Skanda Purana · Chapter 4.31

// agastya uvāca // //
sarvajña hṛdayānaṃda skaṃdaskaṃdita tāraka //
na tṛptimadhigacchāmi śṛṇvanvārāṇasīkathām

anugraho yadi mayi yogyosmi śravaṇe yadi //
tadā kathaya me nātha kāśyāṃ bhairava saṃkathām

kosau bhairavanāmātra kāśipuryāṃ vyavasthitaḥ //
kiṃ rūpamasya kiṃ karma kāni nāmāni cāsya vai

kathamārādhitaścaiva siddhidaḥ sādhakasya vai //
ārādhitaḥ kutra kāle kṣipraṃ siddhyati bhairavaḥ

// skaṃda uvāca // //
vārāṇasyāṃ mahābhāga yathā te prema vartate //
tathā na kasyacinmanye tato vakṣyāmyaśeṣataḥ

prādurbhāvaṃ bhairavasya mahāpātakanāśanam //
yacchrutvā kāśivāsasya phalaṃ nirvighramāpnuyāt

pāṇibhyāṃ paritaḥ prapīḍya sudṛḍhaṃ niścotya niścotya ca brahmāṃḍaṃ sakalaṃ pacelimarasāloccaiḥ phalābhaṃ muhuḥ //
pāyaṃpāyamapāyatastrijagatīmunmattavattai rasairnṛtyaṃstāṃḍavaḍaṃbareṇa vidhināpāyānmahābhairavaḥ

kuṃbhayone na vettyeva mahimānaṃ maheśituḥ //
caturbhajopi vaikuṃṭhaścaturvaktropi viśvakṛt

na citramatra bhūdeva bhavamāyā duratyayā //
tayā saṃmohitāḥ sarve nāvayaṃtyapi taṃ param

vedayedyadicātmānaṃ sa eva parameśvaraḥ //
tadā viṃdaṃti brahmādyāḥ svecchayaiva na taṃ viduḥ

sa sarvagopi nekṣyeta svātmārāmo maheśvaraḥ //
devavadbudhyate mūḍhairatīto yo manogirām

purā pitāmahaṃ vipra meruśṛṃge maharṣayaḥ //
procuḥ praṇamya lokeśaṃ kimekaṃ tattvamavyayam

samā yayā maheśasya mohito lokasaṃbhavaḥ //
avijñāya paraṃ bhāvamātmānaṃ prāha varpiṇam

jagadyonirahaṃ dhātā svayaṃbhūreka īśvaraḥ //
anādimadahaṃ brahma māmanarcya na mu cyate

pravartako hi jagatāmahameko nivartakaḥ //
nānyo madadhikaḥ satyaṃ kaścitkopi surottamāḥ

tasyaivaṃ bruvato dhātuḥ kraturnārāyaṇāṃśajaḥ //
provāca prahasanvākyaṃ roṣatāmravilocanaḥ

avijñāya paraṃ tattvaṃ kimetatpratipādyate //
ajñānaṃ yogayuktasya na caitaducitaṃ tava

ahaṃ kartā hi lokānāṃ yajño nārāyaṇaḥ paraḥ //
na māmanādṛtya vidhe jīvanaṃ jagatāmaja

ahameva paraṃ jyotirahameva parā gatiḥ //
matpreritena bhavatā sṛṣṭireṣā vidhīyate //

evaṃ vipra kṛtau mohātparasparajayaiṣiṇau //
papracchatuḥ pramāṇajñānāgamāṃścaturopi tau

// vidhikratū ūcatuḥ // //
vedāḥ pramāṇaṃ sarvatra pratiṣṭhāṃ paramāmitāḥ //
yūyameva na saṃdehaḥ kiṃ tattvaṃ pratitiṣṭhata

śrutaya ūcuḥ // //
yadi mānyā vayaṃ devau sṛṣṭisthitikarau vibhū //
tadā pramāṇaṃ vakṣyāmo bhavatsaṃdehabhedakam

