Skanda Purana · Verses 3.7-3

// śrīsūta uvāca // //
svasainyamavalokyātha mahiṣo dānaveśvaraḥ //
hataṃ devyā mahākrodhāccaṃḍakopamathābravīt

// mahiṣa uvāca // //
caṃḍakopa mahāvīrya yuddhyasvaināṃ durātmikām //
tathāstviti sa coktvātha caṃḍakopaḥ pratāpavān

avākiradbāṇavarṣairdevīṃ samaramūrddhani //
bāṇajālāni tasyāśu caṃḍakopasya līlayā

chittvā jaghāna śastreṇa caṃḍakopasya sāṃbikā //
cakarta vājino'pyasya sārathiṃ ca dhvajaṃ dhanuḥ

unmamātha rathaṃ cāpi taṃ bāṇairhṛdyatāḍayat //
sa bhagnadhanvā viratho hatāśvo hatasārathiḥ

caṃḍakopastato devīṃ khaḍgacarmadharo'bhyagāt //
khaḍgena siṃhamājaghne devyā vāhaṃ mahāsuraḥ

devīmapi bhuje savye khaḍgena prajaghāna saḥ //
khaṅgo devyā bhuje savye vyaśīryata sahasradhā

tataḥ śūle na mahatā caṃḍakopaṃ tadāṃbikā //
jaghāna hṛdaye so'pi papāta ca mamāra ca

caṃḍakope hate tasminmahāvīrye mahābale //
citrabhānurgajārūḍho devīṃ tāmabhyadhāvata

divyāṃ śaktiṃ sasarjātha mahāghaṃṭāravākulām //
nyavārayata huṃkārairdevī śaktiṃ nirākulām

tataḥ śūlena sā devī citrabhānuṃ vyadārayat //
mṛte tasmiṃstato yuddhe karālo drutamabhyagāt

karamuṣṭiprahāreṇa so'pi devyā nipātitaḥ //
tato devī madonmattaṃ gadayā vyasumātanot

bāṣkalaṃ paṭṭiśenāpi cakreṇāpi tathāṃtikam //
prāhiṇodyamalokāya durgā devī dvijottamāḥ

evamanyānmahākāyānmaṃtriṇo mahiṣasya ca //
śūlena prothayitvātha prāhiṇodyamasādanam

ātmasainye hate tvevaṃ durgayā mahiṣāsuraḥ //
māhiṣeṇātha rūpeṇa gaṇāndevyā abhakṣayat

tuṇḍena nijaghānaikānsurāghātaistathāparān //
niśvāsavāyubhiścānyānpātayāmāsa roṣitaḥ

devyā bhūtagaṇaṃ tvevaṃ nihatya mahiṣāsuraḥ //
siṃhaṃ mārayituṃ devyāścukrodha ca nanāda ca

tataḥ siṃho'bhavatkruddho mahāvīryo mahābalaḥ //
surābhi ghātanirbhinnamahītalamahīdharaḥ

mahiṣāsuramāyāṃtaṃ nakhairenaṃ vyadārayat //
caṃḍikāpi tataḥ kruddhā vadhe tasyākaronmatim

babandha pāśairmahiṣaṃ caṃḍikā kopamūrcchitā//
mocayitvā tataḥ pāśāṃstyaktamāhiṣaveṣavān

/
siṃhaveṣo'bhavaddaityo mahābalaparākramaḥ//
devī tasya śiroyāvacchettuṃ buddhimadhārayat

tāvatsa puruṣo bhūtvā khaḍgapāṇiradṛśyata//
atha taṃ puruṣaṃ devī khaḍgahastaṃ śarotkaraiḥ

jaghāna tīkṣṇadhārāgraiḥ paramarmavidāraṇaiḥ //
tataḥ sa puruṣo viprā gajo'bhūddhastadantavān

durgāyā vāhanaṃ siṃhaṃ kareṇa vicakarṣa ca //
tataḥ siṃhaḥ karaṃ tasya vicakarta nakhāṃkuraiḥ

bhūyo mahāsuro jāto māhiṣaṃ veṣamāśritaḥ //
tataḥ kruddhā bhadrakālī mahatpānamasevata

tataḥ pānavaśā nmattā jahāsāruṇalocanā //
mahiṣaḥ so'pi garveṇa śṛṃgābhyāṃ parvatotkarān

caṃḍikāṃ pratiṃ cikṣepa sā ca tānacchinaccharaiḥ //
tato devī jaga nmātā mahiṣāsuramabravīt

