Skanda Purana · Chapter 4.69

// skaṃda uvāca // //
śṛṇvagastya taporāśe kāśyāṃ liṃgāni yāni vai //
sevitāni nṛṇāṃ muktyai bhaveyurbhāvitātmanām

kṛttiprāvaraṇaṃ yatra kṛtaṃ devena līlayā //
rudrāvāsa iti khyātaṃ tatsthānaṃ sarvasiddhidam

sthite tatromayā sārdhaṃ svecchayā kṛttivāsasi //
āgatya naṃdī vijñaptiṃ cakre praṇatipūrvakam

devadeveśa viśveśa prāsādāḥ sumanoharāḥ //
sarvaratnamayā ramyāḥ sāṣṭāṣaṣṭirabhūdiha

bhūrbhuvaḥsvastale yāni śubhānyāyatanāni hi //
muktidānyapi tānīha mayānītāni sarvataḥ

yato yacca samānītaṃ yatra yacca kṛtāspadam //
kathayiṣyāmyahaṃ nātha kṣaṇaṃ tadavadhāryatām

sthāṇurnāma mahāliṃgaṃ devadevasya mokṣadam //
kurukṣetrādihodbhūtaṃ kalāśeṣosti tatra vai

tadagre sannihatyākhyā mahāpuṣkariṇī śubhā //
lolārka paścime bhāge kurukṣetrasthalī tu sā

tatra snātaṃ hutaṃ japtaṃ taptaṃ dattaṃ śubhārthibhiḥ //
kurukṣetrādbhavetsatyaṃ koṭikoṭiguṇādhikam

naimiṣāddevadevotra brahmāvartena saṃyutaḥ //
tatrāṃśamātraṃ saṃsthāpya kāśyāmāvirabhūdvibho

ḍhuṃḍhirājottarebhāge siddhidaṃ sādhakasya vai //
liṃgaṃ vai devadevākhyaṃ tadagre kūpa uttamaḥ

brahmāvarta iti khyātaḥ punarāvṛttihṛnnṛṇām //
tatkūpādbhiḥ kṛtasnāno devadevaṃ samarcya ca

tatpuṇyaṃ naimiṣāraṇyātkoṭikoṭiguṇaṃ smṛtam //
gokarṇāyatanādatra svayamāvirabhūnmahat

liṃgaṃ mahābalaṃ nāma sāṃbādityasamīpataḥ //
darśanātsparśanādyasya kṣaṇādeno mahābalam

vātāhatastūlarāśiriva vidrāti dūrataḥ //
kapālamocanapuro dṛṣṭvā liṃgaṃ mahābalam

mahābalamavāpnoti nivārṇanagaraṃ vrajet //
ṛṇamocanataḥ prācyāṃ prabhāsātkṣetrasattamāt

śaśibhūṣaṇasaṃjñaṃ tu liṃgamatra pratiṣṭhitam //
talliṃgasevanānmartyaḥ śāśibhūṣaṇatāṃ vrajet

prabhāsakṣetrayātrāyāḥ puṇyaṃ prāpnoti koṭikṛt //
ujjayinyā mahākālaḥ svayamatrāgato vibhuḥ

yannāmasmaraṇādeva na bhayaṃ kalikālataḥ //
praṇavākhyānmahāliṃgātprācyāṃ kalmaṣanāśanam

mahākālābhidhaṃ liṃgaṃ darśanānmokṣadaṃ param //
ayogaṃdheśvaraṃ liṃgaṃ puṣkarāttīrthasattamāt

