Skanda Purana · Verses 5.34-2

// śrīhara uvāca // //
catustriṃśattamaṃ viddhi devaṃ vai kaṃthaḍeśvaram //
yasya darśanamātreṇa sarvapāpaiḥ pramucyate

vitastāyāstaṭe ramye brāhmaṇo nivasanpurā //
babhūva pāṃḍavonāma daridreṇātipīḍitaḥ

jñātibhiśca parityakto duṣṭayā bhāryayā tathā //
kaṃthāpyekā sthitā yasya sarvasvapremadhāriṇī

tenāhaṃ sutakāmena toṣito girigahvare //
mayāpyuktaṃ viśālākṣi putrastava bhaviṣyati

tasya putraḥ samutpannaḥ kaṃthāmadhyādayo nijaḥ //
śītoṣṇavāriṇī kaṃthā tasya putrasya sā'bhavat

sa ca labdhaḥ prasādena madīyena varānane //
rudreṇa ca varo dattaḥ kaṃthāyā bhavitā punaḥ

atha ṣaṣṭhe gate varṣe mauṃjībaṃdhamaciṃtayat //
tadāmaṃtrya munīnsarvānprasādya ca punaḥ punaḥ //
namaskṛtya ṛṣīnsarvānpūjayāmāsa bhaktitaḥ

phalairvittānusāreṇa mauṃjī tasyāpyabaṃdhata //
te'pyuktā munayaḥ sarve prasādya ca punaḥpuna

dīyatāmāśiṣo hyasmai putrāya munisattamāḥ //
mama putrasya putro'yaṃ dīrghāyurjāyatāṃ ciram

tūṣṇīṃbhūyaḥ sthitāḥ sarve tacchrutvā nottaraṃ daduḥ //
yadā te nottaraṃ procustadā munivaraḥ svayam //
dhyānena ciṃtayāmāsa nūnamalpāyuṣaṃ sutam

iti jñātvā tu saṃmohamagamatsahasā muniḥ //
vilalāpa sa duḥkhārttaḥ sutasnehena duḥkhitaḥ

// vāḍava uvāca// //
dattaḥ svayaṃ maheśena mamālpāyuḥ kathaṃ sutaḥ //
rudreṇa ca varo dattaḥ prasannena purā mama

mattulyavīryaḥ putraste kaṃthāmadhyādbha viṣyati //
jātaṃ ca dattvā hyalpāyuṃ mithyā tryakṣasya tadvacaḥ

pitaraṃ duḥkhitaṃ dṛṣṭvā tūṣṇīṃbhūto munistadā //
sa bālaḥ sahasā vākyaṃ babhāṣe harṣavarddhanam

tyajata bhayamidānīṃ yanmamārthe viṣaṇṇā vinihatanijayatnaṃ pretarājaṃ karomi //
śṛṇuta mama giraṃ bhoḥ seśvarā lokapālāḥ pitṛpativijayārthaṃ satpratijñā mamaiṣā

ativiṣamatapobhiḥ śaṃkaraṃ toṣayitvā svapiturapi ca bhaktyā hanmi mṛtyorjayāśām //
kimatiśayaviṣāda vyākulāstāta sarve sapadi pitṛpatiṃ taṃ sve vaśe sthāpayāmi

prayāmi rudraṃ śaraṇaṃ maheśvaraṃ devaṃ varaṃ cāpyumayā'vihīnam //
śṛṇvaṃtu sarve munayaḥ samaṃtānna mādṛśe mṛtyuparābhavosti

tapobhirugraiḥ śitikaṃṭhapādau prasādya mṛtyuṃ na cirādvineṣye //
kaṃthājavākyāmṛtalolanetrāḥ saṃjātaromāṃ calasatsvadehāḥ

papracchurenaṃ munayaḥ śiśuṃ taṃ jānāsi rudraṃ paramaṃ kathaṃ tvam //
vayaṃ ciraṃ kālamupāsamānāstapobhirugrairvratasaṃcayaiśca

