Skanda Purana · Chapter 4.32

// agastya uvāca // //
barhiyāna samācakṣva harikeśasamudbhavam //
kosau kasya sutaḥ śrīmānkīdṛgasya tapo mahat

kathaṃ ca devadevasya priyatvaṃ samupeyivān //
kāśīvāsijanīnobhūtkathaṃ vā daṃḍanāyakaḥ

etadicchāmyahaṃ śrotuṃ prasādaṃ kuru me vibho //
annadatvaṃ ca saṃprāptaḥ kathameṣa mahāmatiḥ

saṃbhramo vibhramaścobhau kathaṃ tadanugāminau //
vibhrāṃtikāriṇau kṣetravairiṇāṃ sarvadā nṛṇām

// skaṃda uvāca // //
samyagāpṛcchi bhavatā kāśīvāsisamāhitam //
kuṃbhasaṃbhava viprarṣe daṃḍapāṇi kathānakam

yadākarṇya naraḥ prājña kāśīvāsasya yatphalam //
niṣpratyūhaṃ tadāpnoti viśvabhartturanugrahāt

ratnabhadra iti khyātaḥ parvate gaṃdhamādane //
yakṣaḥ sukṛtalakṣaśrīḥ purā parama dhārmikaḥ

pūrṇabhadraṃ sutaṃ prāpya so'bhūtpūrṇamanorathaḥ //
vayaścaramamāsādya bhuktvā bhogānanekaśaḥ

śāṃbhavenātha yogena dehamutsṛjya pārthivam //
āsasādāśavaṃ śāṃtaṃ śāṃtasarveṃdriyārthakaḥ

pitaryuparateso'tha pūrṇabhadro mahāyaśāḥ //
sukṛtopāttavibhava bhavasaṃbhogabhuktibhāk

sarvānmanorathām̐llebhe vinā svargaikasādhanam //
gārhasthyāśrama nepathyaṃ pathyaṃ paitāmahaṃ mahat

saṃsāratāpasaṃtaptāvayavāmṛtasīkaram //
apatyaṃ patatāṃ potaṃ bahukleśamahārṇave

pūrṇabhadro'tha saṃvīkṣya maṃdiraṃ sarvasuṃdaram //
tadbālakomalālāpa vikalaṃ tyaktamaṃgalam

śūnyaṃ daridrahṛdiva jīrṇāraṇyamivāthavā //
pāṃthavatprāṃtaramiva khinno'tīvānapatyavān

āhūya gṛhiṇī so'tha yakṣaḥ kanakakuṃḍalām //
uvāca yakṣiṇīṃ śreṣṭhāṃ pūrṇabhadro ghaṭodbhava

na harmyaṃ sukhadaṃ kāṃte darpaṇodarasuṃdaram //
muktā gavākṣasubhagaṃ caṃdrakāṃtaśilājiram

padmarāgeṃdranīlārcirarcitāṭṭālakaṃ kvaṇat //
vidrumastaṃbhaśobhāḍhyaṃ sphuratsphaṭikakuḍyavat

preṃkhatpatākānikaraṃ maṇimāṇikyamālitam//
kṛṣṇāgurumahādhūpa bahulāmodamoditam

anarghyāsanasaṃyuktaṃ cāruparyaṃkabhūṣitam //
ramyārgalakapāṭāḍhyaṃ dukūlacchannamaṃḍapam

suramyaratiśālāḍhyaṃ vājirājivirājitam //
dāsadāsīśatākīrṇaṃ kiṃkiṇīnādanāditam

nūpurārāvasotkaṃṭha kekikekāravākulam //
kūjatpārāvata kulaṃ gurusārīkathāvaram

khelanmarālayugalaṃ jīvaṃ jīvakakāṃtimat //
mālyāhūta dvirephāṇāṃ maṃjuguṃjāravāvṛtam

karpūraiṇa madāmoda sodarānilavījitam //
krīḍāmarkaṭadaṃṣṭrāgrī kṛtamāṇikyadāḍimam