āvirāsīdiha mahatpuṣkareṇa sahaiva tu //
matsyodaryuttarebhāge dṛṣṭvā 'yogaṃdhamīśvaram

snātvā'yogaṃdhakuṃḍe tu bhavāttārayate pitṝn //
mahānādeśvaraṃ liṃgamaṭṭahāsādihāgatam

trilocanādudīcyāṃ tu taddṛṣṭamuktaye matam //
mahotkaṭeśvaraṃ liṃgaṃ marutkoṭādihāgatam //
kāmeśvarottare bhāge dṛṣṭaṃ vimalasiddhidam

viśvasthānādihāyātaṃ liṃgaṃ vai vimaleśvaram //
svarlīnātpaścime bhāge dṛṣṭaṃ vimalasiddhidam

mahāvrataṃ mahāliṃgaṃ maheṃdrādiha saṃsthitam //
skaṃdeśvara samīpe tu mahāvrataphalapradam

vṛṃdārakarṣivṛṃdānāṃ stuvatāṃ prathame yuge //
utpannaṃ yanmahāliṃgaṃ bhūmiṃ bhittvā sudurbhidām

mahādeveti tairuktaṃ yanmanorathapūraṇāta //
vārāṇasyāṃ mahādevastadārabhyābhavacca yat

muktikṣetraṃ kṛtaṃ yena mahāliṃgena kāśikā //
avimukte mahādevaṃ yo drakṣyatyatramānavaḥ

śaṃbhuloke gamastasya yatratatra mṛtasya hi //
avimukte prayatnena tatsaṃsevyaṃ mumukṣubhiḥ

kalpāṃtarepi na tyaktaṃ kadāpyānaṃdakānanam //
yena liṃgasvarūpeṇa mahādevena sarvathā

tatprasādoyamatulaḥ sarvaratnamayaḥ śubhaḥ //
hiraṇyagarbhatīrthācca pratīcyāṃ kṣetrarakṣakam

vārāṇasyāmadhiṣṭhātrī devatā sābhilāṣadā //
mahādeveti saṃjñā vai sarvaliṃgasvarūpiṇī

vārāṇasyāṃ mahādevo dṛṣṭo yairliṃgarūpadhṛk //
tena trailokyaliṃgāni dṛṣṭānīha na saṃśayaḥ

vārāṇasyāṃ mahādevaṃ samabhyarcya sakṛnnaraḥ //
ābhūtasaṃplavaṃ yāvacchivaloke vasenmudā

pavitraparvaṇi sadā śrāvaṇe māsi yatnataḥ //
liṃge pavitramāropya mahādeve na garbhabhāk

pitāmaheśvaraṃ liṃgaṃ gayātīrthādihāgatam //
phalgruprabhṛtibhistīrthaiḥ sārdhakoṭyaṣṭasaṃmitaiḥ

dharmeṇa yatra vai taptaṃ yugānāmayutaṃ śatam //
sākṣīkṛtya mahāliṃgaṃ śrīmaddharmeśvarābhidham

pitāmaheśvaraṃ liṃgaṃ tatrābhyarcya naro mudā //
triḥsaptakulasaṃyukto mucyate nātra saṃśayaḥ

prayāgāttīrtharājācca śūlaṭaṃko maheśvaraḥ //
tīrtharājena sahitaḥ sthita āgatya vai svayam

nirvāṇamaṃḍapādramyādavācyāmatinirmalaḥ //
prāsādo meruṇā yasya spardhate kāṃcanojvalaḥ

devenaiva varo datto yatra pūrvaṃ yugāṃtare //
pūjyo maheśvaraḥ kāśyāṃ prathamaṃ kaluṣāpahaḥ

yaḥ prayāga iha snāto namasyati maheśvaram //
samabhyarcya vidhānena mahāsaṃbhāravistaraiḥ

prayāgasnānajātpuṇyācchūlaṭaṃka vilokanāt //
sa prāpnuyānna saṃdehaḥ puṇyaṃ koṭiguṇottaram