śrutyuktamidamākarṇya procatustau śrutīḥ prati //
yuṣmaduktaṃ pramāṇaṃ nau kiṃ tattvaṃ samyagucyatām

ṛguvāca // //
yadaṃtaḥsthāni bhūtāni yataḥ sarvaṃ pravartate //
yadāhustatparaṃ tattvaṃ sa rudrastveka eva hi

// yajuruvāca // //
yo yajñairakhilairīśo yogena ca samijyate //
yena pramāṇaṃ hi vayaṃ sa ekaḥ sarvadṛkchivaḥ

// sāmovāca // //
yenedaṃ bhraśyate viśvaṃ yogibhiryo viciṃtyate //
yadbhāsā bhāsate viśvaṃ sa ekastryaṃbakaḥ paraḥ

// atharvovāca // //
yaṃ prapaśyaṃti deveśaṃ bhaktyānugrahiṇo janāḥ //
tamāhurekaṃ kaivalyaṃ śaṃkaraṃ duḥkhataskaram

śrutīritaṃ niśamyetthaṃ tāvatīva vimohitau //
smitvāhatuḥ kratu vidhīmohādhyenāṃkitau mune

kathaṃ pramathanāthosau ramamāṇo niraṃtaram//
digaṃbaraḥ pitṛvane śivayā dhūlidhūsaraḥ

viṭaṃkaveśo jaṭilo vṛṣagovyālabhūṣaṇaḥ //
paraṃ brahmatvamāpannaḥ kva ca tatsaṃgavarjitam

tadudīritamākarṇya praṇavātmā sanātanaḥ //
amūrto mūrtimānbhūtvā hasamāna uvāca tau

praṇava uvāca //
na hyeṣa bhagavāñchaktyā svātmano vyatiriktayā //
kadācidramate rudro līlārūpadharo haraḥ

asau hi bhagavānīśaḥ svayaṃjyotiḥ sanātanaḥ //
ānaṃdarūpā tasyaiṣā śaktirnāgaṃtukī śivā

ityevamuktepi tadā makhamūrterajasya hi //
nājñānamagamannāśaṃ śrīkaṃṭhasyaiva māyayā

prādurāsīttato jyotirubhayoraṃtare mahat //
pūrayannijayā bhāsā dyāvābhūmyoryadaṃtaram

jyotirmaṃḍalamadhyastho dadṛśe puruṣākṛtiḥ //
prajajvālātha kopena brahmaṇaḥ paṃcamaṃ śiraḥ

āvayoraṃtaraṃ kosau bibhṛyātpuruṣākṛtim //
vidhiḥ saṃbhāvayedyāvattāvatsa hi vilokitaḥ

sraṣṭā kṣaṇena ca mahānpuruṣo nīlalohitaḥ //
triśūlapāṇirbhālākṣo nāgoḍupavibhūṣaṇaḥ

hiraṇyagarbhastaṃ prāha jāne tvāṃ caṃdraśekharam //
bhālasthalānmamapurā rudraḥ prādurabhūdbhavān

rodanādrudranāmāpi yojitosi mayā purā //
māmeva śaraṇaṃ yāhi putra rakṣāṃ karomi te

atheśvaraḥ padmayoneḥ śrutvā garvavatīṃ giram//
sakopataḥ samutpādya puruṣaṃ bhairavākṛtim

prāha paṃkajajanmāsau śāsyaste kālabhairava //
kālavadrājase sākṣātkālarājastato bhavān

viśvaṃ bhartuṃ samartho'si bharaṇādbhairavaḥ smṛtaḥ //
tvatto bheṣyati kālopi tatastvaṃ kālabhairavaḥ

