Skanda Purana · Chapter 4.10

// śivaśarmovāca // //
ramayaṃtī manotīva keyaṃ kasyeyamīśituḥ //
nayanānaṃdasaṃdohadāyinīpūranuttamā

gaṇāvūcatuḥ // //
śivaśarmanmahābhāgasutīrthaphalitadruma //
loko'tra ramate vipra sahasākṣapurī tviyam

tapobalena mahatā vihitā viśvakamarṇā //
divāpi kaumudī yasyāḥ saudhaśreṇīśriyaṃ śrayet

yadākalānidhiḥ kvāpi darśe 'dṛśyatvamāvahet //
tadā svapreyasīṃ jyotsnāṃ saudheṣveṣu nigūhayet

yadacchabhittau vīkṣya svamanyayopidviśaṃkitā //
mugdhānāśuviśeccitramapisvāṃcitraśālikām

harmyeṣu nīlamaṇibhirnirmiteṣvatranirbhayam //
svanīlimānamādhāya tamohaḥsvapi tiṣṭhati

caṃdrakāṃtaśilājālasrutamātrāmalaṃjalam //
tatra cādāya kalaśairnecchaṃtyanyajjalaṃ janāḥ

kuviṃdā na ca saṃtyatra na ca te paśyato harāḥ //
cailānyalaṃkṛtīratra yataḥ kalpadrumorpayet

gaṇakā nātra vidyaṃte ciṃtāvidyāviśāradāḥ //
yataściketi sarveṣāṃ ciṃtā ciṃtāmaṇirdrutam

sūpakārā na saṃtyatra rasakarma vicakṣaṇāḥ//
dugdhe sarvarasānekā kāmadhenuratoyataḥ

kīrtiruccaiḥśravā yasya sarvato vājirājiṣu //
ratnamuccaiḥśravāḥ sotra hayānāṃ pauruṣādhikaḥ

airāvato daṃtivaraścaturdaṃtotra rājate //
dvitīya iva kailāso jaṃgamasphaṭikojjvalaḥ

taruratnaṃpārijātaḥ strīratnaṃ sorvaśī tviha //
naṃdanaṃ vanaratnaṃ ca ratnaṃ maṃdākinī hyapām

trayastriṃśatsurāṇāṃ yā koṭiḥ śruti samīritā //
pratīkṣate sā'vasaraṃ sevāyai pratyahaṃtviha

svargeṣviṃdrapadādanyanna viśiṣyeta kiṃcana //
yadyattrilokyāmaiśvaryaṃ na tattulyamanena hi

aśvamedhasahasrasya labhyaṃ vinimayena yat //
kiṃ tena tulyamanyatsyātpavitramathavā mahata

arciṣmatī saṃyaminī puṇyavatyamalāvatī //
gaṃdhavatyalakeśī ca naitattulyā mahardhibhiḥ

ayameva sahasrākṣastvayameva divaspatiḥ //
śatamanyurayaṃ devo nāmānyetāni nāmataḥ

saptāpi lokapālā ye ta enaṃ samupāsate //
nāradādyairmunivarairayamāśīrbhirīḍyate

etatsthairyeṇa sarveṣāṃ lokānāṃ sthairyamiṣyate //
parājayānmaheṃdrasya trailokyaṃ syātparājitam

danujā manujā daityāstapasyaṃtyugrasaṃyamāḥ //
gaṃdharva yakṣarakṣāṃsi maheṃdrapadalipsavaḥ

sagarādyā mahīpālā vājimedhavidhāyakāḥ //
kṛtavaṃto mahāyatnaṃ śakraiśvaryajighṛkṣavaḥ

niṣpratyūhaṃ kratuśataṃ yaḥ kaścitkurute'vanau //
jiteṃdriyomarāvatyāṃ sa prāpnoti pulomajām

asamāptakratuśatā vasaṃtyatra mahībhujaḥ //
jyotiṣṭomādibhiryāgairye yajaṃtyapi te dvijāḥ

tulāpuruṣadānādi mahādānāni ṣoḍaśa //
ye yacchaṃtyamalātmānaste labhaṃte'marāvatīm

aklībavādino dhīrāḥ saṃgrāmeṣvaparāṅmukhāḥ //
vikrāṃtā vīraśayane te'tra tiṣṭhaṃti bhūbhujaḥ

ityuddeśātsamākhyātā maheṃdranagarī sthitiḥ //
yāyajūkā vasaṃtyatra yajñavidyāviśāradāḥ

imāmarciṣmatīṃ paśya vītihotrapurīṃ śubhām //
jātavedasi ye bhaktāste vasaṃtyatra suvratāḥ

agnipraveśaṃ ye kuryurdṛḍhasattvā jiteṃdriyāḥ //
striyo vā sattvasaṃpannāste sarve agnitejasaḥ

agnihotraratā viprāstathāgnibrahmacāriṇaḥ //
paṃcāgnivratino ye vai te'gnilokegnitejasaḥ