śaṃkukarṇānmahākṣetrānmahāteja itīritam //
liṃgamāvirabhūdatra mahātejovivṛddhidam

mahātejonidhistasya prāsādotīvanirmalaḥ //
jvālājaṭilitākāśo māṇikyaireva nirmitaḥ

talliṃgadarśanātsparśātstavanācca samarcanāt //
prāpyate tatparaṃ dhāma yatra gatvā na śocate

vināyakeśvarātpūrvaṃ mahātejaḥ samarcanāt //
tejomayena yānena yāti māheśvaraṃ padam

rudrakoṭisamākhyātāttīrthātparamapāvanāt //
mahāyogīśvaraṃ liṃgamāviścakre svayaṃ param

pārvatīśvara liṃgasya samīpe sarvasiddhikṛt //
talliṃgadarśanātpuṃsāṃ koṭiliṃga phalaṃ bhavet

tatprāsādasya parito rudrāṇāṃ koṭisaṃmitāḥ //
prāsādāramyasaṃsthānā nirmitā rudramūrtibhiḥ

kāśyāṃ rudrasthalī sā tu paṭhyate vedavādibhiḥ//
rudrasthalyāṃ mṛtā ye vai kṛmikīṭapataṃgakāḥ //

paśupakṣimṛgā martyā mlecchā vāpyatha dīkṣitāḥ //
teṣāṃ tu rudrībhūtānāṃ punarāvṛttiratra na

janmāṃtarasahasreṣu yatpāpaṃ samupārjitam //
rudrasthalīṃ praviṣṭasya tatsarvaṃ vrajati kṣayam

akāmo vā sakāmo vā tiryagyonigatopi vā //
rudrasthalyāṃ tyajanprāṇānparaṃ nirvāṇamāpnuyāt

svayamekāṃbarātkṣetrātkṛttivāsā ihāgataḥ //
kṛttivāsasi liṃgetra svayameva vyavasthitaḥ

asminsthāne svabhaktānāṃ sāṃbaḥ sarṣigaṇo vibhuḥ //
svayaṃ copadiśedbrahma śrutau śrutibhirīḍitam

kṣetretra siddhide prāptaścaṃḍīśo marujāṃgalāt //
pracaṃḍapāpasaṃghātaṃ khaṃḍayecchatadhekṣaṇāt

pāśapāṇigaṇādhyakṣa samīpe yaḥ prapaśyati //
caṃḍīśvaraṃ mahāliṃgaṃ sa yāti paramāṃ gatim

kālaṃjarānnīlakaṃṭhastiṣṭhedatra svayaṃ vibhuḥ //
gaṇeśāddaṃtakūṭākhyātsamīpe bhavanāśanaḥ

nīlakaṃṭheśvaraṃ liṃgaṃ kāśyāṃ yaiḥ paripūjitam //
nīlakaṃṭhāsta eva syustaeva śaśibhūṣaṇāḥ

kāśmīrādiha saṃprāptaṃ liṃgaṃ vijayasaṃjñitam //
sadā vijayadaṃ puṃsāṃ prācyāṃ śālakaṭaṃkaṭāt

raṇe rājakule dyūte vivāde sarvadaiva hi //
vijayo jāyate puṃsāṃ vijayeśa samarcanāt //

ūrdhvaretāstridaṃḍāyāḥ saṃprāptotra svayaṃ vibhuḥ //
kūśmāṃḍakaṃ gaṇādhyakṣaṃ puraskṛtya vyavasthitaḥ

ūrdhvāṃ gatimavāpnoti vīkṣaṇādūrdhvaretasaḥ //
ūrdhvaretasi ye bhaktā na hi teṣāmadhogatiḥ

maṃḍaleśvarataḥ kṣetrālliṃgaṃ śrīkaṃṭhasaṃjñitam //
vināyakānmaṃḍasaṃjñāduttarasyāṃ vyavasthitam

śrīkaṃṭhasya ca ye bhaktāḥ śrīkaṃṭhā eva te narāḥ //
neha śriyā viyujyaṃte na paratra kadācana

chāgalāṃḍānmahātīrthātkapardīśvavarasaṃjñitaḥ //
piśācamocane tīrthe svayamāvirabhūdvibhuḥ

kapardīśaṃ samabhyarcya na naro nirayaṃ vrajet //
na piśācatvamāpnoti kṛtvātrāpyaghamuttamam

