Skanda Purana · Chapter 6.172

sūta uvāca // //
tataḥprabhṛti cchidrāṇi viśvāmitro nirīkṣayan //
vasiṣṭhasya vadhārthāya saṃsthito dvijasattamāḥ

ātmaśaktiprabhāvena maśakasya yathā gajaḥ //
anyasminnahani prāpte viśvāmitreṇa sā nadī

samāhūtā samāyātā drutaṃ sā strīsvarūpiṇī //
abravītprāṃjalirbhūtvā ādeśo dīyatāṃ mama //
brahmarṣe yena kāryeṇa samāhūtāsmi sāṃpratam

// viśvāmitra uvāca // //
yadā nimajjanaṃ kuryāttava toye mahānadi //
paramaṃ vegamāsthāya tadā''naya mamāṃtikam

pūrṇaśrotraṃ jale naiva vyākulāṃgaṃ vyavasthitam //
nihanmi yena śīghraṃ ca nānyacchidraṃ pralakṣaye

evamuktā tadā tena viśvāmitreṇa sā nadī //
vitrastā bhayasaṃyuktā śāpādvākyamuvāca sā

nāhaṃ drohaṃ kariṣyāmi vasiṣṭhasya mahātmanaḥ //
brahmarṣe na ca te yuktaṃ kartuṃ vai brahmaṇo vadham

yadi tvaṃ brahmaṇā prokto brahmarṣiḥ svayameva tu //
kāmānnāyaṃ vasiṣṭhastu tasmātkopaṃ parityaja

manasāpi vadhaṃ yastu brāhmaṇasya viciṃtayet //
taptakṛcchreṇa mucyeta manuḥ svāyaṃbhuvo'bravīt

vācayā pravadedyastu brāhmaṇasya vadhaṃ naraḥ //
cāṃdrāyaṇena śuddhiḥ syāttasya devo'bravīdidam

tasmānnāhaṃ kariṣyāmi tava vākyaṃ kathaṃcana //
vasiṣṭhārthaṃ tu yatproktaṃ kuru yattava rocate

tacchrutvā kupitastasyā viśvāmitro dvijottamāḥ //
śaśāpa tāṃ nadīṃ śreṣṭhāṃ yattadvakṣyāmi śrūyatām

yasmātpāpe vaco mahyaṃ na kṛtaṃ kunadi tvayā //
tasmādraktapravāhaste jalajo'yaṃ bhaviṣyati

evamuktvā karāttoyaṃ saptavārābhimaṃtritam //
cikṣepātha jale tasyāḥ krodhasaṃraktalocanaḥ

tataśca tatkṣaṇājjātaṃ tattoyaṃ rudhiraṃ dvijāḥ //
sārasvataṃ supuṇyaṃ ca yadāsīcchaṃkhasaṃnibham

etasminnaṃtare prāptā bhūtapretaniśācarāḥ //
pītvāpītvā pranṛtyaṃti gāyaṃti ca hasaṃti ca

ye tatra tāpasāḥ kecittaṭe tasyā vyavasthitāḥ //
te sarve'pi ca tāṃ tyaktā dūradeśaṃ samāśritāḥ

bahirvāsāśca ye tatra nāgarāḥ samavasthitāḥ //
caṇḍaśarma prabhṛtayaste'pi yātāḥ sudūrataḥ

vasiṣṭho'pi muniśreṣṭho jagāmārbudaparvatam //
viśvāmitrastu viprarṣiścamatkārapuraṃ gataḥ

hāṭakeśvaraje kṣetre yatsthitaṃ viprasaṃkulam //
tatrāśramapadaṃ kṛtvā tapastepe sudāruṇam

/
yena sṛṣṭikṣamo jātaḥ spardhate brahmaṇā saha //
etadvaḥ sarvamākhyātaṃ yathā sārasvataṃ jalam

rudhiratvamanuprāptaṃ viśvāmitrasya śāpataḥ //
caṃḍaśarmādayo viprā yathā deśāṃtaraṃ gatāḥ

iti śrīskāṃde mahāpurāṇa kāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye sarasvatīśāpavṛttāṃtavarṇanaṃnāma dvisaptatyuttaraśatatamo'dhyāyaḥ