Skanda Purana · Chapter 5.35

// sanatkumāra uvāca // //
svarṇakṣure naraḥ snātvā dṛṣṭvā devaṃ maheśvaram //
kapilāśatadānasya phalamapyadhikaṃ bhavet

vāpyāṃ pitāmaha syāpi yaḥ snāyādvijiteṃdriyaḥ //
haṃsayuktena yānena brahmalokaṃ sa gacchati

tailābhidhānamātṝṇāṃ rātrau yacchati yo balim //
tasya siddhirbhave tsadyo mṛtaḥ śivapuraṃ yajet

viṣṇuvāpyāṃ naraḥ snātvā caitre vā phālgune'thavā //
jāgaraṃ yastu kurvīta sopavāso jitendriyaḥ //
mucyate sarva pāpebhyo viṣṇulokaṃ sa gacchati

abhayeśvaradevasya bhaktyā niyatamānasaḥ //
pūjābandhamatho dṛṣṭvā rudralokaṃ sa gacchati

loke tu jāyate dātā sārvabhaumo mahīpatiḥ //
yastvagastveśvaraṃ gacchedekacitto naro mune

dṛṣṭvāgastyeśvaraṃ devaṃ sopavāso jiteṃdriyaḥ //
agastyodayavelāyāṃ mucyate sarvapātakaiḥ

kṛtvāgastyaṃ ca sauvarṇaṃ raupyaṃ vātha svaśaktitaḥ //
pañcaratnasamāyuktaṃ vastreṇa ca samanvitam

tatkālīnaiḥ phalaiḥ puṣpaiḥ pūjanīyo vidhānataḥ //
vidhānaṃ tasya vakṣyāmi cāturvarṇye dvijottama

saptadhānyāni mukhyāni tāvantyeva phalāni ca //
ekaṃ dhānyaṃ phalaṃ caikamagre tyājyaṃ bhavenmune

yāvadvai sapta varṣāṇi vratamevaṃ samācaret

// arghyamantraḥ // //
kāśapuṣpapratīkāśa vahnimārutasaṃ bhava //
mitrāvaruṇayoḥ putra kumbhayone namo'stu te

datte'rghe yatphalaṃ vyāsa tadvai hyekamanāḥ śṛṇu //
putravāndhanavāṃścaiva jāyate nātra saṃśayaḥ

mṛtaḥ svargamavāpnoti saṃpanne jāyatekule //
martyalokaṃ punaḥ prāpya mahāyogīśvaro bhavet

yaścaitacchṛṇuyānnityaṃ paṭhedvā susamāhitaḥ//
sarvapāpavinirmukto muniloke sa modate

// iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtya khaṇḍe'vantīkṣetramāhātmye'gastyeśvaramāhātmyavarṇanaṃnāma pañcatriṃśo'dhyāyaḥ