āmrātakeśvarātkṣetrālliṃgaṃ sūkṣmeśa saṃjñitam //
svayamabhyāgataṃ cātra kṣetre vai śreyasāṃpade

vikaṭa dvijasaṃjñasya gaṇeśasya samīpataḥ //
dṛṣṭvā sūkṣmeśvaraṃ liṃgaṃ gatiṃ sūkṣmāmavāpnuyāt

/
saṃprāptamiha deveśaṃ jayaṃtaṃ madhukeśvarāt //
laṃbodarādgaṇapateḥ purastāttadavasthitam

jayaṃteśvaramālokya snātvā gaṃgājale śubhe //
prāpnuyādvāṃchitāṃ siddhiṃ sarvatra vijayī bhavet

prāduścakāra deveśaḥ śrīśailāttripurāṃtakaḥ //
śrīśailaśikharaṃ dṛṣṭvā yatphalaṃ samudīritam

tripurāṃtakamālokya tatphalaṃ helayāpyate //
viśverātpaścime bhāge tripurāṃtakamīśvaram

saṃpūjya parayā bhaktyā na naro garbhamāviśet //
saumyasthānādihāyāto bhagavānkukkuṭeśvaraḥ //

vakratuṃḍa gaṇādhyakṣa samīpe sopatiṣṭhate //
taddarśanādarcanācca karasthāḥ sarvasiddhayaḥ

jāleśvarāttriśūlī ca svayamīśaḥ samāgataḥ //
kūṭadaṃtādgaṇapateḥ purastātsarvasiddhidaḥ

rāmeśvarānmahākṣetrājjaṭīdevaḥ samāgataḥ //
ekadaṃtottare bhāge sorcitaḥ sarvakāmadaḥ

trisaṃdhyātkṣetrato devastryaṃbakosti samāgataḥ //
trimukhātpūrvadigbhāge pūjitastryaṃbakatvakṛt

hareśvaro hariścaṃdrātkṣetrādatra samāgataḥ //
hariścaṃdreśvarapuraḥ pūjito jayadaḥ sadā

iha śarvaḥ samāyātaḥ sthānānmadhyamakeśvarāt //
caturvedeśvaraṃ liṃgaṃ purodhāya vyavasthitam

śarvaṃ liṃgaṃ samabhyarcya kāśyāṃ paramasiddhikṛt //
na jātu jaṃtupadavīṃ prāpnuyātkvāpi mānavaḥ

sthaleśvarānmahāliṃgaṃ prādurbhūtaṃ paraṃtviha //
yatra yajñeśvaraṃ liṃgaṃ sarvaliṃgaphalapradam

mahāliṃgaṃ samabhyarcya mahāśraddhāsamanvitaḥ //
mahatīṃ śriyamāpnoti loketra ca paratra ca

iha liṃgaṃ sahasrākṣaṃ suvarṇākhyātsamāgatam //
yasya saṃdarśanātpuṃsāṃ jñānacakṣuḥ prajāyate

śaileśvarādavācyāṃ tu sahasrākṣeśvaraṃ vibhum //
dṛṣṭvā janmasahasrāṇāṃ śatānāṃ pātakaṃ tyajet

harṣitāddharṣitaṃ cātra prādurāsīttamoharam //
liṃgaṃharṣapradaṃ puṃsāṃ darśanātsparśanādapi

maṃtreśvara samīpe tu prāsādo harṣiteśituḥ //
tadvilokanataḥ puṃsāṃ nityaṃ harṣa paraṃparā

iha svayaṃ samāyāto rudro rudramahālayāt //
yasya darśanato yāṃti rudraloke narāḥ sphuṭam

yaistu rudreśvaraṃ liṃgaṃ kāśyāmatra samarcitam //
te rudrarūpiṇo martyā vijñeyā nātra saṃśayaḥ

tripureśa samīpe tu dṛṣṭvā rudreśvaraṃ vibhum //
rudrāsta iva vijñeyā jīvaṃtopi mṛtā api