dāḍimībījasaṃbhrāṃtaśukatuṃḍāttamauktikam //
dhanadhānyasamṛddhaṃ ca padmālayamivāparam

kamalāmodagarbhaṃ ca garbharūpaṃ vinā priye //
garbharūpamukhaṃ prekṣye kathaṃ kanakakuḍale

yadyupāyo'sti tadbrūhi dhigaputrasya jīvitam //
sarvaśūnyamivābhāti gṛhametadanaṃgajam

dhigetatsaudhasauṃdaryaṃ dhigetaddhanasaṃcayam //
vināpatyaṃ priyatame jīvitaṃ ca dhigāvayoḥ

pralapaṃtamiva proccaiḥ priyaṃ kanakakuṃḍalā //
babhāṣeṃ'tarviniḥśvasya yakṣiṇī sā pativratā

// kanakakuṃḍalovāca // //
kimarthaṃ khidyase kāṃta jñānavānasi yadbhavān //
atropāyo'styapatyāptyai visrabdhamavadhāraya

kimudyamavatāṃ puṃsāṃ durlabhaṃ hi carācare //
īśvarārpitabuddhīnāṃ sphuṃraṃtyagre manorathāḥ

daivaṃ hetuṃ vadaṃtyevaṃ bhṛśaṃ kāpuruṣāḥ pate //
svayaṃ purākṛtaṃ karma daivaṃ tacca na hītarat

tataḥ pauruṣamālaṃbya tatkarma pariśāṃtaye //
īśvaraṃ śaraṇaṃ yāyātsarvakāraṇakāraṇam

apatyaṃ draviṇaṃ dārā hārā harmya hayā gajāḥ //
sukhāni svargamokṣau ca na dūre śivabhaktitaḥ

vidhātuḥ śāṃbhavīṃ bhaktiṃ priya sarve manorathāḥ //
siddhayoṣṭau gṛhadvāraṃ sevaṃte nātra saṃśayaḥ

nārāyaṇopi bhagavānaṃtarātmā jagatpatiḥ //
carācarāṇāmavitā jātaḥ śrīkaṃṭhasevayā

brahmaṇaḥ sṛṣṭikarttṛtvaṃ dattaṃ tenaiva śaṃbhunā //
iṃdrādayo lokapālā jātā śaṃbhoranugrahāt

mṛtyuṃjayaṃ sutaṃ lebhe śilādopyanapatyavān //
śvetaketurapi prāpa jīvitaṃ kālapāśataḥ

kṣīrārṇavādhipatitāmupamanyuravāptavān //
aṃdhakopyabhavadbhṛṃgī gāṇapatyapadorjitaḥ

jigāya śārṅgiṇaṃ saṃkhye dadhīciḥ śaṃbhusevayā //
prājāpatyapadaṃ prāpa dakṣaḥ saṃśīlya śaṃkaram

manorathapathātītaṃ yacca vācāmagocaram//
gocaro gocarīkuryāttatpadaṃ kṣaṇato mṛḍaḥ

anārādhya maheśānaṃ sarvadaṃ sarvadehinām //
kopi kvāpi kimapyatra na labheteti niścitam

tasmātsarvaprayatnena śaṃkaraṃ śaraṇaṃ vraja //
yadicchasi priyaṃ putraṃ priyasarvajanīnakam

iti śrutvā vacaḥ patnyāḥ pūrṇabhadraḥ sa yakṣarāṭ //
ārādhya śrīmahādevaṃ gītajño gītavidyayā

dinaiḥ katipayaireva paripūrṇamanorathaḥ //
putrakāmamavāpoccaistasyāṃ patnyāṃ dṛḍhavrataḥ

nādeśvaraṃ samabhyarcya kaiḥ kairnāpi svaciṃtitam //
tasmātkāśyāṃ prayatnena sevyo nādeśvaro nṛbhiḥ