āmardayiṣyati bhavāṃstuṣṭo duṣṭātmano yataḥ //
āmardaka iti khyāti tataḥ sarvatra yāsyati

yataḥ pāpāni bhaktānāṃ bhakṣayiṣyati tatkṣaṇāt //
pāpabhakṣaṇa ityeva tava nāma bhaviṣyati

yā me muktipurī kāśī sarvābhyopi garīyasī //
ādhipatyaṃ ca tasyāste kālarāja sadaiva hi

tatra ye pāpakartārasteṣāṃ śāstā tvameva hi //
śubhāśubhaṃ na tatkarma citragupto likhiṣyati

etānvarānpragṛhyā'tha tatkṣaṇātkālabhairavaḥ //
vāmāṃgulinakhāgreṇa cakarta ca śiro vidheḥ

yadaṃgamaparādhnoti kāryaṃ tasyaiva śāsanam //
ato yena kṛtā niṃdā tacchinnaṃ pacamaṃ śiraḥ

yajñamūrtidharo viṣṇustatastuṣṭāva śaṃkaram //
bhīto hiraṇyagarbhopi jajāpa śatarudriyam

āśvāsya tau mahādevaḥ prītaḥ praṇatavatsalaḥ //
prāha svāṃ mūrtimaparāṃ bhairavaṃ taṃ kapardinam

mānyo'dhvarosau bhavatā tathā śatadhṛtistvayam //
kapālaṃ vaidhasaṃ cāpi nīlalohita dhāraya

brahmahatyāpanodāya vrataṃ lokāya darśayan//
cara tvaṃ satataṃ bhikṣāṃ kāpālavratamāsthitaḥ //
ityuktvāṃ'tarhito devastejorūpastadā śivaḥ

utpādya kanyāmekāṃ tu brahmahatyeti viśrutām //
raktāṃbaradharāṃ raktāṃ raktasraggaṃdhalepanām

daṃṣṭākarālavadanāṃ lalajjihvātibhīṣaṇām //
aṃtarikṣaikapādāgrāṃ pibaṃtīṃ rudhiraṃ bahu

kartrīṃ karparahastāgrāṃ sphuratpiṃgogratārakām //
garjayaṃtīṃ mahāvegāṃ bhairavasyāpibhīṣaṇām

yāvadvārāṇasīṃ divyāṃ purīmeṣa gamiṣyati //
tāvattvaṃ bhīṣaṇe kālamanugacchograrūpiṇi

sarvatra te praveśosti tyaktvā vārāṇasīṃ purīm//
niyojyatāmiti śivopyaṃtardhānaṃ gatastataḥ

tatsānnidhyādbhairavopi kālobhūtkālakālataḥ //
sa devadevavākyena bibhratkāpālikaṃ vratam

kapālapāṇirviśvātmā cacāra bhuvanatrayam//
nātyākṣīccāpi taṃ devaṃ brahmahatyā sudāruṇā

satyalokepi vaikuṃṭhe maheṃdrādi purīṣvapi //
trijagatpatirugropi vratī trijagatīśvaraḥ

pratitīrthaṃ bhramannāpi vimukto brahmahatyayā

anenaivānumānena mahimā tvavagamyatām //
brahmahatyāpanodinyāḥ kāśyāḥ kalaśasaṃbhava

saṃti tīrthānyanekāni bahūnyāyatanāni ca //
adhi trilokino kāśyāḥ kalāmarhaṃti ṣoḍaśīm

tāvadgarjaṃti pāpāni brahatyādikānyalam //
yāvannāma na śṛṇvaṃti kāśyāḥ pāpācalāśaneḥ

pramathaiḥ sevyamāno'yaṃ trilokīṃ vicaranharaḥ //
kāpāliko yayau devo nārāyaṇaniketanam

athāyāṃtaṃ mahākālaṃ trinetraṃ sarpakuṃḍalam //
mahādevāṃśasaṃbhūtaṃ bhairavaṃ bhīṣaṇākṛtim