āgādiha mahādevo vṛṣeśo vṛṣabhadhvajāt //
bāṇeśvarasya liṃgasya samīpe vṛṣadaḥ sadā

ihāgataṃ tu kedārādīśāneśvara saṃjñitam //
taddraṣṭavyaṃ pratīcyāṃ ca liṃgaṃ prahlādakeśavāt

īśāneśaṃ samabhyarcya snātvottaravahāṃbhasi //
vasedīśānanagare īśānasadṛśaprabhaḥ

bhairavādbhairavī mūrtiratrāyātā manoharā //
saṃhārabhairavo nāma draṣṭavyaḥ sa prayatnataḥ

pūjanātsarvasiddhyai sa prācyāṃ kharvavināyakāt //
saṃhārabhairavaḥ kāśyāṃ saṃharedaghasaṃtatim

ugraḥ kanakhalāttīrthādāvirāseha siddhidaḥ //
tadvilokanato nṛṇāmugraṃ pāpaṃ praṇaśyati

ugraṃ liṃgaṃ sadā sevyaṃ prācyāmarkavināyakāt //
atyugrā api naśyeyurupasargāstadarcanāt

vastrāpathānmahākṣetrādbhavo nāma svayaṃ vibhuḥ //
bhīmacaṃḍī samīpe tu prādurāsīdiha prabho

bhaveśvaraṃ samabhyarcya bhavenāvirbhavennaraḥ //
prabhurbhavati sarveṣāṃ rājñāmājñākṛtāmiha

devadāruvanāddaṃḍī daṃḍayanpātakāvalīḥ //
vārāṇasyāṃ samāgatya sthito liṃgākṛtirvibhuḥ

prācyāṃ daṃḍīśvaraḥ pūjyaḥ sa dehalivināyakāt //
tasyārcanena marttyānāṃ na punarbhava īkṣyate

bhadrakarṇahradādatra bhadrakarṇahradānvitaḥ//
śivaḥ sākṣādihāyātaḥ sarveṣāṃ śivadorcitaḥ

uddaṃḍākhyādgaṇapateḥ prācyāṃ tattīrthamuttamam //
bhadrakarṇahrade snātvābhyarcya liṃgaṃ śivāhvayam

sarvatra śivamāpnoti bhadrakarṇeśa pūjanāt //
śṛṇuyātsarvabhūtānāṃ bhadraṃ paśyati cākṣibhiḥ

śaṃkaraśca hariścaṃdrāttvatpuraḥ pratibhāsate //
tatpūjanājjanānāṃ na jananījaṭhare janiḥ

yamaliṃgānmahātīrthātkālaliṃgamiha sthitam //
kalaśeśa iti khyātaṃ caṃdreśātpaścimena ca

yamatīrthe naraḥ snātvā mitrāvaruṇadakṣiṇe //
kālaliṃgaṃ samālokya kalikāla bhayaṃ kutaḥ

tatra bhaumacaturdaśyāṃ yastu yātrāṃ kariṣyati //
api pātaka yuktaḥ sa yamayātrāṃ na yāsyati

naipālācca mahākṣetrādāyātpaśupatistviha //
yatra pāśupato yoga upadiṣṭaḥ pinākinā

bhavatā devadevena brahmādibhyo vimuktaye //
tasya saṃdarśanādeva paśupāśairviyujyate

karavīrakatīrthācca kapālīśa ihāgataḥ //
kapālamocane tīrthe draṣṭavyaḥ sa prayatnataḥ

tadvilokanamātreṇa brahmahatyā vilīyate//
umāpatirdevikāyā ihāgatya vyavasthitaḥ

dṛṣṭaḥ paśupatiḥ prācyāṃ haretpāpaṃ cirārjitam //
liṃgaṃ maheśvarakṣetrādiha dīpteśa saṃjñitam

