Skanda Purana · Chapter 5.20

// sanatkumāra uvāca // //
māsamekaṃ naro bhaktyā paśyedvā vaṭayakṣiṇīm //
pūjayetsvarṇapuṣpaiśca tasya siddhirna hīyate

iti vaṭayakṣiṇīmāhātmyam //
piśācake naraḥ snātvā caturdaśyāṃ viśeṣataḥ //
tilāndadāti yo bhaktyā na piśācaḥ prajāyate

yaṃ samuddiśya yaddattaṃ tadakṣayataraṃ bhavet //
tatkulaṃ hi piśācatvānmucyate nātra saṃśayaḥ

yasya nāmnā naraḥ snāti piśācatvātsa mucyate //
kuṃbhānvā karakānvāpi yo'tra dadyātsamaṃḍakān

tasya vai śāśvatī muktiḥ kule preto na jāyate //
śiprāguṃpheśvaraṃ dṛṣṭvā rudrabhakto jiteṃdriyaḥ

mucyate sarvapāpebhyaḥ kaṃcukena phaṇī yathā //
snātvāgastyeśvaraṃ paśyedyo'tibhaktyā ca mānavaḥ

tyaktvā yamagṛhaṃ vyāsa rudralokaṃ sa gacchati //
śiprāyāṃ yo naraḥ snātvā paśyeḍḍhuṃḍheśvaraṃ śivam

so'śvamedhaphalaṃ vyāsa labhate nātra saṃśayaḥ //
devenātra purā vyāsa vādito ḍamaruryataḥ

devastena samākhyāto nāmnā ḍamarukeśvaraḥ //
bhaktyā paśyennaro yastu devaṃ ḍamarukeśvaram

naiva vyādhibhayaṃ tasya mṛtaḥ śivapuraṃ vrajet //
anādikalpeśvaraṃ yastu bhaktyā paśyati mānavaḥ

rājyaṃ sa labhate svargaṃ yathā devaḥ puraṃdaraḥ //
devānāmapyasau vyāsa spardhanīyaḥ sadā bhavet

kalpakoṭiśataṃ sāgraṃ bhogayuktastu modate //
paśyetsiddheśvaraṃ yastu vīrabhadraṃ ca caṃḍikām//

sotraiva labhate siddhiṃ jayaṃ sarvatra mānavaḥ //
svarṇajāleśvaraṃ dṛṣṭvā snātastīrthe triviṣṭape

svarṇena pūjayeddevaṃ sarvapāpaiḥ pramucyate //
snātvā paśyennaro bhaktyā yaḥ karkoṭeśvaraṃ śivam

sarpato na bhayaṃ tasya dāridyaṃ naiva jāyate //
yaḥ paśyetparayā bhaktyā mahāmāyāṃ sanātanīm //

viṣṇumāyāvinirmuktaḥ sa yāti paramaṃ padam //
arcayetparayā bhaktyā yaḥ kapāleśvaraṃ naraḥ

sa mucyeta mahāpāpairyadyapi brahmahā bhavet //
svargadvāre naraḥ snātvā dṛṣṭvā devaṃ ca bhairavam

darśanāttasya devasya śatayajñaphalaṃ bhavet

itiśrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe'vantīkṣetramāhātmye caturdaśatīrthayātrāvarṇanaṃnāma viṃśo'dhyāyaḥ