Skanda Purana · Verses 5.65-2

// śrīhara uvāca // //
paṃcaṣaṣṭikasaṃkhyākaṃ viddhi brahmeśvaraṃ priye //
yasya darśanamātreṇa brahmaloko hyavāpyate

pulomānāma daityeṃdro mahābalaparākramaḥ //
paulomānāṃ sahasraistu pūjyamānaḥ sa tiṣṭhati

ānarcuste'pi taṃ daityaṃ sureśaṃ tridaśā iva //
sa kadācitsamakṣaṃ tu daityānāmidamabravīt

adyāpi lokapālānāmarkeṃdujvalanāṃbhasām //
śatakratorddhaneśasya yamasya varuṇasya ca

yadi nāma tataḥ kiṃ me tapasā jīvitena ca//
so'haṃ vidrāvayiṣyāmi sarvāneva divaukasaḥ

sarvairetaiḥ parivṛtaḥ paulomairbalavattaraiḥ//
ityuktvā gatavāndevi sāgaraṃ daityasaṃvṛtaḥ//
tāvacchayānaṃ sahasā hyapaśyanmadhusūdanam

śāradābhrasamābhāsaṃ madhyekālaṃ yathā ghanam //
tamālokya tato daityānabravīdanugāṃstathā

ayaṃ sa dānavagirivajro hi madhusūdanaḥ //
kīrttikāṃtākalākelivaidhavyādeśako dviṣām

daityasīmaṃtinīkāṃtapatravallīprabhaṃjakaḥ //
ayamasmajjayavadhūvaidhavyādeśakaḥ paraḥ

gataśaṃkaḥ svapityekaḥ sarvadā kuṭilāśayaḥ //
haṃtavyastvarayā duṣṭaḥ kāṃkṣito darśanaṃ gataḥ

ityuktvā sa hi daityeṃdraḥ pulomātiruṣānvitaḥ //
abhidudrāva vegena tāvadagre pitāmaham //
dadarśa nābhikamale cintayānaṃ punaḥpunaḥ

atha vyākulatāṃ prāpto brahmā dṛṣṭvā tadadbhutam //
āyāṃtaṃ daityasiṃhānāṃ sainyaṃ raṇasudurjayam //

atha bodhaṃ gataḥ kṣipraṃ kaiṭabhārirmahābalaḥ //
dadarśāgre pulomaṃ tu svasainyaparivāritam

ajeyaḥ saṃgare dhīro brahmāṇamidama bravīt

// viṣṇuruvāca // //
pulomasya vināśārthamudyogaḥ kriyatāmiti //
asau labdhavaro daityaḥ sahasā māṃ vijeṣyati

tasmādgaccha tvarāyukto mahākālavane śubhe //
liṃgaṃ drakṣyasi tatraiva saptakalpodbhavaṃ param

uttare cyavaneśasya śivaśaktisamanvitam //
tasya liṃgasya māhātmyādbalaṃ prāpsyati śāśvatam

kuṇḍeśvarakarasparśakāri vāri niraṃtaram //
tadānaya gṛhītvā tu tenāyaṃ vadhyatāmiti

iti tasya vacaḥ śrutvā brahmā lokapitāmahaḥ //
ājagāma muhūrtena yatra talliṃgamuttamam

stutiṃ cakāra sahasā dṛṣṭvā bhaktyā pitāmahaḥ //

// brahmovāca // //
namaste divyarūpāya namaste bahurūpiṇe //
namo'viṣahyavīryāya namo viśvakriyātmane

namaḥ piṃgakaparddāya namaḥ khaṃḍeṃdudhāriṇe//
namaḥ kanakavarṇāya namo vananivāsine

vaṃde tvāṃ bhūtabharttāraṃ sadā śatruvināśanam //
raṇatkanakakeyūraṃ dhṛtapūrṇeṃdumaṃḍa lam

vande tvāṃ tridaśādhyakṣaṃ viśvādhyakṣaṃ maheśvaram //
kṣīṇasaṃsāraduḥkhaughaṃ munidhyātapadaṃ sadā

vaṃde tvāṃ sarvadā devaṃ daityasaṃghātanāśanam //
ṭaṃkapaṭṭiśaśūlāgradhanuḥkhaḍgagadādharam

evaṃ stutaḥ sa bhagavām̐lliṃgarūpī maheśvaraḥ //
kiṃcitsmitamukhaḥ prāha brahmāṇaṃ lokakāraṇam

kiṃ te'bhīṣṭaṃ karomyadya kiṃ dadāmi pitāmaha //
kasmātstauṣi muniśreṣṭha kasmādārto'si dṛśyase //

iti liṃgavacaḥ śrutvā kathitaṃ brahmaṇā tadā //
vṛttāṃtaṃ vistarātsarvaṃ liṃgenoktaṃ tadā priye

jalaṃ gṛhāṇa vāṇīśa śastrajaṃ śatruvāraṇam //
haniṣyasi kṣaṇenaiva pulomaṃ sahasainyakam

ityuktaḥ satvaro brahmā gato yatra janārddanaḥ //
jalena tena tāndai tyānpātayāmāsa bhūtale

sa pulomā mahānāsītsvārociṣeṃ'tare manau //
kṛṣṇo'pi brahmaṇā sārddhamājagāma kuśasthalīm

dadarśa tatra talliṃgaṃ nāma cakre janārddanaḥ //
brahmaṇā saṃstuto devo mamānugrahakāraṇāt //
tasmādbrahmeśvaronāma khyātiṃ lokeṣu yāsyati

ye drakṣyaṃti narā bhaktyā devaṃ brahmeśvaraṃ śivam//
te brahmalokamākramya sameṣyanti mamāntikam

yastu paśyetprasaṃgena devaṃ brahmeśvaraṃ śivam //
kṛtakṛtyaḥ sa puruṣo na śocenmaraṇaṃ sadā

yaḥ puṣkaraṃ naro gatvā tapo varṣaśataṃ caret //
anyo brahmeśvaraṃ paśyettasya puṇyaṃ tato'dhikam

paṃcapātakasaṃyukto yo marttyo duṣṭamānasaḥ //
sopi gacchecchivaṃ sthānaṃ dṛṣṭvā brahmeśvaraṃ śivam

cāṃdrāyaṇānāṃ vidhivaddaśānāmeva yatphalam //
tatphalaṃ samavāpnoti brahmeśvarasya darśanāt

ityuktvā gatavānviṣṇurvaikuṃṭhaṃ śāśvataṃ priye //
brahmalokaṃ jagāmātha brahmā lokapitāmahaḥ

eṣa te kathito devi prabhāvaḥ pāpanāśanaḥ //
brahmeśvarasya devasya jalpeśvaramatho śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye brahmeśvaramāhātmyavarṇanaṃnāma paṃcaṣaṣṭitamo'dhyāyaḥ