સ્કંદ પુરાણ · શ્લોક 5.34-3

શ્રીમાર્કણ્ડેય ઉવાચ -
તત્રૈવ તુ ભવેદન્યદાદિત્યસ્ય મહાત્મનઃ ।
કીર્તયામિ નરશ્રેષ્ઠ યદિ તે શ્રવણે મતિઃ

યુધિષ્ઠિર ઉવાચ -
એતદાશ્ચર્યમતુલં શ્રુત્વા તવ મુખોદ્ગતમ્ ।
વિસ્મયાદ્ધૃષ્ટરોમાહં જાતોઽસ્મિ મુનિસત્તમ

સહસ્રકિરણો દેવો હર્તા કર્તા નિરઞ્જનઃ ।
અવતારેણ લોકાનામુદ્ધર્તા નર્મદાતટે

પુરુષાકારો ભગવાનુતાહો તપસઃ ફલાત્ ।
કસ્ય ગોત્રે સમુત્પન્નઃ કસ્ય દેવોઽભવદ્વશી

શ્રીમાર્કણ્ડેય ઉવાચ -
કુલિકાન્વયસમ્ભૂતો બ્રાહ્મણો ભક્તિમાઞ્છુચિઃ ।
ઈક્ષ્યામીતિ રવિં તત્ર તીર્થે યાત્રાકૃતોદ્યમઃ

યોજનાનાં શતં સાગ્રં નિરાહારો ગતોદકઃ ।
પ્રસ્થિતો દેવદેવેન સ્વપ્નાન્તે વારિતઃ કિલ

ભોભો મુને મહાસત્ત્વ અલં તે વ્રતમીદૃશમ્ ।
સર્વં વ્યાપ્ય સ્થિતં પશ્ય સ્થાવરં જઙ્ગમં ચ મામ્

તપામ્યહં તતો વર્ષં નિગૃહ્ણામ્યુત્સૃજામિ ચ ।
ન મૃ(ભૃ?)તં ચૈવ મૃત્યું ચ યઃ પશ્યતિ સ પશ્યતિ

વરં વરય ભદ્રં ત્વમાત્મનો યસ્તવેપ્સિતમ્

બ્રાહ્મણ ઉવાચ -
યદિ તુષ્ટોઽસિ મે દેવ દેયો યદિ વરો મમ ।
ઉત્તરે નર્મદાકૂલે સદા સંનિહિતો ભવ

યે ભક્ત્યા પરયા દેવ યોજનાનાં શતે સ્થિતાઃ ।
સ્મરિષ્યન્તિ જિતાત્માનસ્તેષાં ત્વં વરદો ભવ

કુબ્જાન્ધબધિરા મૂકા યે કેચિદ્વિકલેન્દ્રિયાઃ ।
તવ પાદૌ નમસ્યન્તિ તેષાં ત્વં વરદો ભવ

શીર્ણઘ્રાણા ગતધિયો હ્યસ્થિચર્માવશેષિતાઃ ।
તેષાં ત્વં કરુણાં દેવ અચિરેણ કુરુષ્વ હ

યેઽપિ ત્વાં નર્મદાતોયે સ્નાત્વા તત્ર દિને દિને ।
અર્ચયન્તિ જગન્નાથ તેષાં ત્વં વરદો ભવ

પ્રભાતે યે સ્તવિષ્યન્તિ સ્તવૈર્વૈદિકલૌકિકૈઃ ।
અભિપ્રેતં વરં દેવ તેષાં ત્વં દદ ભોચ્યુત

તવાગ્રે વપનં દેવ કારયન્તિ નરા ભુવિ ।
સ્વામિંસ્તેષાં વરો દેય એષ મે પરમો વરઃ

એવમસ્ત્વિતિ તં ચોક્ત્વા મુનિં કરુણયા પુનઃ ।
શતભાગેન રાજેન્દ્ર સ્થિત્વા ચાદર્શનં ગતઃ

તત્ર તીર્થે નરો ભક્ત્યા ગત્વા સ્નાનં સમાચરેત્ ।
તર્પયેત્પિતૃદેવાંશ્ચ સોઽગ્નિષ્ટોમફલં લભેત્

અગ્નિપ્રવેશં યઃ કુર્યાત્તસ્મિંસ્તીર્થે નરાધિપ ।
દ્યોતયન્વૈ દિશઃ સર્વા અગ્નિલોકં સ ગચ્છતિ

યસ્તત્તીર્થં સમાસાદ્ય ત્યજતીહ કલેવરમ્ ।
સ ગતો વારુણં લોકમિત્યેવં શઙ્કરોઽબ્રવીત્

તત્ર તીર્થે તુ યઃ કશ્ચિત્સંન્યાસેન તનું ત્યજેત્ ।
ષષ્ટિવર્ષસહસ્રાણિ સ્વર્ગલોકે મહીયતે

અપ્સરોગણસંકીર્ણે દિવ્યશબ્દાનુનાદિતે ।
ઉષિત્વાયાતિ મર્ત્યે વૈ વેદવેદાઙ્ગવિદ્ભવેત્

વ્યાધિશોકવિનિર્મુક્તો ધનકોટિપતિર્ભવેત્ ।
પુત્રદારસમોપેતો જીવેચ્ચ શરદઃ શતમ્

પ્રાતરુત્થાય યસ્તત્ર સ્મરતે ભાસ્કરં તદા ।
આજન્મજનિતાત્પાપાન્મુચ્યતે નાત્ર સંશયઃ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે રવિતીર્થવર્ણનં નામ ચતુસ્ત્રિંશોઽધ્યાયઃ ॥