papāta daṃḍavadbhūmau dṛṣṭvā taṃ garuḍadhvajaḥ //
devāśca munayaścaiva devanāryaḥ samaṃtataḥ

nipetuḥ praṇipatyainaṃ praṇataḥ kamalāpatiḥ //
śirasyaṃjalimāropya stutvā bahuvidhaiḥ stavaiḥ

kṣīrodamathano tāṃ prāha padmālayāṃ hariḥ //
priye paśyā'bjanayane dhanyā'si subhagenaghe

dhanyo'haṃ devi suśroṇi yatpaśyāvo jagatpatim //
ayaṃ dhātā vidhātā ca lokānāṃ prabhurīśvaraḥ

anādiḥ śaraṇaḥ śāṃtaḥ paraḥ ṣaḍviṃśasaṃmitaḥ //
sarvajñaḥ sarvayogīśaḥ sarvabhūtaikanāyakaḥ

sarvabhūtāṃtarātmā'yaṃ sarveṣāṃ sarvadaḥ sadā //
yaṃ vinidrā viniḥśvāsāḥ śāṃtā dhyānaparāyaṇāḥ

dhiyā paśyaṃti hṛdaye soyamadya samīkṣyatām//
yaṃ vidurvedatattvajñā yogino yatamānasāḥ

arūpo rūpavānbhūtvā soyamāyāti sarvagaḥ //
aho vicitraṃ devasya ceṣṭitaṃ parameṣṭhinaḥ

/
yasyākhyāṃ bruvatāṃ nityaṃ na dehaḥ sopi dehadhṛk//
yaṃ dṛṣṭvā na punarjanma labhyate mānavairbhuvi

soyamāyāti bhagavāṃstryaṃbakaḥ śaśibhūṣaṇaḥ //
puṃḍarīkadalāyāme dhanyeme'dya vilocane

dhigdhikpadaṃ tu devānāṃ paraṃ dṛṣṭvā'tra śaṃkaram //
labhyate yanna nirvāṇaṃ sarvaduḥkhāṃtakṛttu yat

devatvādaśubhaṃ kiṃciddevaloke na vidyate //
dṛṣṭvāpi sarvadeveśaṃ yanmuktiṃ na labhāmahe

evamuktvā hṛṣīkeśaḥ saṃprahṛṣṭatanūruhaḥ //
praṇipatya mahādevamidamāha vṛṣadhvajam

kimidaṃ devadevena sarvajñena tvayā vibho //
kriyate jagatāṃ dhātrā sarvapāpaharā'vyaya

krīḍeyaṃ tava deveśa trilocana mahāmate //
kiṃ kāraṇaṃ virūpākṣa ceṣṭitaṃ te smarārdana

kimarthaṃ bhagavatrchaṃbho bhikṣāṃ carasi śaktipa //
saṃśayo me jagannātha natatrailokyarājyada

evamuktastataḥ śaṃbhurviṣṇumetadudāharat //
brahmaṇastu śiraśchinnamaṃgulyagranakhena ha

tadaghapratighaṃ viṣṇo carāmyetadvrataṃ śubham //
evamukto maheśena puṃḍarīkavilocanaḥ

smitvā kiṃcinnataśirāḥ punarevaṃ vyajijñapat //
yathecchasi tathā krīḍa sarvaviṣṭapanāyaka

māyayā māṃ mahādeva nacchādayitumarhasi //
nābhīkamalakośāttu koṭiśaḥ kamalāsanān

kalpe kalpe sṛjāmīśa tvanniyogabalādvibho //
tyaja māyāmimāṃ deva dustarāmakṛtātmabhiḥ

madādyo mahādeva māyayā tava mohitāḥ //
yathāvadavagacchāmi ceṣṭitaṃ te śivāpate

saṃhārakāle saṃprāpte sadevānakhilānmunīn //
lokānvarṇāśramavato hariṣyasi yadā hara