aṃtarvatnyatha kālena tatpatnī suṣuve sutam //
tasya nāma pitā cakre harikeśa iti dvija

prītidāyaṃ dadau cātha bhūriputrānanekṣaṇāt //
pūrṇabhadrastathāgastya hṛṣṭā kanakakuṃḍalā

bālo'pi pūrṇacaṃdrābha vadano madanopamaḥ //
vṛddhiṃ pratikṣaṇaṃ prāpa śuklapakṣa ivoḍurāṭ

yadāṣṭavarṣadeśīyo harikeśo'bhavacchiśuḥ //
nityaṃ tadāprabhṛtyevaṃ śivamekamamanyata

pāṃsukrīḍanasaktopi kuryālliṃgaṃ rajomayam //
śādvalaiḥ komalatṛṇaiḥ pūjayecca sa kautukam

ākārayati mitrāṇi śivanāmnā'khilāni saḥ //
caṃdraśekharabhūteśa mṛtyuṃjaya mṛḍeśvaraḥ

dhūrjaṭe khaṃḍaparaśo mṛḍānīśa trilocana //
bhargaśaṃbhopaśupate pinākinnugraśaṃkara

śrīkaṃṭhanīlakaṃṭheśa smarāre pārvatīpate //
kapālinbhālanayana śūlapāṇe maheśvara

ajināṃbaradigvāsaḥ svardhunī klinnamaulija //
virūpākṣāhinepathya gṛṇannāmāvalīmimām

savayaskāniti muhuḥ samāhvayati lālayan //
śabdagrahau na gṛhṇītastasyānyākhyāṃ harādṛte

padbhyāṃ na padyate cānyadṛte bhūteśvarājirāt //
draṣṭuṃ rūpāṃtaraṃ tasya vīkṣaṇena vicakṣaṇe

rasayettasya rasanā haranāmākṣarāmṛtam//
śivāṃghrikamalāmodādghrāṇaṃ naiva jighṛkṣati

karau tatkautukakarau mano manati nāparam //
śivasātkṛtyapeyāni pīyate tena saddhiyā

bhakṣyate sarvabhakṣyāṇi tryakṣapratyakṣagānyapi //
sarvāvasthāsu sarvatra na sa paśyecchivaṃ vinā

gacchangāyansvapaṃstiṣṭhañcchayāno'danpibannapi //
paritastryakṣamaikṣiṣṭa nānyaṃ bhāvaṃ ciketi saḥ

kṣaṇadāsu prasuptopi kva yāsīti vadanmuhuḥ //
kṣaṇaṃ tryakṣa pratīkṣasva budhyatīti sa bālakaḥ

spaṣṭāṃ ceṣṭāṃ vilokyeti harikeśasya tatpitā //
aśikṣayatsutaṃ so'tha gṛhakarmarato bhava

ete turaṃgamā vatsa tavaite'śvakiśo rakāḥ //
citrāṇīmāni vāsāṃsi sudukūlānyamūni ca

ratnānyākaraśuddhāni nānājātīnyanekaśaḥ //
kupyaṃ bahuvidhaṃ caitadgodhanāni mahāṃti ca

amatrāṇi mahārhāṇi raupya kāṃsyamayāni ca //
paṇanīyāni vastūni nānādeśodbhavānyapi

cāmarāṇi vicitrāṇi gaṃdhadravyāṇyanekaśaḥ //
etānyanyāni bahuśastvaneke dhānyarāśayaḥ

etattvadīyaṃ sakalaṃvastujātaṃ samaṃtataḥ //
arthopārjanavidyāśca sarvāḥ śikṣasva putraka

ceṣṭāstyaja daridrāṇāṃ dhūlidhūsariṇāmamūḥ //
abhyasyavidyāḥ sakalā bhogānnirviśya cottamān

tāṃ daśāṃ caramāṃ prāpya bhaktiyogaṃ tataścara //
asakṛcchikṣitaḥ pitretyavamanya gurorgiram