śīte śītāpanutyai yastvidhmabhārānprayacchati //
kuryādagniṣṭikāṃ vā'tha sa vasedagnisannidhau

anāthasyāgnisaṃskāraṃ yaḥ kuryācchraddhayānvitaḥ //
aśaktaḥ prerayedanyaṃ sogniloke mahīyate

jaṭharāgnivivṛddhyai yo dadyādāgneyamauṣadham //
maṃdāgnaye sa puṇyātmā vahniloke vasecciram

yajñopaskara vastūni yajñārthaṃ draviṇaṃ tu vā //
yathāśakti pradadyādyo hyarciṣmatyāṃvasetsa vai

agnireko dvijātīnāṃ niḥśreyasakaraḥ paraḥ //
gururdevo vrataṃ tīrthaṃ sarvamagnirviniścitam

apāvanāni sarvāṇi vahnisaṃsargataḥ kṣaṇāt //
pāvanāni bhavaṃtyeva tasmādyaḥ pāvakaḥ smṛtaḥ

api vedaṃ viditvā yastyaktvā vai jātavedasam //
anyatra badhnāti ratiṃ brāhmaṇo na sa vedavit

aṃtarātmā hyayaṃ sākṣānniścito hyāśuśukṣaṇiḥ //
māṃsagrāsānpacetkukṣau strīṇāṃ no māṃsapeśikām

taijasī śāṃbhavī mūrtiḥ pratyakṣā dahanātmikā //
kartrī haṃtrī pālayitrī vinaināṃ kiṃ vilokyate

citrabhānurayaṃ sākṣānnetraṃ tribhuvaneśituḥ //
aṃdhaṃ tamomaye loke vinainaṃ kaḥ prakāśakaḥ

dhūpapradīpanaivedya payo dadhi ghṛtaikṣavam //
etadbhuktaṃ niṣevaṃte sarve divi divaukasaḥ

śivaśarmovāca // //
koyaṃ kṛśānuḥ kasyāyaṃ sūnuḥ kathamidaṃ padam //
āgneyaṃ labdhametena brūtametanmamāgrataḥ

// gaṇāvūcatuḥ // //
ākarṇaya mahāprājña varṇayāvo yathātatham //
yoyaṃ yasya yathā'nena prāpi jyotiṣmatīpurī

narmadāyāstaṭe ramye pure narmapure purā //
purāribhaktaḥ puṇyātmā'bhavadviśvānaro muniḥ

brahmacaryāśrame niṣṭho brahmayajñarataḥsadā //
śāṃḍilyagotraḥ śucimānbrahmatejo nidhirvaśī

vijñātākhilaśāstrārtho laukikācāracaṃcuraḥ //
kadācicciṃtayāmāsa hṛdi dhyātvā maheśvaram

caturṇāmapyāśramāṇāṃ kotīva śreyase satām //
yasminprāpnoti saṃkṣuṇṇe paratreha ca vā sukham

idaṃ śreyastvidaṃ śreyastvidaṃ tu sukaraṃ bhavet //
itthaṃ sarvaṃ samāloḍya gārhasthyaṃ praśaśaṃsa ha

brahmacārī gṛhastho vā vānaprastho'tha bhikṣukaḥ //
eṣāmādhārabhūtosau gṛhastho nānyatheti ca

devairmanuṣyaiḥ pitṛbhistiryagbhiścopajīvyate //
gṛhasthaḥ pratyahaṃ yasmāttasmācchreṣṭho gṛhāśramī

asnātvā cāpyahutvā vā'dattvā vāśnāti yo gṛhī //
devādīnāmṛṇī bhūtvā narakaṃ pratipadyate

asnātāśī malaṃ bhuṃkte tvajapī pūyaśoṇitam //
ahutāśī kṛmīnbhuṃktepyadattvāviḍvibhojanaḥ