// devyuvāca // //
kuru garvaṃ kṣaṇaṃ mūḍha madhu yāvatpibāmyaham //
nivṛttamadhupānāhaṃ tvāṃ nayiṣye yamakṣayam//

hate tvayi durādharṣe mayā daivatakaṃṭake//
svaṃsvaṃ sthānaṃ prapadyaṃtāṃ siddhā sādhyā marudgaṇāḥ

uktvaivaṃ tāḍayāmāsa muṣṭinā mahiṣāsuram//
tāḍito'yaṃ tato devyā mahiṣo bhṛśavihvalaḥ

/
dakṣiṇasyodadhestīrepradudrāva tvarānvitaḥ//
anududrāva taṃ devī siṃhamāruhya vāhanam

anudrutastato devyā mahiṣo dānaveśvaraḥ//
dharmapuṣkīraṇītoye daśayojanamāyate

praviśyāṃtarhitastasthau durgātāḍanavihvalaḥ//
tato durgā samāsādya dharmapuṣkariṇītaṭam //

nadadarśāsuraṃ tatra mahiṣaṃ caṃḍikā tadā //
aśarīrā tato vāṇī durgā devīmabhāṣata

bhadrakāli mahādevi mahiṣo dānavastvayā //
tāḍito muṣṭinā bhadre dharmapuṣkariṇījale

asminnaṃtarhitaḥ śete bhayārto mārayasva tam //
yenakenāpyupāyena cainaṃ prāṇairviyojaya

evaṃ vācā'śarī riṇyā kathitā caṃḍikā tadā //
prāha svavāhanaṃ siṃhamasureṃdravadhodyatā

mṛgeṃdra siṃhavikrāṃta mahāvalaparākrama //
dharmapuṣkīraṇītoyaṃ niḥśeṣaṃ pīya tāṃ tvayā

devyaivamuktaḥ paṃcāsyo dharmapuṣkariṇījalam //
niḥśeṣaṃ ca papau viprā yathā pāṃsurbhavettathā

niragānmahiṣo dīnastatastasmā jjalāśayāt //
āyāṃtamasuraṃ devī pādenākramya mūrddhani

kaṃṭhaṃ śūlena tīkṣṇena pīḍayāmāsa kopitā //
tato devyasimādāya cakartāsya śiro mahat

evaṃ sa mahiṣo viprāḥ sabhṛtyabalavāhanaḥ //
durgayā nihato bhūmau papāta ca mamāra ca

tato devāḥ sagaṃdharvāḥ siddhāśca paramarṣayaḥ //
stutvā devīṃ tataḥ stotraistuṣṭā jahṛṣire tadā

anujñātāstato devyā devā jagmuryathāgatam //
tato devī jaganmātā sva nāmnā puramuttamam

dakṣiṇasya samudrasya tīre cakre tadottare //
tato devyanuśiṣṭāste devāḥ śakrapurogamāḥ

pūrayāmāsuramṛtairdharmapuṣka riṇīṃ tadā //
tato hyamṛtatīrthākhyāṃ lebhe tattīrthamuttamam

tato devī varamadātsvapurasya mudānvitā //
paśavyaṃ cāparogaṃ ca purametadbhavatviti

dadau tīrthāya ca varaṃ snātānāmatra vai nṛṇām //
yathābhilāṣaṃ siddhiḥ syādityuktvā sā divaṃ yayau

