Skanda Purana · Verses 5.20-2

// īśvara uvāca // //
pratīhāreśvaraṃ devi viddhi viṃśatimaṃ priye //
yasya darśanamātreṇa dhanavāniha jāyate

dakṣakopāttvaṃ ca devi purā prāṇairvisarjitaiḥ //
himācale tathā jātā mayā prāptā punaḥ priye

prārabdhā ca mayā devi tvayā sārddhaṃ ratistadā //
divyaṃ varṣaśataṃ jātaṃ sāgraṃ devi pramodataḥ //
anurāgavaśāccaiva manmathena prapīḍitā

mahāratiṃ samīkṣyātha devāḥ saṃkṣubdhamānasāḥ //
cakrurmaṃtraṃ yathākālaṃ vāsavādyā yathocitam

divyaṃ varṣaśataṃ rudro gauryā saha sadā ratim //
kurvaṃstiṣṭhati devo'sau maṃdare cārukaṃdare

anayorbījasaṃpatyoḥ putro yo hi bhavettadā //
vinaśyettena trailokyamakhilaṃ ca na saṃśayaḥ

tasya tejopi no voḍhuṃ samarthā niścitaṃ vayam //
tasmāttatkriyatāṃ karma ratiryeno paśāmyati

upāyaṃ dṛṣṭavāṃstatra devānāṃ gururagraṇīḥ //
bṛhaspatirmahātejā vedaśāstrārthapāragaḥ

gacchaṃtu tridaśāḥ sarve śivasya tu samīpataḥ//
svayaṃ vijñāpyatāṃ devastatkarma na kariṣyati

iti niścitya te devi jagmuḥ śīghraṃ surāstadā//
maṃdarādreḥ śubhe dvāri sthitāste vismayānvitāḥ

gaṇānāmadhipo naṃdī dvāri tiṣṭhati yatnataḥ//
tvayā sārddhamahaṃ devi kurvaṃstiṣṭhāmi tāṃ ratim

atha praveśo devānāṃ duṣkaro mama pārśvataḥ //
tadā ciṃtayamānāśca tatra tiṣṭhaṃti te surāḥ

agninā taddhitaṃ vākyamuktaṃ teṣāṃ puraḥ śubham //
haṃsarūpaṃ samāsthāya yāsyāmi śivasannidhau

vaṃcayitvā pratīhāraṃ kṛtaṃ tena tathaiva ca//
haṃsarūpeṇa kathitaṃ karṇe mama śucismite

indrādyā amarā devā dvāri tiṣṭhaṃti saṃyatāḥ//
śrutvā tasya ca tadvākyaṃ tatohaṃ dvāramāgataḥ

tataśca tai- kuto mahyaṃ praṇāmaśca yathākramam//
mayā dṛṣṭāśca te devā yuṣmākaṃ kiṃ karomyaham

tairuktaṃ tyajyatāṃ caiva saṃbhogastu sudāruṇaḥ//
tathā mayā kṛtaṃ devi gatāste tridivaṃ punaḥ

tataḥ śapto mayā naṃdī bhūlokaṃ gaccha satvaram//
tataḥ śāpaparibhraṣṭaḥ pṛthivyāṃ patitastadā

socchvāsahṛdayo dīno duḥkhavyākulalocanaḥ//
vilapaṃśca tathā naṃdī viluṭhañchokato bhuvi

vaṃcitaścāgninā bāḍhaṃ vāsavena viśeṣataḥ//
kiṃ mayā duṣkṛtaṃ karma kṛtaṃ kiṃ citpurātanam

sa dṛṣṭo lokapālaistu tāmavasthāṃ gato gaṇaḥ //
pṛṣṭaśca taiḥ kuto nadinvilāpaṃ kuruṣe mahat

sarvaṃ niveditaṃ tena teṣāmagre ca naṃdinā //
upāyaḥ kathitastaiśca mahākālavanaṃ tataḥ

tataśca vacanaṃ śrutvā naṃdī romāṃcakaṃcukaḥ //
mahākālavane devi jagāma sa tadā gaṇaḥ //
pūjayāmāsa vidhivaddhṛtvā kapālikīṃ tanum

aśarīrasamutpannā vāṇī liṃgāttadā priye //
saṃjātā śāpamokṣaste pratīhāra subhaktitaḥ //
pūjito'sau mahābhaktyā pratīhāreṇa naṃdinā

tadāprabhṛti lokesminpratīhāreśvareśvaraḥ //
mayā te kathito devi pratīhāreśvarasya ca //
prabhāvaḥ sarvalokānāmatyabhīṣṭaphalapradaḥ

pūjayiṣyaṃti ye bhaktyā pratīhāreśvaraṃ śivam //
sthānabhraṃśo viyogaśca teṣāṃ svapne'pi no bhavet

saptajanmakṛtaṃ pāpaṃ svalpaṃ vā yadi vā bahu //
tatsarvaṃ nāśamāyāti pratīhāreśvarārcanāt

manasā ye smariṣyati pratīhāreśvaraṃ śivam//
evaṃ tasya kulaṃ sarvaṃ yāti svargaṃ na saṃśayaḥ

iti śrī skāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye pratīhāreśvaramāhātmyavarṇanaṃnāma viṃśodhyāyaḥ