ruṣṭadṛṣṭiṃ ca janakaṃ kadācidavalokya saḥ //
nirjagāma gṛhādbhīto harikeśa udāradhīḥ

tataściṃtāmavāpoccairdigbhrāṃtimapi cāptavān //
aho bāliśabuddhitvātkutastyaktaṃ gṛhaṃ mayā

kva yāmi kva sthite śaṃbho mama śreyo bhaviṣyati //
pitrā nirvāsitaścāhaṃ na ca vedmyatha kiṃcana

iti śrutaṃ mayā pūrvaṃ piturutsaṃgavartinā //
gadatastātapurataḥ kasyacidvacanaṃ sphuṭam

mātrā pitrā parityaktā ye tyaktā nijabaṃdhubhiḥ //
yeṣāṃ kvāpi gatirnāsti teṣāṃ vārāṇasī gatiḥ

jarayā paribhūtā ye ye vyādhivikalīkṛtāḥ //
yeṣāṃ kvāpi gatirnāsti teṣāṃ vārāṇasī gatiḥ

pade pade samākrāṃtā ye vipadbhiraharniśam //
yeṣāṃ kvāpi gatirnāsti teṣāṃvārāṇasī gatiḥ

pāparāśibhirākrāṃtā ye dāridrya parājitāḥ //
yeṣāṃ kvāpi gatirnāsti teṣāṃ vārāṇasī gatiḥ

saṃsāra bhayabhītāya ye ye baddhāḥ karmabaṃdhanaiḥ //
yeṣāṃ kvāpi gatirnāsti teṣāṃ vārāṇasī gatiḥ

śrutismṛtivihīnā ye śaucācāravivarjitāḥ //
yeṣāṃ kvāpi gatirnāsti teṣāṃ vārāṇasī gatiḥ

ye ca yogaparibhraṣṭāstapo dāna vivarjitāḥ //
yeṣāṃ kvāpi gatirnāsti teṣāṃ vārāṇasī gatiḥ

madhye baṃdhujane yeṣāmapamānaṃ pade pade //
teṣāmānaṃdadaṃ caikaṃ śaṃbhorānaṃdakānanam

ānaṃdakānane yeṣāṃ rucirvai vasatāṃ satām //
viśveśānugṛhītānāṃ teṣāmānaṃdajodayaḥ

bharjyate karmabījāni yatra viśveśavahninā //
ato mahāśmaśānaṃ tadagatīnāṃ parā gatiḥ

harikeśo vicāryeti yāto vārāṇasīṃ purīm //
yatrāvimukte jaṃtūnāṃ tyajatāṃ pārthivīṃ tanum

punarno tanusaṃbaṃdhastanudveṣiprasādataḥ //
ānaṃdavanamāsādya sa tapaḥ śaraṇaṃ gataḥ

atha kālāṃtare śaṃbhuḥ praviśyānaṃdakānamam //
pārvatyai darśayāmāsa nijamākrīḍakānanam

amaṃdāmodamaṃdāraṃ kovidārapariṣkṛtam //
cārucaṃpakacūtāḍhyaṃ protphullanavamallikam

vikasanmālatījālaṃ karavīravirājitam //
prasphuṭatketakivanaṃ prodyatkurabakorjitam

jṛṃbhadvicakilāmodaṃ lasatkaṃkelipallavam//
navamallīparimalākṛṣṭaṣaṭpadanāditam

puṣpyapunnāganikaraṃ bakulāmodamoditam //
medasvipāṭalāmoda sadāmodita diṅmukham

bahuśolaṃbirolaṃba mālāmālitabhūtalam //
calaccaṃdanaśākhāgra ramamāṇapi kākulam

guruṇā'guruṇāmatta bhadrajātivihaṃgamam //
nāgakesaraśākhāstha śālabhaṃji vinoditam

merutuṃga namerusthacchāyākrīḍitakiṃnaram //
kiṃnarīmithunodgītaṃ gānavacchukakiṃśukam

kadaṃbānāṃ kadaṃbeṣu guṃjadrolaṃbayugmakam //
jitasauvarṇavarṇocca karṇikāravirājitam