upomāpati tiṣṭheta dīptyai ceha paratra ca //
bhuktimukti pra daṃ liṃgaṃ dīpteśaṃ kāśimadhgam

kāyārohaṇataḥ kṣetrādācāryo nakulīśvaraḥ //
śiṣyaiḥ parivṛtastiṣṭhenmahāpāśupatavrataiḥ

dakṣiṇe hi mahādevādṛṣṭo jñānaṃ prayacchati //
ajñānaṃ nāśayetkṣipraṃ garbhasaṃsṛtihetukam

gaṃgāsāgarataścāyādamareśa itīritam //
liṃgaṃ yaddarśanādeva nāmaratvaṃ hi durlabham

saptagodāvarītīrthāddevo bhīmeśvaraḥ prabhuḥ //
prakāśate liṃgarūpī bhuktyai muktyai nṛṇāmiha

nakulīśātpurobhāge dṛṣṭā bhīmeśvaraṃ prabhum//
mahābhīmāni pāpāni praṇaśyaṃti hi tatkṣaṇāt

bhūteśvarādbhasmagātraṃ prādurāsīdiha svayam //
bhīmeśāddakṣiṇe bhāge tadabhyarcya prayatnataḥ

samyakpāśupatādyo gādabhyastācca samāḥ śatam //
yatprāpyate phalaṃ tatsyādbhasmagātravilokanāt

nakulīśvarato devaḥ svayaṃbhūriti viśrutaḥ //
ātmanāprakaṭībhūtaḥ kāśyāṃ liṃgākṛtirharaḥ

svayaṃbhu liṃgaṃ saṃpūjya snātvā siddhihrade naraḥ //
mahālakṣmīśvara puro na bhūyo janmabhāgbhavet

prayāgatīrthanikaṣā prāsādo vidrumaprabhaḥ //
vārāhasya mahāneṣa dharaṇīnāmna eva hi

viṃdhyaparvatataḥ prāpto devaṃ śrutvā samāgatam//
sagaṇaṃ sarṣidevaṃ ca maṃdarādatra kaṃdarāt

kāśyāṃ dharaṇivārāho draṣṭavyaḥ sa prayatnataḥ//
āpatsamudrasaṃmagnamuddhareccharaṇāgatam

karṇikārādgaṇādhyakṣaḥ karṇikāraprasūnaruk//
samarcyoyaṃ gadāhasta upasargasahasrahṛt

tasmāddharaṇivārāhātpratīcyāṃ diśi saṃsthitam //
pūjayitvā gaṇādhyakṣaṃ gāṇapatyapadaṃ labhet

hemakūṭādvirūpākṣaṃ liṃgamatrāvirāsa ha //
maheśvarādavācyāṃ ca dṛṣṭaṃ saṃsāratārakam

gaṃgādvārāddhimastheśaṃ liṃgaṃ himasamaprabham //
brahmanālātpratīcyāṃ ca draṣṭavyamiha siddhidam

gaṇādhipaśca kailāsādgaṇā anye mahābalāḥ //
kailāsādreḥ samāyātāḥ saptakoṭimitāḥ prabho

durgāṇi taiḥ kṛtānīha saptasvargasamāni ca //
sadvārāṇi sayaṃtrāṇi kapāṭavikaṭāni ca

koṭikoṭibhaṭāḍhyāni sarvarddhisahitānyapi //
suvarṇarūpyatāmraiśca kāṃsyarītikasīsakaiḥ

ayaskāṃtena kāṃtāni dṛḍhānyabhraṃlihānyapi //
tataḥ śailaṃ mahādurgaṃ taiḥ kāśīparitaḥ kṛtam

parikhāpi kṛtā nimnā matsyodaryājalāvilā //
matsyodarī dvidhā jātā bahiraṃtaścarā punaḥ

tacca tīrthaṃ mahatkhyātaṃ militaṃ gāṃgavāribhiḥ //
yadā saṃhāramārgeṇa gaṃgābhaḥ prasarediha