tadā kva te mahādeva pāpa brahmavadhādikam //
pārataṃtryaṃ na te śaṃbho svairaṃ krīḍettato bhavān

atītabrahmaṇāmasthnāṃ srakkaṃṭhe tava bhāsate //
tadātadā kvānugatā brahmahatyā tavānagha

kṛtvāpi sumahatpāpaṃ tvāṃ yaḥ smarati bhāvataḥ //
ādhāraṃ jagatāmīśaṃ tasya pāpaṃ vilīyate

yathā tamo na tiṣṭheta saṃnidhāvaṃśumālinaḥ //
tathā na bhavabhaktasya pāpaṃ tasya vrajetkṣayam

yaściṃtayati puṇyātmā tava pādāṃbujadvayam //
brahmahatyādikamapi pāpaṃ tasya vrajetkṣayam

tava nāmānuraktā vāgyasya puṃso jagatpate //
apyadrikūṭatulitaṃ nainastamanubādhate

rajasā tamasā vivardhitaṃ kva nu pāpaṃ paritāpadāyakam //
kva ca te śiva nāma maṃgalaṃ janajīvātu jagadrujāpaham

yadi jātucidaṃdhakadviṣastavanāmauṣṭhapuṭādviniḥsṛtam //
śivaśaṃkara caṃdraśekharetyasakṛttasya na saṃsṛtiḥ punaḥ

paramātmanparaṃdhāma svecchā vidhṛta vigraha //
kutūhalaṃ taveśedaṃ kva parādhīnateśvare

adya dhanyosmi deveśa yaṃ na paśyati yoginaḥ //
paśyāmi taṃ jaganmūlaṃ parameśvaramakṣayam

adya me paramo lābhastvadya me maṃgalaṃ param //
tvaddṛṣṭyamṛtatṛptasya tṛṇaṃ svargāpavargadam

itthaṃ vadati goviṃde vimalā padmayā tayā //
manorathavatī nāma bhikṣāpātre samarpitā

bhikṣāṭanāya devopi niragātparayā mudā //
dṛṣṭvā'nuyāyinīṃ tāṃ tu samāhūya janārdanaḥ //
saṃprārthayadbrahmahatyāṃ vimuṃca tvaṃ triśūlinam

// brahmahatyovāca // //
anenāpi miṣeṇā'haṃ saṃsevyāmuṃ vṛṣadhvajam //
ātmānaṃ pāvayiṣyāmi kva punarbhavadarśanam

sā tatyāja na tatpārśvaṃ vyāhṛtāpi murāriṇā //
tamūce'tha hariṃ śaṃbhuḥ smerāsyo vacanaṃ śubham

tvadvākpīyūṣapānena tṛptosmi bahumānada //
varaṃ vṛṇīṣva goviṃda varado'smi tavānagha

na mādyaṃti yathā bhaikṣairbhikṣavopyatisaṃskṛtaiḥ //
yathāmānasudhāpānairnunna bhikṣāṭanajvarāḥ

mahāviṣṇuruvāca // //
eṣa eva varaḥ ślāghyo yadahaṃ devatādhipam //
paśyāmi tvāṃ devadevaṃ manorathapathātigam

anabhreyaṃ sudhāvṛṣṭiranāyāso mahotsavaḥ //
ayatno nidhilābho yadvīkṣaṇaṃ harate satām

aviyogo'stu me deva tvadaṃghriyugalena vai //
eṣa eva varaḥ śaṃbho nānyaṃ kaṃcidvaraṃ vṛṇe

