Skanda Purana · Chapter 4.45

// skaṃda uvāca // //
atha tadyoginīvṛṃdaṃ dūrāddṛṣṭiṃ prasārya ca //
svanetradairghyanirmāṇaṃ praśaśaṃsa phalānvitam

divyaprāsādamālānāṃ patākāścalapallavāḥ //
sādaraṃ dūramārgasthānpāṃthānāhvayatīriva

caṃcatprāsādamāṇikyairvijṛṃbhitamarīcibhiḥ //
sunīlamapi ca vyomavīkṣyamāṇaṃ sunirmalam

devatvaṃ māyayācchādya veṣaṃ kārpaṭikocitam //
vidhāya kāśīmaviśadyoginīcakramakramam

kāciccayoginī bhūtā kācijjātā tapasvinī //
kācidbabhūva sairaṃdhrī kācinmāsopavāsinī

mālākāravadhūḥ kācitkācinnāpitasuṃdarī //
sūtikarmavicārajñā 'parā bhaiṣajyakovidā

vaiśyā ca kācidabhavatkrayavikrayacaṃcurā //
vyālagrāhiṇyabhūtkāciddāsīdhātrī ca kācana

ekā ca nṛtyakuśalā tvanyā gānaviśāradā //
aparā veṇuvādajñā parā vīṇādharābhavat

mṛdaṃgavādanajñānyā kācittāla kalāvatī //
kācitkārmaṇatattvajñā kācinmauktikaguṃphikā

gaṃdhabhāgavidhijñānyā kācidakṣakalālayā //
ālāpollāsakuśalā kāciccatvaracāriṇī

vaṃśādhirohaṇe dakṣā rajjumārgeṇa cetarā //
kācidvātulaceṣṭā'bhūtpathi cīvaraveṣṭanā

apatyadā'napatyānāṃ parā tatrapure'vasat //
kācitkarāṃghrirekhāṇāṃ lakṣaṇāni ciketi ca

citralekhana naipuṇyātkācijjanamanoharā //
vaśīkaraṇamaṃtrajñā kācittatra cacāra ha

guṭikāsiddhidā kācitkācidaṃjanasiddhidā //
dhātuvādavidagdhānyā pādukāsiddhidā parā

agnistaṃbha jalastaṃbha vākstaṃbhaṃ cāpyaśikṣayat //
khecarītvaṃ dadau kācidadṛśyatvaṃ parā dadau

kācidākarpaṇīṃ siddhiṃ dadāvuccāṭanaṃ parā //
kācinnijāṃgasauṃdarya yuvacittavimohinī

ciṃtitārthapradā kācitkācijjyotiḥ kalāvatī //
ityādi veṣabhāṣābhiranukṛtya samaṃtataḥ

pratyaṃgaṇaṃ pratigṛhaṃ prāviśadyoginīgaṇaḥ //
itthamabdaṃcaraṃtyastā yoginyo'harniśaṃ puri

na cchidraṃ lebhire kvāpi nṛpavighnacikīrṣavaḥ //
tataḥ sametya tāḥ sarvā yoginyo vaṃdhyavāṃchitāḥ //
tasthuḥ saṃmaṃtrya tatraiva na gatā maṃdaraṃ punaḥ

prabhukāryamaniṣpādya sadaḥ saṃbhāvanaidhitaḥ //
kaḥ puraḥ śaknuyātsthātuṃ svāmino kṣatavigrahaḥ

anyacca ciṃtitaṃ tābhiryoginībhiridaṃ mune //
prabhuṃ vināpi jīvāmo na tu kāśīṃ vinā punaḥ

prabhūruṣṭopi sadbhṛtye jīvikāmātrahārakaḥ //
kāśīharetkarādbhraṣṭā puruṣārthacatuṣṭayam

nādyāpi kāśīṃ saṃtyajya tadārabhya mahāmune //
yoginyonyatra tiṣṭhaṃti caraṃtyopi jagattrayam

prāpyāpi śrīmatīṃ kāśīṃ yastitikṣati durmatiḥ //
sa eva pratyuta tyakto dharmakāmārthamuktibhiḥ

kaḥ kāśīṃ prāpya durbuddhiraparatra yiyāsati//
mokṣanikṣepa kalaśīṃ tucchaśrīkṛtamānasaḥ

vimukhopīśvarosmākaṃ kāśīsevanapuṇyataḥ //
saṃmukho bhavitā puṇyaṃ kṛtakṛtyāḥ sma tadvayam

dinaiḥ katipayaireva sarvajñopi sameṣyati //
vinā kāśīṃ na ramate yato'nyatra trilocanaḥ