tadā matsyodarī tīrthaṃ labhyate puṇyagauravāt //
sūryācaṃdramasoḥ parvatadākoṭiguṇaṃ śatam

sarvaparvāṇi tatraiva sarvatīrthāni tatra vai //
tatraiva sarvaliṃgāni gaṃgāmatsyodarīyataḥ

matsyodaryāṃ hi ye snātā yatrakutrāpi mānavāḥ //
kṛtapiṃḍapradānāste na māturudareśayāḥ

avimuktamidaṃ kṣetraṃ matsyākāratvamāpnuyāt //
paritaḥ svardhunīvāri saṃsāri parivīkṣyate

matsyodaryāṃ kṛtasnānā ye narāste narottamāḥ //
kṛtvāpi bahupāpāni nekṣaṃte bhāskareḥ purīm

kiṃ snātvā bahutīrtheṣu kiṃ taptvā duṣkaraṃ tapaḥ //
yadi matsyodarī snātā kuto garbhabhayaṃ tataḥ//

yatrayatra hi liṃgāni nṛdevarṣikṛtānyapi //
tatra matsyodarīṃ prāpya susnāto mokṣabhājanam

saṃti tīrthānyanekāni bhūrbhuvaḥsvargatānyapi //
na samāni paraṃ tāni koṭyaṃśenāpi niścitam

itthaṃ tīrthaṃ kṛtaṃ tena vibho kailāsavāsinā//
gaṇādhipena sumahatsumahodārakarmaṇā

bhūrbhuvaḥsaṃjñakaṃ liṃgaṃ parvatādgaṃdhamādanāt//
svayamāvirabhūdatra tasmātprācyāṃ gaṇādhipāt

vilokya bhūrbhuvaṃ liṃgaṃ bhūrbhuvaḥsvarmahaḥ pare //
nivasaṃti janāḥ puṇyāḥ suciraṃ divyabhoginaḥ

hāṭakeśaṃ mahāliṃgaṃ bhogavatyā samāyutam //
saptapātālatalata ihāyātaṃ svayaṃ vibho

śeṣavāsukimukhyaiśca tatprāsādo mahāniha //
maṇimāṇikyaratnaughairniramāyi prayatnataḥ

talliṃgaṃ hāṭakamayaṃ ratnamālābhirarcitam //
īśāneśvarataḥ prācyāṃ pūjanīya prayatnataḥ //

bhaktito'bhyarcya talliṃgaṃ naraḥ sarvasamṛddhimān //
bhuktvā bhogānasaṃkhyātānaṃte nivārṇamṛcchati

ākāśāttārakālligaṃ jyotīrūpamihāgatam//
jñānavāpyāḥ purobhāge talliṃgaṃ tārakeśvaram //

tārakaṃ jñānamāpyeta talliṃgasya samarcanāt //
jñānavāpyāṃ naraḥ snātvā tārakeśaṃ vilokya ca

kṛtasaṃdhyādi niyamaḥ paritarpya pitāmahān//
dhṛtamaunavrato dhīmānyāvalliṃga vilokanam

mucyate sarvapāpebhyaḥ puṇyaṃ prāpnoti śāśvatam //
prāṃte ca tārakaṃ jñānaṃ yasmājjñānādvimucyate

kirātācca kirāteśa ihacāvirbabhūva ha //
kirātarūpo bhagavānyatra devo'bhavatpurā

tatkirāteśvaraṃ liṃgaṃ bhārabhūteśvarādanu //
namaskṛtya naro jātu na māturudareśayaḥ

laṃkāpuryāḥ samāgacchanmarukeśvarasaṃjñakam //
liṃgaṃ yadarcanātpuṃsāṃ na bhayaṃ rakṣasāṃ bhavet

nairkatyāṃ diśi talliṃgaṃ nirṛteśvarasaṃjñakam //
paulastyarāghavātpaścātpūjitaṃ sarvaduṣṭahṛt