śālatālatamālālī hiṃtālī lakucāvṛtam //
lasatsaptacchadāmodaṃ kharjūrīrājirājitam //
nārikela tarucchanna nāraṃgīrāgaraṃjitam

phalijaṃbīranikaraṃ madhūkamadhupākulam //
śālmalī śītalacchāyaṃ picumaṃda mahāvanam

madhurāmoda damanacchannaṃ marubanoditam //
lavalīlolalīlābhṛnmaṃdamārutalolitam

bhillī hallīsakaprīti jhillīrāvavirāviṇam //
kvacitsaraḥ parisarakrīḍatkroḍakadaṃbakam

marālīgalanālīstha bisāsaktasitacchadam //
viśokakokamithunakrīḍākreṃkārasuṃdaram

bakaśāvakasaṃcāraṃ lakṣmaṇāsakta sārasam //
mattabarhiṇasaṃghuṣṭaṃ kapiṃjalakulākulam

jīvaṃjīvalasajjīvaṃ kvaṇatkāraṃḍavotkaṭam //
dīrghikāvārisaṃcāri śītamāruta vījitam

madāṃdolitakahlāra parāgaparipiṃgalam //
ullasatpaṃkajamukhaṃ nīleṃdīvaralocanam

tamālakabarībhāraṃ vilasaddāḍimīradam //
bhramarālīlasadbhrūkaṃ śukanāsāvirājitam

mahāṃdhuśravaṇaṃ dūrvā śmaśrubhiḥ pariśobhitam //
kamalāmodaniḥśvāsaṃ biṃbīphala radacchadam

supadmapatravasanaṃ karṇikāravibhūṣaṇam //
kamrakaṃbu lasatkaṃṭhaṃ śaṃkaraskaṃdha baṃdhuram

gaṃdhasārasamāsaktā hīna dordaṃḍamaṃḍitam //
aśokapallavāṃguṣṭhaṃ ketakīnakharojjvalam

lasatkaṃṭhīravoraskaṃ gaṃḍaśailapṛthūdaram //
jalāvartalasannābhi tarujaṃghā yugānvitam

sthalabhākpadmacaraṇaṃ mattamātaṃgagāminam //
lasatkadalikedāradalaccīnāṃśukāvṛtam

nānāsukumamālābhirmālitaṃ ca samaṃtataḥ //
akaṃṭakitarucchannaṃ mahiṣa śvāpadāvṛtam

caṃdrakāṃtaśilāsuptakṛṣṇaiṇaharitoḍupam //
taruprakīrṇakusuma jitasvarlokatārakam //
darśayannitthamākrīḍaṃ devyai devoviśadvanam

// devadeva uvāca // //
yathāpriyatamā devi mama tvaṃ sarvasuṃdari //
tathā priyataraṃ caitanme sadānaṃdakānanam

atrānaṃdavane devi mṛtānāṃ madanugrahāt //
vapustvamṛtatāṃ prāptamapunarbhavinastu te

bhavino ye vipadyaṃte vārāṇasyāṃ mamājñayā //
teṣāṃ bījāni dagdhāni śmaśānajvaladagninā

mahāśmaśāne ye prāptā dīrghanidrāṃ girīṃdraje //
na punargarbhaśayane te svapaṃti kadācana

brahmajñānena mucyaṃte nānyathā jaṃtavaḥ kvacit //
brahmajñānamaye kṣetre prayāge vā tanutyajaḥ

brahmajñānaṃ tadevāhaṃ kāśīsaṃsthitibhāginām //
diśāmi tārakaṃ prāṃte mucyaṃte te tu tatkṣaṇāt

gṛhṇīyuḥ pāpakarmāṇi kāśīmṛtaviniṃdakāḥ //
sukṛtāni stutikṛto mucyaṃte te'tra jaṃtavaḥ