brahmacaryaṃ hi gārhasthye yādṛkkalpanayojjhitam //
svabhāvacapale citte kva tādṛgbrahmacāriṇi

haṭhādvā lokabhītyā vā svārthādvā brahmacaryabhāk //
saṃkalpayati citte cetkṛtamapyakṛtaṃ tadā

paradāraparityāgātsvadāraparituṣṭitaḥ //
ṛtukālābhigāmitvādbrahmacārī gṛhīritaḥ

vimuktarāgadveṣo yaḥ kāmakrodhavivarjitaḥ //
sāgniḥ sadāraḥ sa gṛhī vānaprasthādviśiṣyate

vairāgyādgṛhamutsṛjya gṛhadharmānhṛdi smaret //
sa bhavedubhayabhraṣṭo vānaprastho na vā gṛhī

ayācitopasthitayā yo vṛttyā vartate gṛhī //
yena kenāpi saṃtuṣṭo bhikṣukātsa viśiṣyate

prāthayedyatkvacitkiṃcidduṣprāpaṃ vā bhaviṣyati //
aśaneṣu na saṃtuṣṭaḥ sa yatiḥ patito bhavet

guṇāguṇavicāryetthaṃ sa vai viśvānaro dvijaḥ //
udvavāha vidhānena svocitāṃ kulakanyakām

agniśuśrūṣaṇarataḥ paṃcayajñaparāyaṇaḥ //
ṣaṭkarmanirato nityaṃ devapitratithipriyaḥ

dharmārthakāmānyuktātmā sorjayansvasvakālataḥ //
parasparamasaṃkocaṃ daṃpatyorānukūlyataḥ

pūrvāhṇe daivikaṃ karma sokarotkarmakāṃḍavit //
madhyaṃdine manuṣyāṇāṃ pitṝṇāmaparāhnake

evaṃ bahutithe kāle gate tasyāgrajanmanaḥ //
bhāryā śuciṣmatī nāma kāmapatnī vasuvratā

apaśyaṃtyaṃkuramapi saṃtateḥ svargasādhanam //
vijñāya śaṃkaṃraṃ kāṃtaṃ praṇipatya vyajijñapat

śuciṣmatyuvāca//
āryaputrāryadhiṣaṇa prāṇanātha priyavrata //
na durlabhaṃ mamāstīha kiṃcittvaccaraṇārcanāt

ye vai bhogāḥ samucitāḥ strīṇāṃ te tvatprasādataḥ //
alaṃkṛtya mayā bhuktāḥ prasaṃgādvacmi tānyapi

suvāsāṃsi suvāsāśca suśayyā sunitaṃbinī//
sraktāṃbūlānnapānāśca aṣṭau bhogāḥ svadharmiṇām

ekaṃ me prārthitaṃ nātha cirāya hṛdisaṃsthitam //
gṛhasthānāṃ samucitaṃ tattvaṃ dātumihārhasi

viśvānara uvāca //
kimadeyaṃ hi suśroṇi tava priyahitaiṣiṇi //
tatprārthaya mahābhāge prayacchāmyavilaṃbitam

maheśituḥ prasādena mama kiṃcinna durlbham //
ihāmutra ca kalyāṇi sarvakalyāṇakāriṇaḥ

iti śrutvā vacaḥ patyustasya sā patidevatā //
uvāca hṛṣṭavadanā yadi deyo varo mama

varayogyāsmi cennātha nānyaṃ varamahaṃ vṛṇe //
maheśasadṛśaṃ putraṃ dehi māheśvarānava

iti tasyā vacaḥ śrutvā śuciṣmatyāḥ śucivrataḥ //
kṣaṇaṃ samādhimādhāya hṛ(?)dyetatsamaciṃtayat

aho kimetayā tanvyā prārthitaṃ hyatidurlabham //
manorathapathāddūramastuvā sa hi sarvakṛt

tenaivāsyā mukhe sthitvā vāksvarūpeṇa śaṃbhunā //
vyāhṛtaṃ ko'nyathākartumutsaheta bhavedidam

tataḥ provāca tāṃ patnīmekapatnivrate sthitaḥ //
viśvānaramuniḥ śrīmāniti kāṃte bhaviṣyati

