Skanda Purana · Verses 5.65-3

śrīmārkaṇḍeya uvāca -
tato gacchettu rājendra ānandeśvaramuttamam /
tattīrthaṃ kathayiṣyāmi sarvapāpakṣayaṃkaram

yudhiṣṭhira uvāca -
ānandaścaiva saṃjāto rudrasya dvijasattama /
kathyatāṃ me ca tatsarvaṃ saṃkṣepātsaha bāndhavaiḥ

śrīmārkaṇḍeya uvāca -
kathayāmi nṛpaśreṣṭha ānandeśvaramuttamam /
dānavānāṃ vadhaṃ kṛtvā devadevo maheśvaraḥ

pūjito daivataiḥ sarvaiḥ kinnarairyakṣapannagaiḥ /
ānandasaṃyuto devo nanarta vṛṣavāhanaḥ

bhairavaṃ rūpamāsthāya gauryā cārddhāṅgasaṃsthitaḥ /
bhūtavetālakaṅkālairbhairavairbhairavo vṛtaḥ

nanarta narmadātīre dakṣiṇe pāṇḍunandana /
tuṣṭairmarudgaṇaiḥ sarvaiḥ sthāpitaḥ kamalāsanaḥ

tadāprabhṛti tattīrthamānandeśvaramucyate /
aṣṭamyāṃ ca caturdaśyāṃ paurṇamāsyāṃ narādhipa

vidhivaccārcayeddevaṃ sugandhena vilepayet /
brāhmaṇānpūjayettatra yathāśaktyā yudhiṣṭhira

godānaṃ tatra kartavyaṃ vastradānaṃ śubhāvaham /
vasantasya trayodaśyāṃ śrāddhaṃ tatraiva kārayet

iṅgudairbadarairbilvairakṣataiśca jalena vā /
pretānāṃ kārayecchrāddhamānandeśvara uttame

ānanditā bhaveyuste yāvadābhūtasamplavam /
santatervai na vicchedaḥ saptajanmasu jāyate /
ānando hi bhavatteṣāṃ pratijanmani bhārata

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ānandeśvaratīrthamāhātmyavarṇanaṃ nāma pañcaṣaṣṭitamo'dhyāyaḥ //