brahmajñānaṃ kuto devi kalinopahatātmanām //
svabhāvacaṃcalākṣāṇāṃ tadbrahmeha diśāmyaham

yogino yogavibhraṣṭāḥ pataṃtyaiśvaryamohitāḥ //
kāśyāṃ patitvā na punaḥ pataṃtyapi mahālaye

brahmajñānaṃ na viṃdaṃti yogairekena janmanā //
janmanaikena mucyaṃte kāśyāmaṃtakṛto janāḥ

yatheha mucyate jaṃturgirije madanugrahāt //
avimukte mahākṣetre na tathānyatra kutracit

bahujanmasamabhyāsādyogī mucyeta vā na vā //
mṛtamātro vimucyeta kāśyāmekena janmanā

na sidhyati kalau yogo na sidhyati kalau tapaḥ //
nyāyārjitadhanotsargaḥ sadyaḥ sidhyetkalau naraḥ

na vrataṃ na tapo nejyā na japo na surārcanam //
dānameva kalau muktyai kāśīdānairavāpyate

kalau viśveśvaro devaḥ kalau vārāṇasī purī //
kalau bhāgīrathī gaṃgā kalau dānaṃ viśiṣyate

gaṃgottaravahākāśyāṃ liṃgaṃ viśveśvaraṃ mama //
ubhe vimuktide puṃsāṃ prāpye dānabalātkalau

puṇyavānitaro vāpi mama kṣetrasya sevayā //
mukto bhavati deveśi nātra kāryā vicāraṇā

avimuktasya māhātmyātpuṇyapāpena karmaṇā //
devi prabhavataḥ puṃsāmapijanmaśatārjite

avimuktaṃ na moktavyaṃ tasmāddevi mumukṣuṇā //
hanyamānena bahudhā hyupasargaśatairapi

vidhāya kṣetrasaṃnyāsaṃ ye vasaṃtīha mānavāḥ //
jīvanmuktāstu te devi teṣāṃ vighnaṃ harāmyaham

na yogināṃ hṛdākāśe na kailāse na maṃdare //
tathā vāsaratirme'sti yathā kāśyāṃ ratirmama

kāśīvāsi jano devi mama garbhe vasetsadā //
atastaṃ mocayāmyaṃte pratijñeyaṃ yato mama

tāmasīṃ prakṛtiṃ prāpya kālo bhūtvā carācaram //
grasāmi līlayā devi kāśīṃ rakṣāmi yatnataḥ

premapātradvayaṃ devi nitarāṃ netaranmama //
tvaṃ vā tapodhane gauri kāśī vānaṃdabhūmikā

vinā kāśī na me sthānaṃ vinā kāśī na me ratiḥ //
vinā kāśī na nirvāṇaṃ satyaṃ satyaṃ vadāmyaham

brahmāṃḍagolake yadvanmuktiḥ kāśyāṃ vyavasthitā //
aṣṭāṃgayogayuktyā vā na tathā helayā'nyataḥ

iti bruvāṇo deveśo harikeśamavaikṣata //
madhye vanaṃ tapasyaṃtamaśokatarumūlagam

śuṣkasnāyupinaddhāsthi saṃcayaṃ niścalākṛtim //
valmīkakīṭakākoṭiśoṣitāsṛgasṛgdharam

nirmāṃsakīkasacayaṃ sphaṭikopalaniścalam //
śaṃkhakuṃdeṃdutuhina mahāśaṃkhalasacchriyam

satvāvalaṃbitaprāṇamāyuḥśeṣeṇarakṣitam //
niḥśvāsocchāsapavanavṛttisūcitajīvitam

nimeṣonmeṣasaṃcāra piśunīkṛtajaṃtukam //
piṃgatārasphuradraśmi netradīpita diṅmukham

tattapogniśikhādāva cuṃbitamlānakānanam//
tatsaumyadṛksudhāvarṣa saṃsiktā'khilabhūruham

