Skanda Purana · Verses 5.47-3

śrīmārkaṇḍeya uvāca -
gīrvāṇāśca tataḥ sarve brahmāṇaṃ śaraṇaṃ gatāḥ /
gajairgirivarākārairhayaiścaiva gajopamaiḥ

syandanairnagarākāraiḥ siṃhaśārdūlayojitaiḥ /
kacchapairmahiṣaiścānyairmakaraiśca tathāpare

brahmalokamanuprāptā devāḥ śakrapurogamāḥ /
dṛṣṭvā padmodbhavaṃ devaṃ sāṣṭāṅgaṃ praṇatāḥ surāḥ

devā ūcuḥ /
jaya deva jagadvandya jaya saṃsṛtikāraka /
padmayone suraśreṣṭha tvāmeva śaraṇaṃ gatāḥ

sodvegaṃ bhāṣitaṃ śrutvā devānāṃ bhāvitātmanām /
meghagambhīrayā vācā devarājamuvāca ha

kimatrāgamanaṃ devāḥ sarveṣāṃ vai vivarṇatā /
kenāpamānitāḥ sarve śīghraṃ me kathyatāṃ svayam

devā ūcuḥ /
andhakākhyo mahādaityo balavān padmasambhava /
tena devagaṇāḥ sarve dhanaratnairviyojitāḥ

hatvā devagaṇāṃstāvadasicakraparaddviśvadhaiḥ /
gṛhītvā śakrabhāryāṃ sa dānavo'pi gato balāt

devānāṃ vacanaṃ śrutvā brahmā lokapitāmahaḥ /
cintayāmāsa rājendra vadhārthaṃ dānavasya ha

avadhyo dānavaḥ pāpaḥ sarveṣāṃ vo divaukasām /
sa trātā sarvajagatāṃ nānyo vidyeta kutracit

evamuktāḥ surāḥ sarve brahmaṇā tadanantaram /
brahmāṇaṃ te puraskṛtya gatā yatra sa keśavaḥ /
tuṣṭuvurvividhaiḥ stotrairbrahmādyāścakrapāṇinam

devā ūcuḥ /
jaya tvaṃ devadeveśa lakṣmyā vakṣaḥsthalāśritaḥ /
asurakṣaya deveśa vayaṃ te śaraṇaṃ gatāḥ

stūyamānaḥ suraiḥ sarvairbrahmādyaiśca janārdanaḥ /
samprahṛṣṭamanā bhūtvā surasaṅghamuvāca ha

śrīvāsudeva uvāca -
svāgataṃ devaviprāṇāṃ suprabhātādya śarvarī /
kiṃ kāryaṃ procyatāṃ kṣipraṃ kasya ruṣṭā divaukasaḥ

kiṃ duḥkhaṃ kaśca saṃtāpaḥ kuto vā bhayamāgatam /
kathayantu mahābhāgāḥ kāraṇaṃ yanmanogatam

parābhavaḥ kṛto yena so'dya yātu yamālayam /
evamuktāstu kṛṣṇena kathayāmāsurasya tat

darśayantaḥ svakāndehān lajjamānā hyadhomukhāḥ /
hṛtarājyā hyandhakena kṛtā nistejasaḥ prabho

piteva putraṃ parirakṣa deva jahīndraśatruṃ saha putrapautraiḥ /
tatheti coktaḥ kamalāsanena surāsurairvanditapādapadmaḥ

śaṅkhaṃ cakraṃ gadāṃ cāpaṃ saṃgṛhya parameśvaraḥ /
utthito bhogaparyaṅkāddevānāṃ puratastadā

śrīvāsudeva uvāca -
pātāle yadi vā martye nāke vā yadi tiṣṭhati /
taṃ haniṣyāmyahaṃ pāpaṃ yena saṃtāpitāḥ surāḥ

svaṃ sthānaṃ yāntu gīrvāṇāḥ saṃtuṣṭā bhāvitaujasaḥ /
viṣṇostadvacanaṃ śrutvā brahmādyāste savāsavāḥ

svayānaistu hariṃ natvā hṛdi tuṣṭā divaṃ yayuḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe gīrvāṇasvargamanavarṇanaṃ nāma saptacatvāriṃśo'dhyāyaḥ //