Skanda Purana · Chapter 6.173

// ṛṣaya ūcuḥ // //
aho bata mahāścaryaṃ viśvāmitrasya sanmuneḥ //
maṃtraprabhāvato yena tattoyaṃ rudhirīkṛtam

tataḥprabhṛti saṃprāptaṃ kathaṃ toyaṃ prakīrtaya //
sarasvatyā mahābhāga sarvaṃ vistarato vada

// sūta uvāca // //
bahukālaṃ pravāhaḥ sa sarasvatyā dvijottamāḥ //
mahānraktamayo jāto bhūtarākṣasasevitaḥ

kasyacittvatha kālasya vasiṣṭho munisattamaḥ //
arbudasthastayā prokto dīnayā duḥkhayuktayā

tavārthāya mune śaptā viśvāmitreṇa kopataḥ //
rudhiraughavahājātā tapasvijanavarjitā

tasmātkuru prasādaṃ me yathā syātsalilaṃ punaḥ //
pravāhe mama viprendra prayāti rudhiraṃ kṣayam

trailokyakaraṇe vipra saṃkṣaye vā sthitau hi vā //
nāśaktirvidyate kācittava sarvamunīśvara

// vasiṣṭha uvāca // //
tathā bhadre kariṣyāmi yathā syātsalilaṃ punaḥ //
pravāhe tava niryāti sarvaṃ raktaṃ parikṣayam

evamuktvā sa viprarṣiravatīrya dharātale //
gataḥ plakṣataruṃ yasmā davatīrṇā sarasvatī

samādhiṃ tatra saṃdhāya niviṣṭo dharaṇītale //
saṃbhramaṃ paramaṃ gatvā viśvāmitrasya copari

vāruṇena tu mantreṇa vīkṣa yanvasudhātalam //
tato nirbhidya vasudhāṃ bhūritoyaṃ vinirgatam ११ //
randhradvayena viprendrā locanābhyāṃ nirīkṣaṇāt //
ekasya salilaṃ kṣipraṃ yatra jātā sarasvatī

plakṣamūle tatastasya vegenāpahṛtaṃ balāt //
tadraktaṃ tena saṃpūrṇaṃ tatastena mahānadī

dvitīyastu pravāho yaḥ saṃbhramā ttasya nirgataḥ //
sā ca sābhramatī nāma nadī jātā dharātale

evaṃ prakṛtimāpannā bhūya eva sarasvatī //
yatpṛṣṭo'smi mahābhāgāḥ sarasvatyāḥ kṛte dvijāḥ

etatsārasvataṃ nāma vyākhyānamatibuddhidam //
yaḥ paṭhecchraṇuyādvāpi matistasya vivarddhate //
sarasvatyāḥ prasādena satyametanma yoditam

iti śrīskāṃde mahāpurāṇa ekāśītisāhasyā saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye sarasvatyupākhyāne sarasvatī śāpamocanasābhramatyutpattivṛttāntavarṇanaṃnāma trisaptatyuttaraśatatamo'dhyāyaḥ