īśvara uvāca // //
evaṃ bhavatu te'naṃta yattvayoktaṃ mahāmate //
sarveṣāmapi devānāṃ varadastvaṃ bhaviṣyasi

anugṛhyeti daityāriṃ keṃdrādi bhuvane caran //
bheje vimuktijananīṃ nāmnā vārāṇasīṃ purīm

yatra sthitānāṃ jaṃtūnāṃ kalāṃ nārhaṃti ṣoḍaśīm//
api brahmādi devānāṃ padāni vipadāṃ padam

varaṃ vārāṇasī vāsī jaṭī muṃḍī digaṃbaraḥ //
nānyatracchatrasaṃchanna vasudhāmaṃḍaleśvaraḥ

varaṃ vārāṇasī bhikṣā na lakṣādhipatānyataḥ //
lakṣādhīśo viśedgarbhaṃ tadbhikṣāśī na garbhabhāk

bhikṣāpi yatra bhikṣubhyo dattāmalakasaṃmitā //
sumeruṇāpi tulitā vārāṇasyāṃ gururbhavet

varṣāśanaṃ hi yo dadyātkāśyāṃ sīdatkuṭuṃbine //
yāvaṃtyabdāni tāvaṃti yugāni sa divījyate

vārāṇasyāṃ varṣabhojyaṃ yo dadyānnirupāyine //
sa kadācittṛṭkṣudhā no duḥkhaṃ bhuṃkte nararṣabhaḥ

vārāṇasyāṃ nivasatāṃ yatpuṇyamupajāyate //
tadeva saṃvāsayituḥ phalaṃ tvavikalaṃ bhavet

brahmahatyādi pāpāni yasyā nāmnopi kīrtanāt //
tyajaṃti pāpinaṃ kāśī sā kenehopamīyate

kṣetre praviṣṭamātre'tha bhairave bhīṣaṇākṛtau //
hāhetyuktvā brahmahatyā pātālatalamāviśat

kapālabrahmaṇo rudraḥ sarveṣāmeva paśyatām//
hastātpatitamālokya nanarta parayā mudā

vidheḥ kapālaṃ nāmuṃcatkaramatyaṃtaduḥsaham//
harasya bhramataḥ kvāpi tatkāśyāṃ kṣaṇato'patat

śūlino brahmaṇo hatyā nāpaiti sma ca yā kvacit //
sā kāśyāṃ kṣaṇato naṣṭā kathaṃ kāśī na durlabhā

ataḥ pradakṣiṇīkāryā pūjanīyā purī tviyam

vārāṇasīti kāśīti mahāmaṃtramimaṃ japam //
yāvajjīvaṃ trisaṃdhyaṃ tu jaṃturjātu na jāyate

avimuktaṃ mahākṣetraṃ smaranprāṇāṃstu yastvajet //
dūradeśāṃtarasthopi sopi jātu na jāyate

ānaṃdakānane yasya cittaṃ saṃsmarate sadā //
tatkṣetranāmaśravaṇānna sa bhūyo'bhijāyate

rudrāvāse vasennityaṃ naro niyatamānasaḥ //
enasāmapi saṃbhāraṃ kṛtvā kālādvimucyate

mahāśmaśānamāsādya yadi devādvipadyate //
punaḥ śmaśānaśayanaṃ na kvāpi labhate pumān

kapālamocanaṃ kāśyāṃ ye smariṣyaṃti mānavāḥ //
teṣāṃ vinaṃkṣyati kṣipramihānyatrāpi pātakam

āgatya tīrthapravare snānaṃ kṛtvā vidhānataḥ //
tarpayitvā pitṝndevānmucyate brahmahatyayā

aśāśvatamidaṃ jñātvā vārāṇasyāṃ vasaṃti ye //
dehāṃte tatparaṃ jñānaṃ teṣāṃ dāsyati śaṃkaraḥ

iyaṃ kāśīpurī vipra sākṣādrudratanuḥ parā //
anirvācyā parānaṃdā duṣprāpyeśavirodhibhiḥ

asyāstattvamahaṃ jāne śivabhaktiparopi vā //
mucyaṃte jaṃtavo'traiva yathā yogena yoginaḥ

paraṃpadamiyaṃ kāśī parānaṃda iyaṃ purī //
iyameva paraṃ jñānaṃ sevyā'sau mokṣakāṃkṣibhiḥ

atroṣitvāpīśabhaktānviruṇaddhi tu yaḥ kudhīḥ //
puryaidruhyati vā mūḍhastasyānyatrātra no gatiḥ

kapālamocanaṃ tīrthaṃ puraskṛtvā tu bhairavaḥ //
tatraiva tasthau bhaktānāṃ bhakṣayannaghasaṃtatim

pāpabhakṣaṇamāsādya kṛtvāpāpaśatānyapi //
kuto bibheti pāpebhyaḥ kālabhairavasevakaḥ