puṇyajalapriyaṃ liṃgaṃ jalaliṃgasthalādapi //
āyātaṃ tacca gaṅgāyā jalamadhye vyavasthitam

tatprāsādo'dbhutataro madhye gaṃgaṃ nirīkṣyate //
sarvadhātumayaḥ śreṣṭhaḥ sarvaratnamayaḥ śubhaḥ

adyāpi dṛśyate kaiścitpuṇyasaṃbhāragauravāt //
śreṣṭhaṃ liṃgamihāyātaṃ tīrthātkoṭīśvarādapi

koṭiliṃge kṣaṇe puṇyaṃ talliṃgasya nirīkṣaṇāt //
śreṣṭhaṃ jyeṣṭheśvarātpaścācchreṣṭha siddhipradāyakam

vaḍavāsyātsamudbhūtaṃ liṃgamatrānaleśvaram //
naleśvara purobhāge pūjitaṃ sarvasiddhidam

āgatya virajastīrthāddevadevastrilocanaḥ //
liṃge tvanādisaṃsiddhe hyavatasthe triviṣṭape

puṇye pilipilā tīrthe sarveṣāṃ tārakaprade //
āviścakre svayadeva oṃkāromarakaṃṭakāt

tadādyaṃ tārakakṣetraṃ yadā gaṃgā na cāgatā //
yadaivāvirabhūtkāśī trailokyoddhaṇāya vai

tadākṛtimahalliṃgaṃ svayamāvirabhūttataḥ//
mahimānaṃ na tasyānyaḥ parivetti vibhorṛte

etānyāyatanānīśa ānināya mahāṃti ca //
śeṣayitvāṃśamātraṃ ca tasminkṣetre nije nije

ihāyātāni puṇyāni sarvabhāvena nānyathā//
prāsādāḥ sarvataścaiṣāṃ ramyā abhraṃlihā vibho

bahudhātumayāścitrāḥ sarvaratnasamujjvalāḥ //
yeṣāṃ kalaśamātrasya darśanānmuktirāpyate

śrutvāpi nāma caiteṣāṃ liṃgānāṃ surasattama //
api janmasahasrotthāḥ kṣīyaṃte pāparāśayaḥ

idānīṃ ko nideśotra mayānuṣṭheya īśitaḥ //
prasādī kriyatāṃso pi siddho maṃtavya eva hi

// skaṃda uvāca // //
śrutveti naṃdino vākyaṃ devadeveśvaro haraḥ //
śraddhā prasādya śailādimidaṃ provāca kuṃbhaja

// śrīdevadeva uvāca // //
sādhūkṛtaṃ tvayā naṃdinsadānaṃda vidhāyaka //
vidhehi me nideśaṃ ca caṃḍīrvyāpārayādhunā

navakoṭyastu cāmuṃḍāyāyatra nivasaṃti hi //
svadevatābhiḥ sahitā bhūtavetāla bhairavaiḥ

tāḥ purī rakṣaṇārthāya savāhanabalāyudhāḥ //
pratidurgaṃ durgarūpāḥ paritaḥ parivāsaya

// skaṃda uvāca //
naṃdinaṃ saṃnideśyeti mṛḍānyā sahito mṛḍaḥ //
yayau traiviṣṭapaṃ kṣetraṃ muktibījaprarohaṇam

śilādatanayopyaiśīṃ mūrddhanyājñāṃ vidhāya ca //
āhūya sarvato durgāḥ pratidurgaṃ nyaveśayat

niśamyādhyāyametaṃ ca puṇyāyatana garbhiṇam//
naraḥ svargāpavargau ca prāpnuyācchraddhayā kramāt

śrutvāṣṭaṣaṣṭimetāṃ vai mahāyatana saṃśrayām //
na jātu praviśenmartyo jananyā jāṭharīṃ darīm

//
iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍe uttarārdhe'ṣṭaṣaṣṭyāyatanasamāgamo nāmaikonasaptatitamodhyāyaḥ