Skanda Purana · Verses 5.34-3

śrīmārkaṇḍeya uvāca -
tatraiva tu bhavedanyadādityasya mahātmanaḥ /
kīrtayāmi naraśreṣṭha yadi te śravaṇe matiḥ

yudhiṣṭhira uvāca -
etadāścaryamatulaṃ śrutvā tava mukhodgatam /
vismayāddhṛṣṭaromāhaṃ jāto'smi munisattama

sahasrakiraṇo devo hartā kartā nirañjanaḥ /
avatāreṇa lokānāmuddhartā narmadātaṭe

puruṣākāro bhagavānutāho tapasaḥ phalāt /
kasya gotre samutpannaḥ kasya devo'bhavadvaśī

śrīmārkaṇḍeya uvāca -
kulikānvayasambhūto brāhmaṇo bhaktimāñchuciḥ /
īkṣyāmīti raviṃ tatra tīrthe yātrākṛtodyamaḥ

yojanānāṃ śataṃ sāgraṃ nirāhāro gatodakaḥ /
prasthito devadevena svapnānte vāritaḥ kila

bhobho mune mahāsattva alaṃ te vratamīdṛśam /
sarvaṃ vyāpya sthitaṃ paśya sthāvaraṃ jaṅgamaṃ ca mām

tapāmyahaṃ tato varṣaṃ nigṛhṇāmyutsṛjāmi ca /
na mṛ(bhṛ?)taṃ caiva mṛtyuṃ ca yaḥ paśyati sa paśyati

varaṃ varaya bhadraṃ tvamātmano yastavepsitam

brāhmaṇa uvāca -
yadi tuṣṭo'si me deva deyo yadi varo mama /
uttare narmadākūle sadā saṃnihito bhava

ye bhaktyā parayā deva yojanānāṃ śate sthitāḥ /
smariṣyanti jitātmānasteṣāṃ tvaṃ varado bhava

kubjāndhabadhirā mūkā ye kecidvikalendriyāḥ /
tava pādau namasyanti teṣāṃ tvaṃ varado bhava

śīrṇaghrāṇā gatadhiyo hyasthicarmāvaśeṣitāḥ /
teṣāṃ tvaṃ karuṇāṃ deva acireṇa kuruṣva ha

ye'pi tvāṃ narmadātoye snātvā tatra dine dine /
arcayanti jagannātha teṣāṃ tvaṃ varado bhava

prabhāte ye staviṣyanti stavairvaidikalaukikaiḥ /
abhipretaṃ varaṃ deva teṣāṃ tvaṃ dada bhocyuta

tavāgre vapanaṃ deva kārayanti narā bhuvi /
svāmiṃsteṣāṃ varo deya eṣa me paramo varaḥ

evamastviti taṃ coktvā muniṃ karuṇayā punaḥ /
śatabhāgena rājendra sthitvā cādarśanaṃ gataḥ

tatra tīrthe naro bhaktyā gatvā snānaṃ samācaret /
tarpayetpitṛdevāṃśca so'gniṣṭomaphalaṃ labhet

agnipraveśaṃ yaḥ kuryāttasmiṃstīrthe narādhipa /
dyotayanvai diśaḥ sarvā agnilokaṃ sa gacchati

yastattīrthaṃ samāsādya tyajatīha kalevaram /
sa gato vāruṇaṃ lokamityevaṃ śaṅkaro'bravīt

tatra tīrthe tu yaḥ kaścitsaṃnyāsena tanuṃ tyajet /
ṣaṣṭivarṣasahasrāṇi svargaloke mahīyate

apsarogaṇasaṃkīrṇe divyaśabdānunādite /
uṣitvāyāti martye vai vedavedāṅgavidbhavet

vyādhiśokavinirmukto dhanakoṭipatirbhavet /
putradārasamopeto jīvecca śaradaḥ śatam

prātarutthāya yastatra smarate bhāskaraṃ tadā /
ājanmajanitātpāpānmucyate nātra saṃśayaḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ravitīrthavarṇanaṃ nāma catustriṃśo'dhyāyaḥ //