Skanda Purana · Verses 5.47-2

// śrīdevadeva uvāca // //
saptādhikaṃ vijānīhi nūpureśvarasaṃjñakam //
yasya darśanamātreṇa prāpyaṃte sarvasiddhayaḥ //

purā rāthantare kalpe nūpuronāma vai gaṇaḥ //
rudrabhaktiparonityaṃ paṃcamudrāvibhūṣitaḥ

sa ekadā kuberasya sabhāyāṃ prāpya saṃsthitaḥ //
draṣṭuṃ mahotsavaṃ tatra apsarobhiḥ kṛtaṃ tadā

nanṛtuścāparāstatra hyurvaśī yoṣitāṃ varā //
raṃbhā tilottamā menā nanṛturharṣasaṃyutāḥ

tāsāṃ nṛtyaṃ tadā vīkṣya nūpuro gaṇapastadā //
kāmabāṇārdito nūnaṃ tāsāṃ madhye nanartta ha

nṛtyamānastato hṛṣṭaḥ puṣpagu cchena vakṣasi //
urvaśīṃ tāḍayāmāsa kāmabāṇaprapīḍitaḥ

urvaśī tu tataḥ kruddhā puṣpagucchena tāḍitā //
jagāma śaraṇaṃ devaṃ dhanadaṃ sarvakāmadam

uvāca dhanadastatra krodhenākulamānasaḥ

yasmāttvayā raṃgabhaṃgaḥ kṛtaḥ kāmārdditena vai //
tasmāttvaṃ mānuṣe loke patasva pāpapūruṣa

kuberasya ca śāpāttu jagāma dharaṇītalam //
vilalāpa suduḥkhārttaḥ kiṃ kṛtaṃ pāpinā mayā

vilapya subhṛśaṃ so'tha śaraṇaṃ parameśvarīm //
jagāma manasā devi tvāṃ sa vai varadāyinīm

tvaṃ tuṣṭā tu tadā jātā pratyakṣā parameśvarī //
uvāca gaṇapaṃ prītyā bhaktinamraṃ tadā bhuvi

gaccha putra mamādeśānmahākālavanaṃ śubham //
prācīsarasvatī tatra vāpyākārā ca vidyate

tasyā dakṣiṇato vatsa vidyate liṃgamuttamam //
vāpyāṃ snātvā ca talliṃgaṃ samārādhaya bhaktitaḥ

sā prācī sa ca deveśastvannāmnā khyātimeṣyati //
ityukto nūpuro devi mahākālavanaṃ gataḥ

tvayā ca prerito devi kīrtyarthaṃ tatra gamyatām //
ityukto nūpuro divyo gaṇo hṛṣṭaḥ kṛtāṃjaliḥ

mahākālavanaṃ ramyaṃ devagaṃdharvasevitam //
dadarśa tatra talliṃgaṃ suragandharvasevitam

prācī sarasvatī tatra vāpyākārā ca saṃsthitā //
tasyāṃ snātvā tato devaṃ pūjayāmāsa nūpuraḥ

tato devaḥ prasannātmā pratyuvācātha nūpuram//
sādhu nūpura bhadraṃ te svasti prāpnuhi sarvadā //

bhavitā vallabho devyāḥ pārvatyāḥ śaṃkarasya ca //
ityuktastena liṃgena tatkṣaṇānnūpuraḥ priye

uditādityasaṃkāśo vibhāvasusama dyutiḥ //
tejorāśiśca saṃjāto durnirīkṣyastriviṣṭapaiḥ

prabhāvaṃ tādṛśaṃ dṛṣṭvā devairuktaṃ varānane //
aho liṃgasya māhātmyaṃ dṛśyatetyadbhutaṃ bhuvi

prāptā ca kāmikī siddhirnūpureṇa ca darśanāt //
ato devo'dyaprabhṛti vikhyāto bhūtale'bhavat

sarvakāmaprado nityaṃ nūpureśvara nāmataḥ //
darśanaṃ ye kariṣyaṃti snātvā vāpyāṃ samāhitāḥ

nūpureśvararudrasya te yāṃti paramaṃ padam //
ye ca pūjāṃ kariṣyaṃti bhaktibhāvasama nvitāḥ //
vasaṃti muditāḥ sarve yāvadābhūtasaṃplavam

janmamṛtyujarārogaduḥkhāni vividhāni ca //
prayāṃti vilayaṃ sadyaḥ pūjite nūpureśvare

vāpī gaṃgāsamā sā tu svayameva śubhekṣaṇe //
saṃgamastu vitastāyāṃ yamunāyāstu suvrate //
prayāgametajjānīhi bhūdhareṃdrāṃgasaṃbhave

/
somatīrthaṃ tadā devi sarvapātakanāśanam //
tatra snātvā pumāndevi vājapeyaphalaṃ labhet

kṛṣṇāṣṭamyāṃ ca yaḥ snātvā pūjayennūpureśvaram //
kulaṃ vai tārayetsopi mātṛkaṃ pitṛkaṃ śatam

eṣa te kathito devi prabhāvaḥ pāpanāśanaḥ //
nūpureśvaradevasya śrūyatāmabhayeśvaram

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṃgamāhātmye nūpureśvaramāhātmyavarṇanaṃnāma saptacatvāriṃśo 'dhyāyaḥ