sākṣāttapasyaṃtamiva tapo dhṛtvā narākṛtim //
nirākṛtiṃ nirākāṃkṣaṃ kṛtvā bhaktiṃ ca kāṃcana

kuraṃgaśāvairgaṇaśo bhramadbhiḥ parivāritam //
nitāṃtabhīṣaṇāsyaiśca paṃcāsyaiḥ parirakṣitam

taṃ tathābhūtamālokya devī devaṃ vyajijñapat //
vareṇacchaṃdayeśāmuṃ nijabhaktaṃ tapasvinam

tvadekacittaṃ tvadadhīnajīvitaṃ tvadekakarmāṇamamuṃ tvadāśrayam //
tīvraistapobhiḥ pariśuṣkavigrahaṃ kuruṣva yakṣasya varairanugraham

devo vṛṣeṃdrādavaruhya devyā śailādinā dattakarāvalaṃbaḥ //
samādhisaṃkocitanetrapatraṃ pasparśa hastena dayārdracetāḥ

tataḥ sa yakṣo vinimīlya cakṣuṣī tryakṣaṃ puro vīkṣya samakṣamātmanaḥ //
udyatsahasrāṃśu sahasratejasaṃ jagāda harṣākula gadgadākṣaram

jayeśa śaṃbho girijeśa śaṃkara triśūlapāṇe śaśikhaṃḍaśekhara //
sparśatkṛpālo tava pāṇipaṃkajaṃ prāpyāmṛtībhūtatanūlato'bhavam

śrutvoditāṃ tasya maheśvaro giraṃ mṛdvīkayā sāmyamupeyuṣīṃ mṛdu //
bhaktasya dhīrasya mahātaponidhe dadau varāṇāṃ nikara tadā mudā

kṣetrasya yakṣāsya mama priyasya me bhavādhunā daṃḍadharo varānmama //
sthirastvamadyādi durātmadaṃḍakaḥ supālakaḥ puṇyakṛtāṃ ca matpriyaḥ

tvaṃ daṃḍapāṇirbhava nāmato'dhunā sarvāngaṇāñchādhi mamājñayotkaṭān //
gaṇāvimau tvāmanuyāyinau sadā nāmnā yathārthau nṛṣu saṃbhramodbhramau

tvamaṃtyabhūṣāṃ kuru kāśivāsināṃ gale sunīlāṃ bhujageṃdra kaṃkaṇām //
bhālesu netrāṃ karikṛttivāsasaṃ vāmekṣaṇālakṣita vāmabhāgām

maulau lasatpiṃgakapardabhāriṇī vibhūtisaṃkṣālita puṇyavigrahām //
ahohimāṃśoḥ kalayā lasacchriyaṃ vṛṣeṃdralīlā gatimaṃdagāminīm

tvamannadaḥ kāśinivāsināṃ sadā tvaṃ prāṇado jñānada eka eva hi //
tvaṃ mokṣado manmukhasūpadeśatastvaṃ niścalāṃ sadvasatiṃ vidhāsyasi

tvaṃ vighnapūgaiḥ paripīḍya pāpinaḥ saṃbhrātimutpādya vineṣyase bahiḥ //
ānīya bhaktānkṣaṇatopidūrato muktiṃ parāṃ dāpayitāsi piṃgala

tvatsātkṛte kṣetravare hi yakṣarāṭkastvāmanārādhya vimuktibhājanam //
sabhājanaṃ pūrvata eva te carettataḥ samarcāṃ mama bhakta ācaret

tvaṃ grāmavāsaprada eva me pure'dhyakṣastvamedhīha ca daṃḍanāyakaḥ //
duṣṭānsamudghāṭaya kāśivairiṇaḥ kāśīṃ purīṃ rakṣa sadā mudānvitaḥ

pūrṇabhadrasutadaṃḍanāyaka tryakṣayakṣaharikeśa piṃgala //
kāśivāsa vasatāṃ sadānnadajñānamokṣadagaṇāgraṇīrbhava