āmardayati pāpāni duṣṭānāṃ ca manorathān //
āmardaka iti khyātastato'sau kālabhairavaḥ

kalikālaṃ kalayati sadā kāśī nivāsinām//
ataḥ khyātiṃ parāṃ prāptaḥ kālabhairavasaṃjñitām

sadaiva yasya bhaktebhyo yamadūtāḥ sudāruṇāḥ //
paramāṃ bhīrutāṃ prāptāstatosau bhairavaḥ smṛtaḥ

mārgaśīrṣāsitāṣṭamyāṃ kālabhairavasaṃnidhau //
upoṣya jāgaraṃ kurvanmahāpāpaiḥ pramucyate

yatkiṃcidaśubhaṃ karma kṛtaṃ mānuṣabuddhitaḥ //
tatsarvaṃ vilayaṃ yāti kālabhairava darśanāt

anekajanmaniyutairyatkṛtaṃ jaṃtubhistvagham//
tatsarvaṃ vilayatyāśu kālabhairava darśanāt

kṛtvā ca vividhāṃ pūjāṃ mahāsaṃbhāravistaraiḥ //
naro mārgāsitāṣṭamyāṃ vārṣikaṃ vighnamutsṛjet

aṣṭamyāṃ ca caturdaśyāṃ ravibhūmijavāsare //
yātrāṃ ca bhairavīṃ kṛtvā kṛtaiḥ pāpaiḥ pramucyate

kālabhairava bhaktānāṃ sadā kāśīnivāsinām //
vighnaṃ yaḥ kurute mūḍhaḥ sa durgatimavāpnuyāt

viśveśvarepi ye bhaktā no bhaktāḥ kālabhairave //
kāśyāṃ te vighnasaṃghātaṃ labhaṃte tu pade pade

tīrthe kālodake snātvā kṛtvā tarpaṇamatvaraḥ //
vilokya kālarājaṃ ca nirayāduddharetpitṝn

aṣṭau pradakṣiṇīkṛtya pratyahaṃ pāpabhakṣaṇam //
naro na pāpairlipyeta manovākkāyasaṃbhavaiḥ

tasminnāmardake pīṭhe japtvāsvābhīṣṭadevatām //
ṣaṇmāsaṃ siddhimāpnoti sādhako bhairavājñayā

vārāṇasyāmuṣitvā yo bhairavaṃ na bhajennaraḥ //
tasya pāpāni vardhaṃte śuklapakṣe yathā śaśī

yaṃ yaṃ saṃcitayetkāmaṃ pāpabhakṣaṇasevayā //
balipūjopahāraiśca taṃ taṃ sa samavāpnuyāt

kālarājaṃ na yaḥ kāśyāṃ pratibhūtāṣṭamīkujam //
bhajettasyakṣayetpuṇyaṃ kṛṣṇapakṣe yathā śaśī

śrutvādhyāyamimaṃ puṇyaṃ brahmahatyāpanodakam //
bhairavotpattisaṃjñaṃ ca sarvapāpaiḥ pramucyate

baṃdhanāgārasaṃsthopi prāptopi vipadaṃ parām //
prādurbhāvaṃ bhairavasya śrutvā mucyeta saṃkaṭāt

iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍe pūrvārddhe bhairavaprādurbhāvonāmekatriṃśodhyāyaḥ