itthamāśvāsya tāṃ patnīṃ jagāma tapase muniḥ //
yatra viśveśvaraḥ sākṣātkāśīnāthodhitiṣṭhati

prāpya vārāṇasīṃ tūrṇaṃ dṛṣṭvātha maṇikarṇikām //
tatyāja tāpatritayamapijanmaśatārjitam

dṛṣṭvā sarvāṇi liṃgāni viśveśa pramukhāni ca //
snātvā sarveṣu kuṃḍeṣu vāpīkūṭasaraḥsu ca

natvā vināyakānsarvāngaurīḥ sarvāḥ praṇamya ca //
saṃpūjya kālarājaṃ ca bhairavaṃ pāpabhakṣaṇam

daṇḍanāyakamukhyāṃśca gaṇānstutvā prayatnataḥ //
ādikeśavamukhyāṃśca keśavānparitoṣya ca

lolārkamukhya sūryāṃśca praṇamya ca punaḥ punaḥ //
kṛtvā piṇḍapradānāni sarvatīrtheṣvataṃdritaḥ

sahasrabhojanādyaiśca yatīnviprānpratarpya ca //
mahāpūjopacāraiśca liṃgānyabhyarcya bhaktitaḥ

asakṛccintayāmāsa kiṃ liṃgaṃ kṣiprasiddhidam //
yatra niścalatāmeti tapastanayakāmyayā

śrīmadoṃkāranāthaṃ vā kṛttivāseśvaraṃ kimu //
kāleśaṃ vṛddhakāleśaṃ kalaśeśvarameva ca

kedāreśaṃ tu kāmeśaṃ candreśaṃ vā trilocanam //
jyeṣṭheśaṃ jaṃbukeśaṃ vā jaigīṣavyeśvaraṃ tu vā

daśāśvamedhamīśānaṃ drumi caṃḍeśameva ca //
dṛkkeśaṃ garuḍeśaṃ ca gokarṇeśaṃ gaṇeśvaram

ḍhuṃḍhyāśāgajasiddhākhyaṃ dharmeśaṃ tārakeśvaram //
nandikeśaṃ nivāseśaṃ patrīśaṃ prītikeśvaram

parvateśaṃ paśupatiṃ brahmeśaṃ madhyameśvaram //
bṛhaspatīśvaraṃ vātha vibhāṃḍeśvarameva ca

bhārabhūteśvaraṃ kiṃ vā mahālakṣmīśvaraṃ tu vā //
marutteśaṃ tu mokṣeśaṃ gaṃgeśaṃ narmadeśvaram

mārkaṃḍaṃ maṇikarṇīśa ratneśvaramathāpi vā //
athavā yoginīpīṭhaṃ sādhakasyaiva siddhidam

yāmuneśaṃ lāṃgalīśaṃ śrīmadviśveśvaraṃ vibhum //
avimukteśvaraṃ vātha viśālākṣīśameva ca

vyāghreśvaraṃ varāheśaṃ vyāseśaṃ vṛṣabhadhvajam //
varuṇeśaṃ vidhīśaṃ vā vasiṣṭheśaṃ śanīśvaram

someśvaraṃ kimindreśaṃ svarlīnaṃ saṃgameśvaram //
hariścaṃdreśvaraṃ kiṃ vā harikeśeśvaraṃ tu vā

trisaṃdhyeśaṃ mahādevamupaśāṃti śivaṃ tathā//
bhavānīśaṃ kapardīśaṃ kaṃdukeśaṃ makheśvaram

mitrāvaruṇasaṃjñaṃ vā kimeṣāmāśuputradam //
kṣaṇaṃ vicārya sa muniriti viśvānaraḥ sudhīḥ

ājñātaṃ vismṛtaṃ tāvatphalito me manorathaḥ //
siddhaiḥ saṃsevitaṃ liṃgaṃ sarvasiddhikaraṃ param

darśanātsparśanādyasya mano nirvṛtibhāgbhavet //
udghāṭitaṃ sadaivāste svargadvāraṃ hi yatra vai

divāniśaṃ pūjanārthaṃ vijñāpya tridaśeśvaram //
pañcamudre mahāpīṭhe siddhide sarvajaṃtuṣu

yatra sā vikaṭā devī prakaṭā siddhirūpiṇī //
yatra sthitānāṃ bhaktānāṃ sākṣātsiddhivināyakaḥ