tathāpi vidmo na vayaṃ maheśaṃ jñātastvayāsau kathamarbhakeṇa //
īhāmahe taṃ kila putra samyakchrotuṃ praharṣādbhutajātaromāḥ

jñātastvayā kutra kathaṃ maheśo maheśvaro vai bhuvanaikanāthaḥ

iti teṣāṃ vacaḥ śrutvā munīnāṃ bhāvitātmanām //
sa bālaḥ kathayāmāsa vṛttāṃtaṃ parvatātmaje

mamātra krīḍataḥ siddhaḥ siddhidaḥ samupāgataḥ //
vijñāyālpāyuṣaṃ māṃ tu vātsalyādabravīdidam

gaccha putra mamādeśānmahākālavanottame //
dakṣiṇe cāsti yalliṃgamānaṃdeśvaraliṃgataḥ

tamārādhaya śīghraṃ tvaṃ cirajīvī bhaviṣyasi //
tasyopadeśadānena jñātaṃ samyaṅmaheśvarāt

nānyo devosti lokeṣu satyaṃ satyaṃ munīśvarāḥ //
tasmādadyaiva yāsyāmi mahākālavane śubhe

liṃgamārādhayiṣyāmi viṣādastyajyatāmiha //
tasya tadvacanaṃ śrutvā tena sārddhaṃ maharṣayaḥ

pitā ca vismito devi sarva eva samāgatāḥ //
devamārādhayāmāsa bālaḥ kālajighāṃsayā

liṃgamadhyāttato vāṇī niḥsṛtā parvatātmaje //
aho tuṣṭosmi te vatsa kaṃ kāmaṃ pradadāmyaham

// bāla uvāca // //
yadi tuṣṭo'si me deva ye tvāṃ paśyaṃti śaṃkara //
pāpakaṃthāvinirmuktāste saṃtu cirajīvinaḥ

bālasya bhāṣitaṃ śrutvā liṃge noktaṃ yaśasvini //
ye ca māṃ pūjayiṣyaṃti śraddhayā parayā yutāḥ //
te bhaviṣyaṃti satataṃ jarāmaraṇavarjitāḥ

lapsyaṃte paramānkāmānbhaviṣyaṃti gaṇottama //
pūjyāḥ sarveṣu lokeṣu sarvālaṃkārabhūṣitāḥ

evaṃ labdhavaraḥ kaṃthaḥ prāṃjaliḥ samupasthitaḥ //
liṃgenoktaḥ prasannena bhūyo varaya suvrata

varo vai durlabho loke devadānavaguhyakaiḥ //
mayāvatārito yasmānnāstyadeyaṃ tavādhunā

bālenokto mahādeva yadi deyo varaḥ punaḥ //
mannāmnā deva te khyātirbhūyāttribhuvane bhuvi

evamastviti liṃgena proktaṃ tuṣṭena pārvati //
tadāprabhṛti deveśo vikhyātaḥ kaṃthaḍeśvaraḥ //
yasya darśanamātreṇa cirāyurjāyate naraḥ

yaḥ samīkṣati talliṃgaṃ kaṃthaḍeśvaramīśvaram

pāpakaṃthāvinirmukto muktiṃ yāsyati gauri saḥ //
puṇyaṃ yaśasyaṃ geyaṃ talliṃgaṃ pāpapraṇāśanam //
punāti pātakānsarvānmama nāmānukīrtanāt

te'dhanyāḥ puruṣā loke teṣāṃ janma nirarthakam//
yairna dṛṣṭo mahākāle devo'sau kaṃthaḍeśvaraḥ

eṣa te kathito devi prabhāvaḥ pāpanāśanaḥ //
kaṃthaḍeśvaradevasya indreśvaramatho śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṇḍe caturaśītiliṅgamāhātmye kaṃthaḍeśvaramāhātmyavarṇanaṃnāma catustriṃśo'dhyāyaḥ