// śrīsūta uvāca // //
yatsvanāmnā cakāredaṃ devī puramanuttamam //
devīpattanamityuktaṃ tena devyāḥ purottamam

devīpattanamārabhya sumuhūrte dine dvijāḥ //
vighneśvaraṃ praṇamyādau salilasvāminaṃ tathā

mahādevābhyanujñāto rāmacaṃdro'tidhārmikaḥ //
sthāpayitvā svahastena pāṣāṇanavakaṃ mudā

setumārabdhavānviprā yāvallaṃkāmataṃdritaḥ //
siṃhāsanaṃ samāruhya rāmo nalakṛtaṃ śubham

vānaraiḥ kārayāmāsa setumabdhau nalādibhiḥ //
parvatāñchākhinovṛkṣāndṛṣadaḥ kāṣṭhasaṃcayān

tṛṇāni ca samājahrurvānarā vanamadhyataḥ

nalastāni samādāya cakre setuṃ mahodadhau //
paṃcabhirdivasaiḥ seturyāvallaṃkāsamīpataḥ

daśayojanavistīrṇaśśatayojanamāyataḥ //
kṛtaḥ seturnalenābdhau puṇyaḥ pāpavināśanaḥ

devīpurasya nikaṭe navapāṣāṇarūpake //
setumūle naraḥ snāyātsvapāpapariśuddhaye

cakratīrthe tathā snāyādbhajetsetvadhipaṃ harim//
devīpattanamārabhya yatkṛtaṃ setubaṃdhanam

tatsetumūlaṃ vipreṃdrā yathārthaṃ parikalpitam //
setostu paścimā koṭirdarbhaśayyā prakīrtitā

devīpurī ca prākkoṭirubhayaṃ setumūlakam //
ubhayaṃ puṇyamākhyātaṃ pavitraṃ pāpanāśanam

yatsetumūlaṃ gacchaṃti yena mārgeṇa vai narāḥ//
tattanmārgagatāste te tasmiṃstasminvimuktide

snātvādau setumūle tu cakratīrthe tathaiva ca //
saṃkalpapūrvakaṃ paścādgaccheyuḥ setubaṃdhanam

devīpure tathā darbhaśayyāyāmapi bhūsurāḥ //
cakratīrthe śive snānaṃ puṇyapāpavināśanam

smaraṇādubhayatrāpi cakratīrthasya vai dvijāḥ //
bhasmībhavaṃti pāpāni lakṣajanmakṛtānyapi

janmāpi vilayaṃ yāyānmuktiścāpi kare sthitā //
cakratīrthasamaṃ tīrthaṃ na bhūtaṃ na bhaviṣyati

bhūloke yāni tīrthāni gaṃgādīni dvijottamāḥ //
cakratīrthasya tānyaddhā kalāṃ nārhaṃti ṣoḍaśīm

ādau tu navapāṣāṇamadhye'bdhau snānamācaret //
kṣetrapiṃḍe tataḥ kuryāccakratīrthe tathaiva ca

setunāthaṃ hariṃ sevetsvapāpapariśuddhaye //
evaṃ hi darbhaśayyāyāṃ kuryustanmārgato gatāḥ

ārūḍhaṃ rāmacaṃdreṇa yo namaskurute janaḥ //
siṃhāsanaṃ nalakṛtaṃ na tasya narakādbhayam

setumādau namaskuryādrāmaṃ dhyāyanhṛdā tadā //
raghuvīrapadanyāsa pavitrīkṛtapāṃsave

daśakaṃṭhaśiraśchedahetave setave namaḥ //
ketave rāmacaṃdrasya mokṣamārgaikahetave

sītāyā mānasāṃbhojabhānave setave namaḥ // //
sāṣṭāṃgaṃ praṇipatyādau maṃtreṇānena vai dvijāḥ

tato vetālavaradaṃ tīrthaṃ gacchenmahābalam //
tatra snānādavāpnoti siddhiṃ pārāmikāṃ naraḥ

yo'dhyāyamenaṃ paṭhate manuṣyaḥ śṛṇoti vā bhaktiyuto dvijeṃdrāḥ //
svargādayastasya na durlabhāḥ syuḥ kaivalyamapyasya karasthameva

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye cakatīrthapraśaṃsāyāṃ devīpurābhidhānakathane mahiṣāsurasaṃhāravarṇanaṃnāma saptamo'dhyāyaḥ