nirdhūya vighnajālāni sarvāḥ siddhīḥ prayacchati //
avimukte mahākṣetre siddhikṣetraṃ hi tatparam

yatra vīreśvaraṃ liṃgaṃ mahāguhyatamaṃ matam //
tilāṃtarāpi no kāśyāṃ bhūmirliṃgaṃ vinā kvacit

paraṃ vīreśa sadṛśaṃ na liṃgaṃ tvāśusiddhidam //
dharmadaṃ cārthadaṃ samyakkāmadaṃ mokṣadaṃ tathā

yathā vīreśvaraṃ liṃgaṃ kāśyāṃ nānyattathā dhuvam //
paṃcasvarotra gaṃdharvaḥ parāṃ siddhimagātpurā

vidyādharaḥ svacchavidyo vasupūrṇaśca yakṣarāṭ //
nṛtyaṃtī nijabhāvena purāhyatrāpsarovarā

sadehā kokilālāpā liṃgamadhye layaṃ gatā //
ṛṣirvedaśirā nāma japanvai śatarudriyam

mantrajyotirmaye liṃge saśarīro viśatpurā //
candramauli bharadvājāvubhau pāśupatottamau

vīreśvaraṃ samabhyarcya gāyamānau layaṃ gatau //
śaṃkhacūḍo hi nāgeṃdraḥ svaphaṇāmaṇibhirniśi

ṣaṇmāsātsiddhimagamadbahunīrājanairiha //
kinnarī haṃsapadyatra bhartrā veṇupriyeṇa vai

gāyaṃtī susvaraṃ yātā parāṃ nirvāṇabhūmikām //
asaṃkhyātāḥ sahasrāṇi siddhāḥ siddhimihāgatāḥ

siddhaliṃgamihākhyātaṃ tasmādvīreśvaraṃ param

vīreśvaraṃ samārādhya bhraṣṭarājyo jayadrathaḥ //
hatvā ripūnaskhalitaṃ rājyaṃ prāpa videhajaḥ

vidūratho'tha nṛpatiraputraḥ putravānabhūt //
vīreśvaraprasādena magadhādhipatirvaśī

vasudattotra ca vaṇiksutāṃ vasusutopamām //
abdamabhyarcya vīreśaṃ ratnadattopyavāptavān

ahamapyatra vīreśaṃ samārādhyatrikālataḥ //
āśu putramavāpsyāmi yathābhilaṣitaṃ striyā

iti kṛtvā matiṃ dhīro vipro viśvānaraḥ kṛtī //
candrkūpajalaiḥ snātvā jagrāha niyamaṃ vratī

ekāhārobhavanmāsaṃ māsaṃ naktāśanobhavata //
ayācitāśano māsaṃ māsaṃ tyaktāśanaḥ punaḥ

payovratobhavanmāsaṃ māsaṃ śākaphalāśanaḥ //
māsaṃ muṣṭitilāhāro māsaṃ pānīyabhojanaḥ

paṃcagavyāśano māsaṃ māsaṃ cāṃdrāyaṇavratī //
māsaṃ kuśāgrajalabhuṅmāsaṃ śvasanabhakṣaṇaḥ

atha trayodaśe māsi snātvā tripathagāṃbhasi //
pratyūṣa eva vīreśaṃ yāvadāyāti sa dvijaḥ

tāvadvilokayāṃcakre madhye liṃgaṃ tapodhanaḥ //
vibhūtibhūṣitaṃ bālamaṣṭavarṣākṛtiṃ śubham

ākarṇapūrṇanetraṃ ca suraktadaśanacchadam //
cārupiṃgajaṭāmauliṃ nagnaṃ prahasitānanam

śaiśavocitanepathyadhāriṇaṃ cittahāriṇam //
paṭhaṃtaṃ śrutisūktāni hasaṃtaṃ ca svalīlayā

tamālokya stutiṃ cakre romakaṃcukito mudā //
proccaradgadgadālāpo namostviti punaḥ punaḥ

viśvānara uvāca // //
ekabrahmaivādvitīyaṃ samastaṃ satyaṃ satyaṃ nehanānāsti kiṃcit //
eko rudro na dvitīyovatasthe tasmādekaṃ tvāṃ prapadye maheśam

ekaḥ kartā tvaṃ hi sarvasya śaṃbho nānārūpeṣvekarūposya rūpaḥ //
yadvatpratyapsvarka ekopyanekastasmānnānyaṃ tvāṃ vineśaṃ prapadye

rajjau sarpaḥ śuktikāyāṃ ca rūpyaṃnairaḥpūrastanmṛgākhye marīcau //
yadvattadvadviṣvageṣa prapaṃco yasmiñjñāte taṃ prapadye maheśam

toye śaityaṃ dāhakatvaṃ ca vahnau tāpo bhānau śīta bhānauprasādaḥ //
puṣpe gaṃdho dugdhamadhyepi sarpiryattacchaṃbho tvaṃ tatastvāṃ prapadye

