્હાય ચ યો દદ્યા દ્વરાય નિજકન્યકામ્ ॥
કાર્યકારણલોભેન નરકં સ પ્રગચ્છતિ

એવં ચિંતયતસ્તસ્ય મહાન્કાલો વ્યવસ્થિતઃ ॥
ન પશ્યતિ ચ તદ્યોગ્યં કંચિદ્વરમનુત્તમમ્

અથ સંપ્રેષયામાસ સર્વભૂતાશ્રયેષુ યે ॥
ચિત્રકર્મણિ વિખ્યાતાન્નરાંશ્ચિત્રકરાંસ્તદા

ગચ્છધ્વં મમ વાક્યેન સર્વા ન્ભૂમિતલે નૃપાન્ ॥
લિખિત્વા પટ્ટમધ્યે તુ દર્શયધ્વં તતઃ પરમ્

સુતાયા મમ યેનાઽસૌ દૃષ્ટ્વાઽભીષ્ટં નરાધિપમ્ ॥
પત્યર્થં વરયેત્સાધ્વી મમ દોષો ભવેન્ન હિ

તસ્ય તદ્વચનં શ્રુત્વા સર્વે ચિત્રકરાસ્તદા ॥
પ્રસ્થિતા ધરણીપૃષ્ઠે પાર્થિવાનાં ગૃહેષુ ચ

તે લિખિત્વા મહીપાલા ન્યૌવનસ્થાન્વયોઽન્વિતાન્ ॥
રૂપૌદાર્યગુણોપેતાન્દર્શયામાસુરગ્રતઃ ॥
રત્નવત્યાઃ ક્રમેણૈવ તસ્ય ભૂપસ્ય શાસનાત્

અથ તેષાં તુ સર્વેષાં મધ્યે રાજા વૃહદ્બલઃ ॥
દશાર્ણાધિપતિર્ભવ્યઃ પત્યર્થં ચ વૃતસ્તયા

તદાઽઽનર્તાધિપો હૃષ્ટઃ પ્રેષયામાસ તં પ્રતિ ॥
વિવાહાર્થં સુવિજ્ઞાય વાક્ય મેતદુવાચ હ

ગચ્છધ્વં મમ વાક્યેન દશાર્ણાધિપતિં પ્રતિ ॥
વાચ્યઃ સ વિનયાદ્ગત્વા વિવાહાર્થં મમાંતિકમ્

સમાગચ્છ નિજાં કન્યાં યેન યચ્છામ્યહં તવ ॥
નામ્ના રત્નવતીં ખ્યાતાં ત્રૈલોક્યસ્યાપિ સુન્દરીમ્

ગત્વા સ સત્વરં તત્ર યત્ર રાજા બૃહદ્બલઃ ॥
પ્રોવાચ સકલં વાક્યમાનર્તાધિપતેઃ સ્ફુટમ્

સોઽપિ તત્સહસા શ્રુત્વા તેષાં વાક્યમનુત્તમમ્ ॥
પરમાં તુષ્ટિમાસાદ્ય પ્રસ્થિતસ્તત્પુરં પ્રતિ ॥
સૈન્યેન મહતા યુક્તશ્ચતુરંગેણ પાર્થિવઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે દશાર્ણાધિપતેર્બૃહદ્બલસ્યાનર્તેશપુરં પ્રત્યાગમનવર્ણનંનામ ષણ્ણવત્યુત્તરશતતમોઽધ્યાયઃ