śaṃbhoḥ śaktiriyaṃ kāśī kācitsarvairagocarā //
śaṃbhureva hi jānīyādetasyāḥ paramaṃ sukham //

iti niścitya manasi śaṃbhorānaṃdakānane //
atiṣṭhadyoginīvṛṃdaṃ kayācinmāyayāvṛtam

vyāsa uvāca // //
itthaṃ samākarṇya muniḥ punaḥ papraccha ṣaṇmukham //
kāni kāni ca nāmāni tāsāṃ tāni vadeśvara

bhajanādyoginīnāṃ ca kāśyāṃ kiṃ jāyate phalam //
kasminparvaṇi tāḥ pūjyāḥ kathaṃ pūjyāśca tadvada

śrutvetipraśnamaumeyo yoginīsaṃśrayaṃ tataḥ //
pratyuvāca mune vacmi śṛṇotvavahito bhavān

// skaṃda uvāca // //
nāmadheyāni vakṣyāmi yoginīnāṃ ghaṭodbhava//
ākarṇya yāni pāpāni kṣayaṃti bhavināṃ kṣaṇāt

gajānanā siṃhamukhī gṛdhrāsyā kākatuṃḍikā//
uṣṭragrīvā hayagrīvā vārāhī śarabhānanā

ulūkikā śivārāvā mayūrī vikaṭānanā //
aṣṭavaktrā koṭarākṣī kubjā vikaṭalocanā

śuṣkodarī lalajjihvā śvadaṃṣṭrā vānarānanā //
ṛkṣākṣī kekarākṣī ca bṛhattuṃḍā surāpriyā

kapālahastā raktākṣī śukī śyenī kapotikā //
pāśahastā daṃḍahastā pracaṃḍā caṃḍavikramā

śiśughnī pāpahaṃtrī ca kālī rudhirapāyinī //
vasādhayā garbhabhakṣā śavahastāṃtramālinī

sthūlakeśī bṛhatkukṣiḥ sarpāsyā pretavāhanā //
daṃdaśūkakarā krauṃcī mṛgaśīrṣā vṛṣānanā

vyāttāsyā dhūmaniḥśvāsā vyomaikacaraṇordhvadṛk //
tāpanī śoṣaṇīdṛṣṭiḥ koṭarī sthūlanāsikā

vidyutprabhā balākāsyā mārjārī kaṭapūtanā //
aṭṭāṭṭahāsā kāmākṣī mṛgākṣī mṛgalocanā

nāmānīmāni yo martyaścatuḥṣaṣṭiṃ dinedine //
japettrisaṃdhyaṃ tasyeha duṣṭabādhā praśāmyati

na ḍākinyo na śākinyo na kūṣmāṃḍā na rākṣasāḥ //
tasya pīḍāṃ prakurvaṃti nāmānīmāni yaḥ paṭhet

śiśūnāṃ śāṃtikārīṇi garbhaśāṃtikarāṇi ca //
raṇe rājakule vāpi vivāde jayadānyapi

labhedabhīpsitāṃ siddhiṃ yoginīpīṭhasevakaḥ //
maṃtrāṃtarāṇyapi japaṃstatpīṭhe siddhibhāgbhavet

balipūjopahāraiśca dhūpadīpasamarpaṇaiḥ //
kṣipraṃ prasannā yoginyaḥ prayaccheyurmanorathān

śaratkāle mahāpūjāṃ tatra kṛtvā vidhānataḥ //
havīṃṣi hutvā maṃtrajño mahatīṃ siddhimāpnuyāt

ārabhyāśvayujaḥśuklāṃ tithiṃ pratipadaṃ śubhām //
pūjayennavamīyāvannaraściṃtitamāpnuyāt

kṛṣṇapakṣasya bhūtāyāmupavāsī narottamaḥ //
tatra jāgaraṇaṃ kṛtvā mahatīṃ siddhimāpnuyāt

praṇavādicaturthyantairnāmabhirbhaktimānnaraḥ //
pratyekaṃ havanaṃ kṛtvā śatamaṣṭottaraṃ niśi

sasarpiṣā guggulunā laghukoli pramāṇataḥ //
yāṃ yāṃ siddhimabhīpseta tāṃtāṃ prāpnoti mānavaḥ

caitrakṛṣṇapratipadi tatra yātrā prayatnataḥ //
kṣetravighnaśāṃtyarthaṃ kartavyā puṇyakṛjjanaiḥ

yātrā ca sāṃvatsarikīṃ yo na kuryādavajñayā //
tasya vighnaṃ prayacchaṃti yoginyaḥ kāśivāsinaḥ

agre kṛtvā sthitāḥ sarvāstāḥ kāśyāṃ maṇikarṇikām //
tannamaskāramātreṇa naro vighnairna bādhyate

iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍe pūrvārddhe ṣaṣṭiyoganyāgamanaṃnāma paṃcacatvāriṃśodhyāyaḥ