śabdaṃ gṛhṇāsyaśravāstvaṃ hi jighreraghrāṇastvaṃ vyaṃghrirāyāsi dūrāt //
vyakṣaḥ paśyestvaṃ rasajñopyajihvaḥ kastvāṃ samyagvettyatastvāṃ prapadye

novedastvāmīśa sākṣāddhivedano vā viṣṇurnovidhātā'khilasya //
no yogīṃdrāneṃdramukhyāśca devā bhakto veda tvāmatastvāṃ prapadye

no te gotraṃ neśajanmāpinākhyāno vā rūpaṃ naiva śīlaṃ na deśaḥ //
itthaṃbhūtopīśvarastvaṃ trilokyāḥ sarvānkāmānpūrayestadbhaje tvām

tvattaḥ sarvaṃ tvaṃ hi sarvaṃ smarāre tvaṃ gaurīśastvaṃ ca nagno'tiśāṃtaḥ //
tvaṃ vai vṛddhastvaṃ yuvā tvaṃ ca bālastattvaṃ yatkiṃnāsyatastvāṃ natosmi

stutveti bhūmau nipapāta vipraḥ sa daṃḍavadyāvadatīva hṛṣṭaḥ //
tāvatsa bālokhilavṛddhavṛddhaḥ provāca bhūdeva varaṃ vṛṇīhi

tata utthāya hṛṣṭātmā munirviśvānaraḥ kṛtī //
pratyabravītkimajñātaṃ sarvajñasya tava prabho

sarvāṃtarātmā bhagavānsarvaḥ sarvaprado bhavān //
yācñāṃ pratiniyuṃkte māṃ kimīśo dainyakāriṇīm

iti śrutvā vacastasya devo viśvānarasya ha //
śuceḥ śucivratasyāśu śucismitvābravīcchiśuḥ

bāla uvāca //
tvayā śuce śuciṣmatyāṃ yobhilāṣaḥ kṛto hṛdi //
acireṇaivakālena sa bhaviṣyatyasaṃśayaḥ

tava putratvameṣyāmi śuciṣmatyāṃ mahāmate //
khyāto gṛhapatirnāmnā śuciḥ sarvāmarapriyaḥ

abhilāṣāṣṭakaṃ puṇyaṃ stotrametattvayeritam //
abdaṃ trikālapaṭhanātkāmadaṃ śivasaṃnidhau

etatstotrasya paṭhanaṃ putra pautra dhanapradam //
sarvaśāṃtikaraṃ cāpi sarvāpatparināśanam

svargāpavarga saṃpattikārakaṃ nātra saṃśayaḥ //
prātarutthāya susnāto liṃgamabhyarcya śāṃbhavam

varṣaṃ japannidaṃ stotramaputraḥ putravānbhavet //
vaiśākhe kārtike māghe viśeṣaniyamairyutaḥ

yaḥ paṭhetsnānasamaye sa labhetsakalaṃ phalam //
kārtikasya tu māsasya prasādādahamavyayaḥ

tava putratvameṣyāmi yastvanyastatpaṭhiṣyati //
abhilāṣāṣṭakamidaṃ na deyaṃ yasya kasyacit

gopanīyaṃ prayatnena mahāvaṃdhyāprasūtikṛt //
striyā vā puruṣeṇāpi niyamālliṃga saṃnidhau

abdaṃ japtamidaṃ stotraṃ putradaṃ nātra saṃśayaḥ //
ityuktvāṃtardadhe bālaḥ sopi vipro gṛhaṃ gataḥ

iti śrīskāṃde mahāpurāṇa ekāśītisāhasyāṃ saṃhitāyāṃ caturthe kāśīkhaṇḍe pūvārddhe iṃdrāgnilokavarṇanaṃnāma daśamo'dhyāyaḥ