madbhaktiyuktopi vinā tvadīyāṃ bhaktiṃ na kāśī vasatiṃ labheta //
gaṇeṣu deveṣu hi mānaveṣu tadagramānyo bhava daṃḍapāṇe

jñānodatīrthe vihitodakakriyo yastvāṃ samārādhayitā gaṇeśam //
sa eva loke kṛtakṛtyatāmagānmamātulānugrahato'tra puṇyavān

tvaṃ dakṣiṇasyāṃ diśi daṃḍapāṇe sadaiva me netrasamakṣamatra //
tvaṃ daṃḍayanprāṇabhṛto durīhānihāsvanṝnsvānabhayaṃ diśanvai

// skaṃda uvāca // //
iti dattvā varānvipra girīśo daṃḍapāṇaye //
vṛṣeṃdramadhiruhyātha viveśānaṃdakānanam

kuṃbhodbhava tadārabhya yakṣarāḍdaṃḍanāyakaḥ //
purīṃ vārāṇasīṃ samyaganuśāsti nideśataḥ

ahamapyatra vasatiṃ cakre tadanusūyayā //
vasannapi mayā kāśyāṃ yataḥ saṃbhāvito na saḥ

mune kṣetraṃ yadatyākṣīstvamapyevaṃvidho vaśī //
śaṃke tatrāhamevāddhā kāmaṃ tasyaiva vikriyām

manāgviruddhācaraṇaṃ yadi dvija vilakṣayet //
harikeśastadā kāśyāṃ kva sthitiḥ kva ca nirvṛtiḥ

daṃḍapāṇimanārādhya kaḥ kāśyāṃ sukhamāpnuyāt //
pravivikṣurahaṃ kāśīṃ dūragopi bhajāmi tam

ratnabhadrāṃgajodbhūtaṃ pūrṇabhadrasutottama //
nirvighnaṃ kuru me yakṣa kāśīvāsaṃ śivāptaye

dhanyo yakṣaḥ pūrṇabhadro dhanyā kāṃcanakuṃḍalā //
yayorjaṭharapīṭhebhūrdaṃḍapāṇe mahāmate

jaya yakṣapate dhīra jaya piṃgalalocana //
jaya piṃgajaṭābhāra jaya daṃḍa mahāyudha

avimukta mahākṣetra sūtradhārogratāpasa //
daṃḍanāyaka bhīmāsya jaya viśveśvarapriya

saumyānāṃ saumyavadana bhīṣaṇānāṃ bhayānaka //
kṣetrapāpadhiyāṃ kāla mahākālamahāpriya

jayaprāṇada yakṣeṃdra kāśīvāsānnamokṣada //
mahāratnasphuradraśmi cayacarcita vigraha

mahāsaṃbhrātijanaka mahodbhrāṃti pradāyaka //
abhaktānāṃ ca bhaktānāṃ saṃbhrātyudbhrāṃti nāśaka

prāṃtanepathyacatura jayajñānanidhiprada //
jayagaurīpadābjāle mokṣekṣaṇavicakṣaṇa

yakṣarājāṣṭakaṃ puṇyamidaṃ nityaṃ trikālataḥ //
japāmi maitrāvaruṇe vārāṇasyāptikāraṇam

daṃḍapāṇyaṣṭakaṃ dhīmāñjapanvighnairna jātucit //
śraddhayā paribhūyeta kāśīvāsaphalaṃ labheta

prādurbhāvaṃ daṃḍapāṇeḥ śṛṇvantotramidaṃ gṛṇan //
vipattimanyataḥ prāpya kāśīṃ janmāṃtare labhet

śrutvādhyāyamimaṃ puṇyaṃ daṃḍapāṇisamudbhavam //
paṭhitvā pāṭhayitvāpi na rvighrairabhibhūyatai

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārddhe daṃḍapāṇiprādurbhāvo nāma dvātriṃśo'dhyāyaḥ